Freddie Mercury
![](http://upload.wikimedia.org/wikipedia/commons/thumb/a/ac/FreddieMercuryNov1977.jpg/220px-FreddieMercuryNov1977.jpg)
Freddie Mercury (geboaren as Farrokh Bulsara; 5. september 1946 – 24. november 1991) was nen britsken sanger en leedkesskryver. Hee wör wearldwyd bekend as de sanger van de rockband Queen. Hee wördt eseen as eyne van de grötste sangers in de geskedenisse van rockmusik. Et hülp dat hee up et podium flink tekeyr güng un en sangbereik had van veer oktaven. Mercury maken der en heyl spül van up et podium, wårmed as hee grouten invlood had up wo as de wearld når rocksangers keak. Ouk drükkeden hee dårmed de band Queen ne bepålde kante uut.
Mercury wör geboaren in en persisk-indiaansk gesin up et tansaniaanske Zanzibar in 1946. Vanaf syn achtste jår sat hee up engelske kostskolen in India en küm weader når Zanzibar do as he klår was med de middelbåre skole. In 1964 must hee med syne family vlüchten vöär de Revoluty van Zanzibar en küm in et engelske Middlesex torechte. Underwyl leyrden hee al jåren musikmaken en skryven. In 1970 förmden hee de band Queen, med gitaarspöäler Brian May un drummer Roger Taylor. Van syne hande kummet heyl wat groute hits, sou as "Killer Queen", "Bohemian Rhapsody", "Somebody to Love", "We Are the Champions", "Don't Stop Me Now" un "Crazy Little Thing Called Love".
Up et podium was hee ne uutbündige persöönlikheid un hee spröäk et publik vake direkt an, sou as to seen was by et Live Aid-koncert van 1985. Nöäst syn wark med Queen was hee ouk selvstandig gangs as musikproducent un gastmusikant vöär andere artisten.
In 1987 wör HIV/AIDS evünden by Mercury. Dat makeden hee pas in 1991 bekend, nen dag vöärdat hee uut de tyd küm. Hee wör 45 jår old. In de lätste jåren vöär synen doud bleav hee noch nen set upneamen un uptreaden med Queen. Nå synen doud was hee noch to höyren up öär lätste album Made in Heaven (1995). In 1992 hölden se in syne någedachtenis en koncert in et Wembley-stadion. De upbrengsten güngen når undersöök un meyr bekendheid vöär de seekde. Syne loupbane med Queen wör verfilmed in 2018, in den biografisken film Bohemian Rhapsody.
As lid van Queen wör Mercury nå synen doud upenöämen in de Rock and Roll Hall of Fame van 2001, de Songwriters Hall of Fame in 2003 un de Music Hall of Fame van et VK in 2004. In 1990 kreagen hee en de andere Queenleaden nen Brit Award vöär Gewaldige Bydrage an de Britske Musik. Eyn jår nå syn verskeiden kreag hee den noch es individueel. In 2005 wör Queen underskeiden med nen Ivor Novello Award vöär Outstanding Song Collection van de British Academy of Songwriters, Composers, and Authors. In 2002 wör Mercury ne 58. plaatse toweysen in ne BBC-stemrunde vöär de 100 Grötste Britten.