Roskilde-Festival
Dat Roskilde-Festival is en Musikfestival, dat elk Johr Enn Juni/Anfang Juli in de däänsche Stadt Roskilde afhollen warrt. Dat höört to de groten Musikfestivals in Europa. Üm un bi 3000 Künstlers un 170 Bands doot optreden un bet to 115.000 Lüüd köönt op söss Böhnen un 126 Hektar verschedene Musik höörn.
Wat dat Festival an Gewinn maken deit, dat geiht allens an gemeennüttige Organisatschonen so as amnesty international, Dokters ahn Grenzen, Human Rights Watch un annere.
Historie
[ännern | Bornkood ännern]Dat eerste Roskilde-Festival hett dat in’n August 1971 geven. Dat harr do noch den Naam Sound Festival. En Musikagent ut Kopenhagen un ene Grupp ut Gymnasiasten ut Roskilde hebbt dat op de Been stellt. Dat geev ene Böhn op de bi 20 Bands ut de Rebeden Folk, Jazz, Rock un Pop optreden sünd. Dat güng över twee Daag un harr so 10.000 Besökers. Vun wegen den groten Opwand wullen de Gymnasiasten dat dat twete Johr nich wedder maken. Dat Festival wullen de Lüüd aver geern wedder hebben. De Stadtraat vun Roskilde hett de Organisatschoon „Foreningen Roskildefonden“ fraagt, wat se nich dat Festival övernehmen wullen. Dor is sogor extra en Aktiengesellschop för grünnt worrn. 1972 harr dat Festival denn den Naam Fantasy. Dat güng nu över dree Daag un harr bi 15.000 Besökers.
1978 is dat Festival denn wat grötter worrn. De Veranstalters hebbt vun de Firma Revelation Staging de Orange Canopy Scene köfft, wat vun dor an dat Logo vun dat Festival weer. De Orange Canopy Scene is en groot orange Teltplaan, wat al de Rolling Stones op ehre Europatournee as Logo bruukt harrn. Dat geev nu ok dree Böhnen un nu kemen al 36.500 Besökers.
Mit de Tiet weer dat Festival denn ganz bilütten jümmer grötter. In de Johren 1990 müssen se denn de Tall vun Lüüd sogor begrenzen, de na dat Festival kamen dröffen. Tohoop mit Helpers weer de Tall Lüüd nu op üm un bi 125.000 anstegen. 1994 hebbt se dat Stück Land op dat dat Festival weer en ganz Stück vergröttert, so dat dat op twee Sieden vun en Bahnlien leeg un vun 1996 af an geev dat denn en egen Bahnhoff för dat Festival.
2000 denn geev dat an’n 30. Juni bi den Optritt vun Pearl Jam en Unglück. Negen Minschen sünd doodbleven, as de Minschenmass so na vörn drücken dee, dat de Lüüd vörn keen Platz mehr harrn un dooddrückt worrn sünd. Dat Festival güng aver wieder un dat geev ene Gedenkzeremonie mit den Bischop Jan Lindhardt vör de grote Böhn. Later hebbt se dor noch en Gedenksteen mit negen Barken rundrüm opstellt.
In de Johren 2000 hebbt de Veranstalters faststellt, dat de Lüüd al jümmer fröher anreisen doot. Dorüm warrt nu al veer Daag vörher opmaakt un dat gifft in disse Tiet verschedene Veranstaltungen. Ok ene Skatebahn, en Kino un en Baad- un Angelsee hebbt se opboot, de Lüüd wat to beden.
Festivals in verleden Johren
[ännern | Bornkood ännern]Böhnen
[ännern | Bornkood ännern]
Dat Festival hett vundaag söss Böhnen.
| Naam | Platz för woveel Lüüd | Musikgenre |
|---|---|---|
| Orange Scene | 60.000 | Rock, Pop, Heavy Metal |
| Roskilde Arena | 17.000 | Allens |
| Roskilde Odeon | 5.000 | Hard Rock, Alternative Rock |
| Roskilde Cosmopol | 6.000 | elektroonsche Musik, HipHop, R’n’B |
| Roskilde Astoria | ? | Club-Musik |
| Roskilde Pavilion | 2.000 | Rock |
Weblenken
[ännern | Bornkood ännern]- Websteed vun dat Festival (engelsch, däänsch)