Ciéncia de la Tierra

Modelo:Portal-cienciasterra Ciéncias de la Tierra (ó Geociéncias), ye la palabra aplicada a las ciéncias relacionadas cul studo de l planeta Tierra. Eisísten abordaiges reducionistas i houlísticas relatibamente a las ciéncias de la Tierra. Las percipales deciplinas storicamente aplícan coincimientos de física, geografie, matemática, química i biologie de modo a custruir un coincimiento cantitatibo de las percipales árias ó sferas de l sistema Tierra.

Las sferas de la Tierra

Geologie - studa la custituiçon i la stória de l zambolbimiento de las partes rochosas de la costra (ó litosfera). Cumo subdeciplinas percipales tenemos: la mineralogie i petrologie, geoquímica, geomorfologie, paleontologie, stratigrafie i sedimentologie.
Geofísica i Geodésia (fundidas na UIGG) stúdan la forma de la Tierra, la sue reaçon la fuorças i ls sous campos potenciales (magnético i grabítico) . Ls geofísicos stúdan tamien l núcleo i l manto de la Tierra i tamien ls depósitos minerales; ls geodesistas l mobimiento de las streilhas i satélites.
Ciéncias de l tierra - stúdan la camada mais de fuora de la costra terrestre que ye submetida a porcessos que lieban a la formaçon de tierra (ó pedosfera). Las subdeciplinas percipales son la pedologie i la eidafologie.
Ouceanografie i Hidrologie (ancluindo la Limnologie) - çcríben ls domínios de la auga salada i de la auga doce respetibamente (que cumpónen la heidrosfera). Las percipales deciplinas son la heidrogeologie i la ouceanografie biológica, física i química. Na strutura de la UIGG stan ligadas a la geofísica, tirando las specialidades químicas i biológicas.
Glaciologie - trata de l studo de las zonas de la Tierra cubiertas por carambelo (ó criosfera).
Ciéncias de la Atmosfera - stúdan las zonas gasosas de la Tierra (atmosfera) que quédan antre la superfíce i la sosfera. Las subdeciplinas percipales son la meteorologie, climatologie i aironomie.

Inda assi, por bias de las muitas anteraçones antre las bárias sferas muitas deciplinas modernas ténen ua abordaige antredeceplinar, nun ancaixando bien neste squema. Nin mesmo las specialidades arriba çcritas funciónan de forma eisolada. Por eisemplo, para antender la circulaçon ouceánica ténen que ser cunsidradas las anteraçones antre ouceano, atmosfera i la própia rotaçon de la Tierra.

Campos de studo antredeceplinares

Biogeoquímica - studa l mobimiento de l eilemientos antre las bárias sferas, por antermédio de porcessos biológicos i geológicos i, subretodo, la sue çtrebuiçon i ls sous fluxos antre reserbatórios.
Mineralogie i Física de ls minerales - tratan de l minerales que custitúen las peinhas a la scala atómica, cumo parte antegrante de ls sistemas geológicos i cada beç más tenendo an bista las sues aplicaçones tecnológicas (por eisemplo cumo catalisadores ó aporbeitando las sues propiadades (ferroeilétricas) ; nesta redadeira ária acuntece ua grande subreposiçon cula física de l stado sólido, química de l cristales i ciéncia de ls materiales.
Paleoceanografie i Paleoclimatologie - usan las propiadades de l sedimentos, amostras de carambelo antigo i de materiales biológicos para saber las caratelísticas de ls ouceanos, clima i atmosfera ne l passado.
Meteorologie - çcribe, splica i prebei l tiempo assentando percipalmente na anteraçon antre ouceanos i atmosfera.
Climatologie - çcribe i splica l clima an termos de las anteracçones antre las bárias sferas (litosfera, pedosfera, heidrosfera, atmosfera i biosfera).
Química atmosférica - çcribe, splica i prebei la cumposiçon química de la atmosfera tenendo an cunta subretodo las anteraçones antre la atmosfera, ouceanos, biosfera i eifeitos porduzidos pul Home.

Ciéncia de l sistema terrestre

Atualmente muitos cientistas ampéçan a ousar ua abordaige coincida cumo ciéncia de l sistema terrestre que trata la própia Tierra cumo un sistema que eibolui cumo resultado de las bárias anteraçones antre ls sistemas que custitúen l sistema Tierra. Esta abordaige, deixada pul uso de modelos matemáticos cumo heipóteses testadas por dados de satélite i arrecolhidos por nabius, dá als cientistas ua capacidade cada beç mais grande de splicar l cumportamiento passado i possible cumportamiento feturo de l sistema Tierra.

Modelos matemáticos cumplexos que percúran modelar defrentes cumponientes de l sistema Tierra i las relaçones antre eilhes son chamados por modelos de l sistema Tierra. Muitos deilhes asséntan an modelos climáticos globales i anclúen submodelos para ouceanos, atmosfera, biosfera i outras partes de l sistema Tierra. Estas anteraçones ténen amportança quando un tenta antender las possibles alteraçones al largo de décadas ó seclos i até an eras mais largas.

Metodologie

Cumo outros cientistas, ls cientistas de la Tierra outelízan l método científico: fazer heipóteses apuis de la ouserbaçon i recuolha de dados subre fenómenos naturales i depuis fazer l teste dessas heipóteses. Nas ciéncias de la Tierra, ls dados arrecolhidos ténen un papel fundamental seia ne l teste seia quando se pónen las heipóteses.