Nicolau Copérnico
![](http://upload.wikimedia.org/wikipedia/commons/thumb/2/28/Copernicus.jpg/220px-Copernicus.jpg)
Nicolau Copérnico (an polaco: Mikołaj Kopernik; an lhatin: Nicolaus Copernicus; Toruń, 19 de Febreiro de 1473 — Frauenburgo, 24 de Maio de 1543) fui un astrónomo i matemático polaco que zambolbiu la teorie heliocéntrica de l Sistema Solar. Fui tamien cónego de la Eigreija Católica, gobernador i admenistrador, jurista, astrólogo i médico.
Sue teorie de l Heiliocentrismo, que puso l Sol cumo l centro de l Sistema Solar, cuntrariando l'anton bigente teorie geocéntrica (que cunsidraba, la Tierra cumo l centro), ye tenida cumo ua de las mais amportantes heipóteses científicas de todos ls tiempos, tenendo custituído l punto de partida de la astronomie moderna.
L'ourige de la teorie heiliocéntrica
[eiditar | eiditar código-fuonte]![](http://upload.wikimedia.org/wikipedia/commons/thumb/f/fb/CopernicusHouse.jpg/220px-CopernicusHouse.jpg)
Na teorie de Copérnico, la Tierra mobe-se al alredror de l Sol. Mas, ls sous dados fúrun corregidos pulas ouserbaçones de Tycho Brahe. Cun base neilhas i an sous própios calclos, Johannes Kepler reformou radicalmente l modelo copernicano i chegou a ua çcriçon rialista de l sistema solar. L mobimiento de la Tierra era negado puls partidairos de Aristóteles i Ptolomeu. Eilhes sustentában que, causo la Tierra se mobisse, las nubres, ls páixaros ne l'aire ó ls oubjetos an queda lhibre serien deixados pa trás. Galileu cumbatiu essa eideia, afirmando que, se ua piedra fusse abandonada de l'alto de l mastro dun nabio, un ouserbador a bordo siempre la berie caer an lhinha reta, na bertical. I, baseado nisso, nunca poderie dezir se l'ambarcaçon staba an mobimiento ó nó. Causo l barco se mobisse, mas, un ouserbador na borda berie la piedra çcrebir ua rebuolta çcendente – porque, anquanto cai, eilha acumpanha l çlocamiento hourizontal de l nabio. Tanto un ouserbador quanto l'outro custatarie que la piedra chega al cumbés eisatamente ne l mesmo lhugar: L pie de l mastro. Pus eilha nun ye deixada para trás quando l barco se çloca. De la mesma forma, se fusse abandonada de l'alto dua torre, la piedra cairie siempre al pie de la mesma – quier la Tierra se muoba ó nó.
L cardeal S. Roberto Francisco Belarmino persidiu l tribunal que proibiu la teorie copernicana. Culto i moderado, el cunseguiu poupar Galileu. Stimulado pul nuobo papa Ourbano VIII, sou grande admirador, l cientista boltou a la carga. Mas l Papa sentiu-se redicularizado nun lhibro de Galileu. I esso motibou sue cundanaçon.
L percurso de las balas de canhon i la queda de ls cuorpos tamien fúrun studadas por Galileu. El demunstrou que la rebuolta çcrita puls projételes ye un arco de parábola i que ls cuorpos caen an mobimiento ouniformemente acelarado. Segundo las biografies remanseadas de l cientista, el tenerie rializado ua spriéncia que çmoralizou defenitibamente la física aristotélica. Chubindo al alto de la torre de Pisa, deixou caer, ne l mesmo anstante, dous cuorpos sféricos de belumes i massas defrentes: ua bala de mosquete i outra de canhon. Cuntra las spetatibas de ls académicos aristotélicos, qu'apostában na bitória de la bala de canhon i na derrota de l cientista, ls cuorpos chegórun rigorosamente a la par al suolo.
L storiador de la ciéncia Alexandre Koyré demunstrou que, assi cumo muitos outros mitos qu'anfeitan ls relatos subre la bida de Galileu, la famosa spriéncia de Pisa nunca acunteciu. Eilha fui, na berdade, un spriéncia eidealizada, que l cientista rializou ne l recesso de la sue cuncéncia, i nó un ruidoso spetaclo público. Sabie-se, zde l final de la Eidade Média, que la belocidade de ls cuorpos oumentaba a la medida qu'eilhes caían. I tamien se conhecie la lhei matemática que çcribe ls mobimientos ouniformemente acelarados. L mérito de Galileu fui juntar las dues cousas i amostrar que, çcartada la rejisténcia de l'aire, todos ls oubjetos caien cula mesma acelaraçon.
La teorie de Copérnico
[eiditar | eiditar código-fuonte]![](http://upload.wikimedia.org/wikipedia/commons/thumb/f/f2/Nikolaus_Kopernikus.jpg/200px-Nikolaus_Kopernikus.jpg)
La teorie de l modelo heiliocéntrico, la maior teorie de Copérnico, fui publicada an sou lhibro, De revolutionibus orbium coelestium ("De la reboluçon de sferas celhestres"), durante l'anho de sue muorte, 1543. Anque desso, el yá habie zambolbido sue teorie alguas décadas antes.
L lhibro marcou l'ampeço dua mudança dun ouniberso geocéntrico, ó antropocéntrico, cula Tierra an sou centro. Copérnico acraditaba que la Tierra era solo mais un planeta que cuncluía ua órbita al alredror dun sol fixo todo l anho i que rodaba al alredror de sou eixe to die. El chegou a essa correta splicaçon de l coincimiento d'outros planetas i splicou l'ourige de ls eiquinócios corretamente, atrabeç de la debagarosa mudança de la posiçon de l'eixe rotacional de la Tierra. El tamien dou ua clara splicaçon de la causa de las estaçones : L'eixe de rotaçon de a tierra nun ye perpendicular al plano de sue órbita.
An sue teorie, Copérnico çcrebia mais circlos, ls quales tenien ls mesmos centros, de l que la teorie de Ptolomeu (modelo geocéntrico). Anque Copérnico poner l Sol cumo centro de las sferas celhestriales, el nun fizo de l Sol l centro de l'ouniberso, mas acerca del.
De l punto de bista spurmental, l sistema de Copérnico nun era melhor de l que l de Ptolomeu. I Copérnico sabie desso, i nun apersentou nanhue proba ouserbacional an sou manuscrito, fundamentando-se an argumientos subre qual serie l sistema mais cumpleto i eilegante.
De la sue publicaçon, até aprossimadamente 1700, poucos astrónomos fúrun cumbencidos pul sistema de Copérnico, anque de la grande circulaçon de sou lhibro (aprossimadamente 500 cópias de la purmeira i segunda eidiçones, l que ye ua cantidade grande pa ls padrones científicos de la época). Antretanto, muitos astrónomos aceitórun partes de sue teorie, i sou modelo anfluenciou muitos cientistas renomados que benerien a fazer parte de la stória, cumo Galileu i Kepler, que cunseguírun assimilar la teorie de Copérnico i melhorá-la. Las ouserbaçones de Galileu de las fases de Bénus porduzírun la purmeira eibidéncia ouserbacional de la teorie de Copérnico. Para alhá desso, las ouserbaçones de Galileu de las lhunas de Júpiter probórun que l sistema solar cuntén cuorpos que nun orbitában la Tierra.
L sistema de Copérnico puode ser resumido an alguas proposiçones, assi cumo fui l própio Copérnico a lhistá-las nua síntese de sue obra mestra, que fui ancuntrada i publicada an 1878.
Las percipales partes de la teorie de Copérnico son:
- Ls mobimientos de ls astros son ouniformes, eiternos, circulares ó ua cumposiçon de bários circlos (eipiciclos).
- L centro de l'ouniberso ye acerca de l Sol.
- Acerca de l Sol, an orde, stan Mercúrio, Bénus, Tierra, Lhuna, Marte, Júpiter, Saturno, i las streilhas fixas.
- La Tierra ten trés mobimientos: rotaçon diária, buolta anual, i anclinaçon anual de sou eixe.
- L mobimiento retrógrado de ls planetas ye splicado pul mobimiento de la Tierra.
- La çtáncia de la Tierra al Sol ye pequeinha se cumparada a la çtáncia a las streilhas.
Se essas perposiçones éran rebolucionárias ó cunserbadoras era un tópico mui çcutido durante l bigésimo seclo. Thomas Kuhn argumentou que Copérnico solo trasferiu alguas propiadades, antes atribuídas la Tierra, pa las funçones astronómicas de l Sol. Outros storiadores, por outro lhado, argumentórun a Kuhn, qu'el subestimou quanto rebolucionárias éran las teories de Copérnico, i anfatizórun la deficuldade que Copérnico deberie tener an demudar la teorie astronómica de la época, outelizando solo ua geometrie simples, sendo qu'el nun tenie nanhue eibidéncia spurmental.
L modelo Heiliocéntrico
[eiditar | eiditar código-fuonte]![](http://upload.wikimedia.org/wikipedia/commons/thumb/9/97/Copernicus-Boissard.gif/250px-Copernicus-Boissard.gif)
![](http://upload.wikimedia.org/wikipedia/commons/thumb/3/3a/Magnifying_glass_01.svg/17px-Magnifying_glass_01.svg.png)
Ls filósofos de l seclo XV aceitában l geocentrismo cumo fura struturado por Aristóteles i Ptolomeu. Esse sistema cosmológico afirmaba (corretamente) que la Tierra era sférica, mas tamien afirmaba (mal) que la Tierra starie parada ne l centro de l Ouniberso anquanto ls cuorpos celhestres ourbitában an circlos cuncéntricos al sou redror. Essa bison geocéntrica tradecional fui abalada por Copérnico an 1537, quando este ampeçou a dibulgar un modelo cosmológico an que ls cuorpos celhestres rodában al alredror de l Sol, i nun de la Tierra. Essa era ua teorie de tal forma rebolucionária que Copérnico screbiu ne l sou De revolutionibus orbium coelestium (de l lhatin: "De las reboluçones de las sferas celhestres"): "quando dediquei algun tiempo a l'eideia, l miu receio de ser çprezado pula sue nobidade i l'aparente contra-senso quaije me fizo lhargar l'obra feita".
Naquel tiempo la Eigreija Católica aceitaba eissencialmente l geocentrismo aristotélico, (anque la sfericidade de la Tierra stubisse an aparente cuntradiçon cun anterpretaçones lhiterales d'alguas passaiges bíblicas). Al cuntrairo de l que se poderie eimaginar, durante la bida de Copérnico nun se ancóntran críticas sistemáticas al modelo heiliocéntrico por parte de l clero católico. De fato, nembros amportantes de la cúpula de la Eigreija quedórun positibamente ampressionados pula nuoba perpuosta i ansistírun para qu'essas eideias fússen mais zambolbidas. Assi i todo, la defesa, quaije un seclo depuis, por Galileu Galilei, de la teorie heiliocéntrica bai deparar-se cun grandes rejisténcias na Eigreija Católica.
Cumo Copérnico tenie por base solo sues ouserbaçones de ls astros a uolho znudo i nun tenie possiblidade de demunstraçon de la sue heipótese, muitos homes de ciéncia recebírun cun zcrédito las sues eideias. Anque desso, l trabalho de Copérnico marcou l'ampeço de dues grandes mudanças de perspetiba. La purmeira, diç respeito a la scala de grandeza de l Ouniberso: abanços seguintes na astronomie demunstrórun que l'ouniberso era mui mais basto de l que supunian quier la cosmologie aristotélica quier l própio modelo copernicano; la segunda diç respeito a la queda de ls grabes. La splicaçon aristotélica dezie que la Tierra era l centro de l'ouniberso i antoce, l lhugar natural de todas las cousas. Na teorie heiliocéntrica, assi i todo, la Tierra perdie esse statuto, l qu'eisigiu ua rebison de las lheis que gobernában la queda de ls cuorpos, i mais tarde, cunduziu Isaac Newton a formular la lhei de la grabitaçon ounibersal.
Cronologie
[eiditar | eiditar código-fuonte]- 1473 – 19 de Febreiro – nace Nicolau Copérnico, an Thorn, Prússia Rial.
- 1483 – Muorre l pai de Copérnico que bai ser criado pul tio materno Lucas Watzenrode.
- 1489 – Lhucas Watzenrode, tio de Copernico ye eileito Bispo de Warmia.
- 1491 – Copérnico bai pa la Ounibersidade de Cracóbia.
- 1497 – Copérnico bai pa la Eitália, studar Dreito Canónico na Ounibersidade de Bolonha.
- 1497 – 9 de Márcio – Copérnico registra sue purmeira ouserbaçon: un eiclipse de la streilha Aldebarana.
- 1500 – Copérnico biaja para Roma.
- 1503 – Copérnico recibe sou diploma an Dreito Canónico, an Ferrara.
- 1503 – Copérnico retorna pa la Prússia Rial.
- 1504 – Ye eileito Cónego an Frauenburgo.
- 1512 – Muorre l tio de Copérnico, bispo Lucas Watzenrode que l'eiducou.
- 1517 – 31 de Outubre – Martico Lhutero publica las 95 teses de sue Reforma.
- 1534 – Alessandro Farnese ye eileito papa sob l nome de Paulo III.
- 1539 – Rheticus torna-se deciplo de Copérnico, an Frauenburgo.
- 1542 – L Papa Paulo III restablece la Anquesiçon.
- 1543 – Rheticus, an nome de Copérnico, publica l'obra "De revolutionibus orbium coelestium" an Nuremberga.
- 1543 – 24 de Maio – Muorre Copérnico, an Frauenburgo.
- 1545 – L Papa Paulo III cumboca l Cuncílio de Trento.
Lhigaçones sternas
[eiditar | eiditar código-fuonte]- Stanford Encyclopedia of Philosophy ()
- Biografie an Anciclopédia Católica ()
- Copérnico ne l Museu de Frauenburgo/Frombork ()
- Copérnico no Museu de Thorn/Torun () [1]