Bartholomäus (Apostel)
![](http://upload.wikimedia.org/wikipedia/commons/thumb/8/8e/Konrad_Witz_001.jpg/220px-Konrad_Witz_001.jpg)
![](http://upload.wikimedia.org/wikipedia/commons/thumb/c/cf/Last_judgement.jpg/220px-Last_judgement.jpg)
De Apostel Bartholomäus (hebr. בר־תלמי Bar-Tolmai, d. h. Tolmai sien Söhn) hett wohrschienlich in dat 1. Johrhunnert in Kana in Galiläa leevt.
Wat in de Bibel steiht
[ännern | Bornkood ännern]Na de Bibel weer Bartholomäus een vun Jesus siene Jüngers (kiek bi Mk. 3,14-19) un een vun de twolf Apostels. He warrt in de Listen mit Apostelnaams in de eersten dree Evangelien nömmt. Sien ganzen Naam is wohrschienlich Natanaël Bar-Tolmai, dat heet: Natanael, Tolmai sien Söhn. Dat is tominnst an to nehmen, wenn he desülvige Natanael is, vun den in Joh.1, 45-50 vertellt warrt, wie he beropen warrt. Dat kann annahmen weern, dat Natanael Bar-Tolmai en Schriftgelehrten oder Schöler vun en Schriftgelehrten ween is.
Wat de Legenn over em vertellt (Hagiographie)
[ännern | Bornkood ännern]De Legenn vertellt, he harr in Indien, in Mesopotamien un sunnerlich in Armenien predigt hebben. In Armenien weer he denn ok to'n Merteler maakt wurrn. Astyages, den König vun Armenien, Polymios, sien Broder, schall den Befehl geven hebben, em de Huut vun't Lief af to trecken, as he noch leven dö. Achterna schall he over Kopp krüzigt wurrn sien. Annerwegens warrt vertellt, se harrn em den Kopp afneiht.
Later is noch de annere Legenn upkamen, de Kast mit siene Lieke schall vun de See up den Strand vun de Insel Lipari bi Sizilien anspöölt wurrn sien. Dor harrn se em denn ok inkuhlt. Over sien Graff is en Karken boot wurrn, man de hefft de Sarazenen 831 in'n Dutt maakt.
Karkengeschicht
[ännern | Bornkood ännern]Kaiser Otto II. hett de Knaken 983 na Rom henbrocht. Dor sünd se bit up den hüdigen Dag unner brocht. De Bregenpann is in dat 13. Johrhunnert na Frankfort an'n Main kamen un hett dor ehren Platz funnen in den Kaiserdom St. Bartholomäus.
Ikonographie un Kennteken
[ännern | Bornkood ännern]Vun den Anfang vun dat 13. Johrhunnert af an warrt Bartholomäus in allerhand Biller wiest mit Mest un aftagen Huut. In Michelangelo sien Jüngst Gericht in de Sixtinsche Kapell in Rom schall dat Anlaat up de Huut, de Bartholomäus dregen deit, Michelangelo sien Sülvstportrait ween.
Denkeldage
[ännern | Bornkood ännern]- kathoolsch: 24. August
- evangeelsch: 24. August
- anglikaansch: 24. August
- orthodox: 11. Juni
Wo he de Oorts- un Schutzhilligen is
[ännern | Bornkood ännern]Karken unner sien Naam gifft dat in Sankt Bartholomä, San Bartolomeo, Saint-Barthélemy, Saint Bartholomew. As Schutzpatroon gellt he in de Städer
- Altenburg, Frankfurt an'n Main, Pilsen, Maastricht, Kettig, Wiehe, Görwihl, Büchenau, Markranstädt;
- up de Lipaarschen Inseln (bi Sizilien);
- for de Berope Barglüde, Gipser, Buern, Wienbuern, Hirten, Ledderarbeiders, Garvers, Saddelmakers, Schohmakers, Sniederslüde, Bäckerlüde, Slachters, Bookbinners un Ööl- un Kääshökers (in Florenz).
De Kathoolschen meent, he hölp woll gegen Huutkrankheiten, un wenn een dat mit de Nerven nich goot geiht un wenn een dat Rieten hett.
Kiek ok bi
[ännern | Bornkood ännern]- Bartholomäusevangelium
- Bartholomäusnacht (As in Paris an'n 24. August 1572 Dusende vun Hugenotten an'e Sieten maakt wurrn sünd)
Weblenken
[ännern | Bornkood ännern]![](http://upload.wikimedia.org/wikipedia/commons/thumb/4/4a/Commons-logo.svg/20px-Commons-logo.svg.png)