Bargen (Noorwegen)
![](http://upload.wikimedia.org/wikipedia/commons/thumb/8/84/Bergen_Hanseviertel_II.jpg/261px-Bergen_Hanseviertel_II.jpg)
Bargen is ne stad en gemeente in Hordalaand in et zuudwesten van Noorweagen. Et wörd wal es de stad tusken de zeuwen bargen neumd. Bargen wörd zeen as de heuwdstad van et Vestlandet (Westland). Bargen wör grondvest deur Olav Kyrre in 1070, met as naam Bjørgvin, wat "de greune engte tusken de bargen" betekent.
Bargen hef van anvang an ne leidende internasjonale handels- en zeevoartsstad west. In de golden tied van Noorweagen was et zelfs de heuwdstad van et land. Et was van ongevear 1600 töt 1830 Noorweagens grötste stad. Rechtevoort is et de tweedegrötste stad. Bergen was vanof 1600 de administrasiezettel en oetvoorhawen veur et Bargenhoes-len, ne besteurlike landsindeling dee et Westland en Noord-Noorweagen umvatten. Et stichtambt Bargenhoes in Bargen was et heuwdambt veur et Noordlaandse ambt töt an 1685, toen as det oawergung noar Trondhjems stichtambt. In 1763 wör et Noordelike Bargenhoesambt (later Sogn en Fjordane) ofsplitst as egen onderambt. Et oawerblievende Bargenhoesambt wör Søndre Bergenhusambt neumd in 1766 (later Hordaland). In 1831 wör et Bargenambt oetsplitst van et Søndre Bargenhoesambt. In 1972 wörden de gemeentes Arna, Fana, Laksevåg en Åsane inliefd bie de gemeente Bargen, terwiel as de provinsie Bargen deel wör van Hordaland. De gemeente Bargen gung veurbie de 275.000 inwonners an et eande van 2014.
In Bargen zit et Proveensiebesteur van Hordaland, de Gulating volksrechtbanke, Bisdom Bjørgvin, et Viskeriejebesteur, de Konkurrensieroad, et zeewezen en et Noorse internasjonale skeepsregister. Doarnöast bint der nog nen rits zwoare spöllers in de kultuur, ekonomie, gezondheid, onderzeuk en arbeid.
Bargen is et middelpunt veur de marine en skeepvoart- en petröllierelateerde onderzeuksinstellingen en ettensindustrie, dee as bie de volledigste en ontwikkelde van de wearld heurt. Bargen hef ne starke en völziedige ettensindustrie en banke- en verzekeringswezen, bouw en anleg, handel- en deenstverlening, hoogtechnologie, massamedia, leavensmiddelindustrie, toerismebranche en vervoor. Bargen hef ene van de drokste vlochthawens van et Noorden en ene van de drokstbevoarene en bezöchte hawens van Europa. Et is et oetgangspunt veur de Hurtigruten en de Bergensbanen.
De Hanzekade (Bryggen i Bergen) steet op de wereldarfgoodlieste van UNESCO en dut der bod van at Bargen vrogger bie et Hanzeverbond was. Et woapen van Bargen hef een borg met dree toorns op zeuwen bargen. Et woapen lik völ op det van de Duutse steaden Hamborg en Lubekke, dee ook bie Hanze warren.
Foto-oetstallige
[bewark | bronkode bewarken]-
Stikke ströatjes in de oolde stad
-
Ne plaatselike tradisie: et buekorps
-
De Hanzekade in Bargen
-
Et laandhoes Gamlehaugen in Bargen
-
De buurte Marken