Nuuk

Nuuk (däänsch Godthåb) is de Hööftstadt vun Gröönland.

Luftbild vun Nuuk

Nuuk liggt üm un bi 250 Kilometer süden den Polarkreis un hett 18.326 Inwahner (Stand:1. Januar 2020). Dormit is se de wietut gröttste Stadt vun Gröönland. De Golfstroom geiht in de Neeg an Gröönland langs, so dat in’n Winter dat Meer in’t subpolare Klima nich infreert. Bi de Weertschop is vör allen de Fischfang vun Bedüden, besünners op Granaat un Butt. Nuuk is hüüt ok en Teel för Touristen, de mit Flegers oder op Krüüzfohrten na Gröönland kaamt. Ok dat gröönlandsche Natschonalmuseum is in Nuuk.

1721 keem de norweegsche Missionar Hans Egede na Nuuk üm de twölf Inuit-Familien, de dor leven, to bekehren. De Oort weer de Platz, an den sik de Inuit ut dat Rebeet in’n Sommer drepen. Egede sien Huus ut de Tiet is hüüt de Seet vun’e gröönlandsche Regeren.

Partnerstäder

Nuuk hett Cuxhoben as Partnerstadt.

Weblenken

Nuuk. Mehr Biller, Videos oder Audiodateien to’t Thema gifft dat bi Wikimedia Commons.

• Websteed vun Nuuk (däänsch)