Joe Biden
![](http://upload.wikimedia.org/wikipedia/commons/thumb/2/20/Joe_Biden_official_portrait_2013_cropped.jpg/220px-Joe_Biden_official_portrait_2013_cropped.jpg)
![](http://upload.wikimedia.org/wikipedia/commons/thumb/4/43/Biden_Obama.jpg/220px-Biden_Obama.jpg)
Joseph Robinette „Joe” Biden, Jr. ['dʒoʊsəf rɒbɪ'nɛt 'baɪdən] (* 20. November 1942 in Scranton, Pennsylvania), is en US-amerikaansch Politiker un Liddmaat vun de Demokraatsche Partei. He is Perfesser för Rechtswetenschoppen un sitt för den US-Bundsstaat Delaware in den Senat. An'n 23. August 2008 is bekannt maakt wurrn, dat Barack Obama em as Kannedaten för dat Amt vun den US-Viezpräsidenten utkeken hett. Bi de US-Präsidentenwahl 2008 an'n 4. Dezember is Barack Obama to'n 44. US-Präsidenten wählt wurrn. Dormit is klaar, dat Biden in'n Februar 2009 Viezpräsident vun de USA warrt.
Sien Weg up de School un Universität un siene Familie
[ännern | Bornkood ännern]Biden is boren in Scranton (Pennsylvania) as Söhn vun Joseph R. Biden, Sr. un Catherine Eugenia "Jean" Finnegan. He hett noch twee Bröder un een Süster. Dat sünd James Brian Biden un Francis W. Biden. De Süster heet Valerie (Biden) Owens. As he tein Johre oolt weer, is siene Familie umtagen na Claymont in Delaware. Dor is he in New Castle County in so en Aart vun Vörstadt upwussen. Biden sien Vadder hett Autos verköfft. He süms besöch de kathoolsche Archmere Academy. 1961 hett he dor afslaten un güng an de University of Delaware in Newark. Dor möök he 1965 sien Afsluss. Wichtigste Fachen weern Historie un Politikwetenschop. 1968 promoveer he an dat College of Law vun de Syracuse University to'n Dokter vun de Rechten. Vun 1969 af an hett he denn as Afkaat in Delaware arbeit'. Vun 1991 hett he en Seminar över Recht vun de US-Verfaten an de Widener University School of Law unner sik.
An'n 27. August 1966 hett Biden in Skaneateles, New York sien Deern Neilia Hunter heiraat'. He harr ehr up de Highschool kennen lehrt. De beiden hefft dree Kinner harrt: Joseph Robinette III (* 1969), Robert Hunter (* 1970) un Naomi Christina (* 1971). An'n 18. Dezember 1972 hett dat en swaren Verkehrsunfall geven. En Laster is tohopendunnert mit dat Auto, wo Neilia un de Kinner in seten hefft. Neilia un Naomi sünd dor bi ümkamen, de beiden Jungs weern verletzt, man se hefft överleevt. An'n 17. Juni 1977 hett he denn in New York Jill Tracy Jacobs heiraat. Mit ehr hett he een Dochter, dat is Ashley Blazer Biden (*1981). Joe un siene Fro sünd Liddmaten vun de Röömsch-kathoolsche Kark.
Sien Weg as Politiker
[ännern | Bornkood ännern]1973 is Biden to'n eersten Mol US-Senater wurrn. Vun dor af an hett he fiev Mol en Wohl to'n Senater wunnen. He föhrt regelmotig mit de Iesenbahn un sett sik dorüm för Amtrak in. Bavenhen steiht he achter de Dover U.S. Airforce Base un achter de Industrie för dat Verarbeiden vun Höhner in Delaware. Siene Reden duert faken lange. Man he is dor bekannt för, dat he sik goot utdrücken kann un dat he dor wat achtersetten deit, wenn he en Reed höllt. In'n Ogenblick höört he to dat United States Senate Committee on the Judiciary un to dat United States Senate Committee on Foreign Relations. In dat leste is he Vörsitter.
Justiz
[ännern | Bornkood ännern]In'n Utschuss för Justiz weer he vun 1987 bit 1995 Vörsitter un vun 1981 bit 1987 un vun 1995 bit 1997 Ranking Minority Member. In siene Amtstiet as Vörsitter passeer dat, dat de konservativen Supreme-Court-Richters Robert Bork (1987) un Clarence Thomas (1991) beropen wurrn sünd. Dor hett dat dormols veel Striet üm geven.
He hett dor oorntlich wat mit to kriegen harrt, dat 1994 de Violent Crime Control and Law Enforcement Act tostanne kamen is. Dor is mit fastleggt wurrn, dat Lüde nich mehr so gau an Wapen rankamen konnen, man ok, dat nich bloß in de enkelten US-Staten, man ok in den Bund de Doodsstraaf fökener bruukt weern kann. Dor is ok en Reeg vun nee Verbreken fastleggt wurrn, för de vun dor af an de US-Bundsbehörden tostännig ween schollen. Dat sünd Verbreken, as Immigratschoonsverbreken, Hate Crimes, Gang-Verbreken oder Sexualverbreken. Deel vun düt Gesett weer ok de Violence Against Women Act. Dor sünd de Rechten vun Froensminschen stärker mit maakt wurrn. 2003 hett Biden dat RAVE Act (Reducing Americans' Vulnerability to Ecstasy Act) schreven. Vunwegen al de Ingreep, de dat bedüden dö, hett de elektroonsche Musikszeen in de USA sik dor unfründlich över utlaten.
As Vörsitter vun den International Narcotics Control Caucus stünn Biden achter de Gesetten, wo de Anti-Drogenpolitik vun de USA (ünner en so nömmten „Drogenzar“) mit tohopenfaat wurrn is. As Liddmaat in densülvigen Utschuss will he, dat noch mehr maakt warrt gegen Flunitrazepam, MDMA (Ecstasy), Ketamin oder Steroiden.
Deel-Immunität för Ext-Präsidenten[1]: Joe Biden sütt dat Oordeel vun dat böverste US-Gericht as Gefahr för Amerika.[2] 1 Juli, 2024 richt Biden sück in’t Witte Huus mit en Reed[3] an de Bevölkerung. „Disse Natschoon is op dat Prinzip grünnt worrn, dat dat in Amerika keen Königen gifft“[4], hett he seggt.
Butenpolitik
[ännern | Bornkood ännern]In de Butenpolitik hett he sik al fröh achter en aktive US-Butenpolitik up den Balkan stellt. He meen, wenn dat nödig weer, denn so möss ok Gewalt bruukt weern. Dat duer nich lang un he nömm Slobodan Milošević en Kriegsverbreker. He klemm sik dorachter, dat dat Wapenembargo gegen Serbien siene Gegenspelers upböört wurrn is un dat de Muslimen ut Bosnien en Militärtraining kriegen schollen. Vunwegen dat he för NATO-Bombenangreep up Belgrad spraken hett, hett sik US-Präsident Bill Clinton besnacken laten un dat is denn to'n Bombenkrieg gegen Serbien kamen, ofschoonst dat Völkerrecht dor stracks gegen stünn.
Na de Terroranslääg vun'n 11. September 2001 in de USA hett Biden US-Präsident george W. Bush unner de Arms grepen. He fodder mehr Truppen för de Landmacht in Afghanistan. He hett ok tostimmt, as Saddam Hussein tonicht maakt weern scholl. In'n US-Senat hett he bi de endgüllige Resolutschoon för den Irak-Krieg tostimmt. Hüdigendags seggt he avers, just so as annere Topppolitikers vun de Demokraten (as Hillary Clinton), dat dö em leed, dat he so afstimmt hett.
Präsidentschaftskandidaturen
[ännern | Bornkood ännern]Bi de Präsidentenwahl 1988 möss Biden Bott geven. Em is vörsmeten wurrn, he harr schummelt bi en Reed. He harr en Reed vun den britschen Premierminister neil Kinnock afschreven un ok so holen, as wenn dat siene egene Reed ween weer. 2004 is he vunwegen siene groot Weten un allens, wat he vun de Politik afwüss, as en mööglichen Butenminister unner en Präsident Kerry ankeken wurrn. Man Kerry hett dat nich schafft gegen Bush. Vun 2004 af an is he süms avers för de Wahlen vun 2008 as en mööglichen Kannedaten vun de Demokraten ankeken wurrn. He hett ok an'n 27. März 2007 verklaart, dat he dat woll maken dö.
Man as he bi de Demokraten ehre Vörwahlen in den US-Bundsstaat Iowa man bloß een Perzent kregen hett, dor is he ut dat Präsidenten-rennen gau wedder utstegen.
An'n 23. August hett Barack Obama verklaart, Biden scholl nu sien Kannedat för dat Amt vun'n „Viez“ in Amerika ween. He hett sik in'n Wahlkampf ok mit de Viezkannedaatsche vun de Republikaners, Sarah Palin, to en Feernsehduell drapen. Vunwegen dat Barack Obama de Wahlen wunnen hett, warrt Biden nu de neegste Viezpräsident vun de USA.
Mit de Wedderwahl vun Obama is ok Biden Viezpräsident bleeven. De Amtstiet vun beid geiht an 20. Januar 2017 to Enn'.
Wat he schreven hett
[ännern | Bornkood ännern]- Administration’s Missile Defense Program and the ABM Treaty: Hearing Before the Committee on Foreign Relations, U.S. Senate Joseph R. Biden Jr. (Diane Publishing, December 2004) ISBN 0-7567-1959-3
- Examining The Theft Of American Intellectual Property At Home And Abroad: Hearing before the Committee On Foreign Relations, U.S. Senate Joseph R. Biden Jr. (Diane Publishing, May 2004) ISBN 0-7567-4177-7
- Hearings to Examine Threats, Responses, and Regional Considerations Surrounding Iraq: Hearing before the Committee on Foreign Relations, U.S. Senate Joseph R. Biden Jr. (Diane Publishing, November 2003) ISBN 0-7567-2823-1
- Strategies for Homeland Defense: A Compilation by the Committee on Foreign Relations, U.S. Senate Joseph R. Biden Jr. (Diane Publishing, September 2003) ISBN 0-7567-2623-9
- Putin Administration's Policies toward Non-Russian Regions of the Russian Federation: Hearing before the Committee on Foreign Relations, U.S. Senate Joseph R. Biden Jr. (Diane Publishing, September 2003) ISBN 0-7567-2624-7
- Threat of Bioterrorism and the Spread of Infectious Diseases: Hearing before the Committee on Foreign Relations, U.S. Senate Joseph R. Biden Jr. (Diane Publishing, September 2003) ISBN 0-7567-2625-5
- How Do We Promote Democratization, Poverty Alleviation, and Human Rights to Build a More Secure Future: Hearing before the Committee on Foreign Relations, U.S. Senate Joseph R. Biden Jr. (Diane Publishing, June 2003) ISBN 0-7567-2478-3
- Political Future of Afghanistan: Hearing before the Committee on Foreign Relations, U.S. Senate Joseph R. Biden Jr. (Diane Publishing, January 2003) ISBN 0-7567-3039-2
- International Campaign Against Terrorism: Hearing before the Committee on Foreign Relations, U.S. Senate Joseph R. Biden Jr. (Diane Publishing, January 2003) ISBN 0-7567-3041-4
- Halting the Spread of HIV/AIDS: Future Efforts in the U.S. Bilateral & Multilateral Response: Hearings before the Comm. on Foreign Relations, U.S. Senate edited by Joseph R. Biden Jr. (Diane Publishing, 2002) ISBN 0-7567-3454-1
- Hague Convention On International Child Abduction: Applicable Law And Institutional Framework Within Certain Convention Countries Report To The Senate by Jesse Helms, Joseph R. Biden Jr. (Diane Publishing, April 2000) ISBN 0-7567-2250-0
- Homeland security law and policy edited by William C. Nicholson with a foreword by Joseph Biden (C. C Thomas, 2005) ISBN 0-398-07582-4 (allens engelsch)
Borns
[ännern | Bornkood ännern]- ↑ tagesschau.de: Biden kritisiert Entscheidung des Supreme Court zu Trumps Immunität. Afropen an’n 4. Juli 2024.
- ↑ Der US-Präsident wird durch Supreme-Court-Urteil zum König. Afropen an’n 4. Juli 2024 (öösterrieksch Hoochdüütsch).
- ↑ Henrik Jonathan Zinn: Joe Biden: Brandrede nach Trump-Urteil! "Es darf keine Könige geben". In: DerWesten.de. 2. Juli 2024, afropen an’n 4. Juli 2024 (de-DE).
- ↑ Nadja Lissok: USA: Präsident Biden kritisiert Entscheidung des Supreme Court zu Trump-Immunität. 2. Juli 2024, afropen an’n 4. Juli 2024.
Weblenks
[ännern | Bornkood ännern]- Joseph Biden up de offizielle Websteed vun de US-Senat (engelsch)
- Wahlkampfsite vun Joseph Biden