ടയർ
![](http://upload.wikimedia.org/wikipedia/commons/thumb/c/c6/Tire_failure_-_steel_ply.jpg/300px-Tire_failure_-_steel_ply.jpg)
വാഹനങ്ങളുടെ ചക്രത്തിലെ റിമ്മിനു ചുറ്റുമായി ഘടിപ്പിക്കുന്ന തുടർവലയങ്ങളെ ടയർ എന്ന പേരിൽ അറിയപ്പെടുന്നു. വാഹനത്തിന്റെ അച്ചുതണ്ടിൽ അനുഭവപ്പെടുന്ന ഭാരത്തെ ഭൂമിയിലേക്ക് പകരുന്നതും വാഹന യന്ത്രത്തിന്റെ ചുഴറ്റുബലത്തെയും ബ്രേക്ക് ചെയ്യുമ്പോഴുണ്ടാകുന്ന ബലത്തേയും റോഡിലേക്ക് പകരുന്നതും ടയർ ആണ്.ഏതൊരു വേഗതയിലും, പ്രതല അവസ്ഥകളിലും, യാത്രാ ദിശകളിലും വാഹനത്തിനെയും അത് ചലിക്കുന്ന പ്രതലത്തെയും ബന്ധപ്പെടുത്തി നിർത്തുന്ന മാധ്യമമെന്ന നിലയിൽ വാഹനത്തിന്റെ സുരക്ഷയിൽ അത്യന്തം പ്രാധാന്യമാണ് ടയറിനുള്ളത്.
പ്രധാനമായി രണ്ടു തരം ടയറുകൾ ലഭ്യമാണ്; ലോഹം കൊണ്ട് നിർമ്മിച്ചവയും റബർ കൊണ്ടു നിർമ്മിച്ചവയും. മിനുസമുള്ള ഉരുക്കു പാളത്തിലൂടെ സഞ്ചരിക്കുന്ന തീവണ്ടി ബോഗിയിലെ ചക്രത്തിലുള്ള ടയർ ഇരുമ്പോ ഉരുക്കോ കൊണ്ട് നിർമ്മിച്ചവയാണ്. ചക്രത്തിന്റെ ഉരുളൽ പ്രതിരോധകത കുറഞ്ഞിരിക്കാൻ സഹായിക്കുന്നവയാണ് ഈ ലോഹ ടയറുകൾ.
ചക്രത്തിന്റെ പുറത്ത് ഇറുകി പിടിച്ചിരിക്കുന്ന തരത്തിൽ ഉറപ്പിക്കാവുന്ന ഒരുതരം പരന്ന ലോഹ വളയ രൂപമാണ് ലോഹ ടയറിനുള്ളത്. കുറഞ്ഞ ഉരുളൻ പ്രതിരോധകത, ഈടുറപ്പ്, ഉയർന്ന തേയ്മാനരോധന ശേഷി മുതലായവയാണ് ലോഹ ടയറിന്റെ പ്രധാന ഗുണങ്ങൾ.
പ്രത്യേക പഥത്തിലൂടെയല്ലാതെ സഞ്ചരിക്കേണ്ട വാഹനങ്ങളായ ഓട്ടോമൊബൈൽ, വിമാനം, സൈക്കിൾ എന്നിവയ്ക്ക് തറയിലൂടെ സുഗമമായി സഞ്ചരിക്കുന്നതിന് ഉയർന്ന തോതിലുള്ള ഘർഷണം ലഭിക്കേണ്ടതുണ്ട്. ഉയർന്ന ഘർഷണം നൽകുന്നതോടൊപ്പം ചെറിയ രീതിയിലുള്ള ആഘാതങ്ങളേയും അതിജീവിക്കാനാവുന്ന റബർ ടയറുകളാണ് ഇത്തരം വാഹനങ്ങളിലെ ചക്രങ്ങളിൽ ഉപയോഗിക്കുന്നത്.
റബർ ടയറുകൾ രണ്ടു രീതിയിൽ നിർമ്മിക്കുന്നുണ്ട്;
- ഖര/കുഷൻ ടയർ, (Solid tyre)
- വായു നിറയ്ക്കാവുന്ന ന്യൂമാറ്റിക് ടയർ (Pneumatic tyre).
വായു നിറച്ച ടയറിനെ മൂന്നായി തരംതിരിച്ചു നിർമ്മിക്കുന്നു;
- ബയെസ്-പ്ലൈ,
- ബയെസ്-പ്ലൈ ബെൽറ്റഡ്,
- റേഡിയൽ-പ്ലൈ ബെൽറ്റഡ് എന്നിങ്ങനെ
1881-ൽ ലണ്ടനിലെ ഹാൻസം കാബുകളിലെ ചക്രങ്ങളിലാണ് ഖര ടയർ ആദ്യമായി ഉപയോഗിച്ചു പരീക്ഷിച്ചത്. തുടർന്ന് റോഡിലോടുന്ന പല വാഹനങ്ങളുടെ ചക്രങ്ങളിലും ഖര ടയറുകൾ ഉപയോഗിച്ചിരുന്നെങ്കിലും റോഡിന്റെ പ്രതലത്തിന് ഇവ ക്ഷതമേൽപ്പിക്കുന്നു എന്ന് മനസ്സിലായതോടെ ഹൈവേകളിൽ ഖര ടയറുകൾ ഘടിപ്പിച്ച ചക്രങ്ങളുള്ള വാഹനങ്ങൾ നിരോധിക്കപ്പെട്ടു. തന്മൂലം ക്രമേണ ഹൈവേയിലോടുന്ന വലിയ ചക്രങ്ങളുള്ള വാഹനങ്ങളിൽ ഖര ടയറുകൾ ഉപയോഗിക്കാതെയായി. എങ്കിലും വ്യാവസായികാവശ്യങ്ങൾക്കായുള്ള ട്രക്ക്, ട്രാക്ക്റ്റർ, ഉന്തുവണ്ടി മുതലായ വാഹനങ്ങളുടെ ചെറിയ ചക്രങ്ങളിൽ ഖര ടയറുകൾ തുടർന്നും ഉപയോഗിച്ചു വന്നു. ഹൈഡ്രോളിക് പ്രസ്സ് ഉപയോഗിച്ചോ റിമ്മിലേക്ക് നേരിട്ട് വൾക്കനൈസ് ചെയ്തോ ആണ് ഖര ടയറുകളെ ചക്രത്തിലുറപ്പിക്കുന്നത്. ചില അവസരങ്ങളിൽ ചക്രത്തിനെ ഒരു ലോഹ പാളി കൊണ്ട് പൊതിഞ്ഞശേഷം അതിന്റെ പുറത്തും ഖര ടയർ ഉറപ്പിക്കാറുണ്ട്.
ഖര ടയറിൽ മൃദു റബർ ചേർത്ത് അതിൽ സുഷിരങ്ങളിട്ടാണ് കുഷൻ ടയർ നിർമ്മിക്കുന്നത്. ഇവയ്ക്ക് ഉയർന്ന തോതിലുള്ള ഇലാസ്തികതയും ആഘാത പ്രതിരോധകതയും ഉണ്ട്.
ടയർ എന്ന പദംകൊണ്ട് പൊതുവേ ന്യൂമാറ്റിക് ടയറാണ് വിവക്ഷിക്കപ്പെടുന്നത് എന്നതിനാൽ ഇവിടെ ന്യൂമാറ്റിക് ടയറിനെപ്പറ്റിയാണ് പ്രധാനമായും പ്രതിപാദിച്ചിരിക്കുന്നത്.
ന്യൂമാറ്റിക് ടയർ
[തിരുത്തുക]ചക്രത്തിന്റെ ആവരണം എന്നതിലുപരി സമ്മർദ്ദിത വായുവിനെ പുറത്തു പോകാതെ പിടിച്ചു നിറുത്തുവാനുള്ള ഒരു സംവിധാനം കൂടിയാണ് വായു നിറച്ച ന്യൂമാറ്റിക് ടയർ. പ്രസ്തുത ആവരണത്തിനുമുകളിൽ ഉള്ള, കനമേറിയ റബ്ബറിനാൽ നിർമ്മിതമായ ഭാഗമാണ് ട്രെഡ്. ടയർ ഉപയോഗത്തിലുള്ളപ്പോൾ റോഡുമായി സംബർക്കത്തിൽ വരുന്നത് ട്രെഡ് ആണ്.
വായു നിറച്ച ടയറിനുള്ള പ്രഥമ പേറ്റന്റ് ലഭ്യമായത് 1845-ൽ ഇംഗ്ലണ്ടിലെ റോബർട്ട് വില്യം തോംസണ്ണിനാണ്. തുകൽ കൊണ്ടു നിർമ്മിച്ച പൊള്ളയായ പ്രസ്തുത ടയറിൽ വായു നിറച്ചാണ് ഉപയോഗിച്ചിരുന്നത്. ഏരിയൽ ചക്രങ്ങൾ എന്ന പേരിലും ഇവ അറിയപ്പെട്ടിരുന്നു. അന്ന്, ഇവ ഇംഗ്ലണ്ടിലെ ബ്രോഹം (brougham) വാഹനങ്ങളിലെ ചക്രങ്ങളിലാണ് ഘടിപ്പിച്ചിരുന്നത്. 1,920 കി. മീ. ദൂരം ഇവ ഓടിയെങ്കിലും തോംസണ്ണിന്റെ തന്നെ ഖര ടയറുകൾക്കായിരുന്നു ഏറെ പ്രചാരം. തന്മൂലം ഏതാണ്ട് അര നൂറ്റാണ്ടോളം വായു നിറച്ച ടയർ വേണ്ടത്ര ശ്രദ്ധ പിടിച്ചു പറ്റിയില്ല.
![](http://upload.wikimedia.org/wikipedia/commons/thumb/f/fe/Tire_showing_tread_separation_on_automobile.jpg/250px-Tire_showing_tread_separation_on_automobile.jpg)
19-ം ശതകത്തിന്റെ അവസാനം സൈക്കിൾ പ്രചാരത്തിലായതോടെ ന്യൂമാറ്റിക് ടയറിന് വീണ്ടും പ്രചാരം സിദ്ധിച്ചു. 1888-ൽ ബെൽഫാസ്റ്റിലെ മൃഗ ഡോക്ടറായ ജോൺ ബോയ്ഡ് ഡൺലപ് സൈക്കിളിൽ ഉപയോഗിക്കാവുന്ന ന്യൂമാറ്റിക് ടയറിനുള്ള പേറ്റന്റ് കരസ്ഥമാക്കി. താമസിയാതെ ഫ്രാൻസിലെ റബർ നിർമ്മാതാക്കളായ മീഷ്ലേങ് ആൻഡ് സ് യെ ( Michelein&Cie) മോട്ടോർ വാഹന ചക്രങ്ങളിൽ ഉപയോഗിക്കാവുന്ന ന്യൂമാറ്റിക് ടയറുകളുടെ നിർമ്മാണം ആരംഭിച്ചു. വായു നിറയ്ക്കാവുന്ന ആന്തരിക ട്യൂബും അതിനെ സംരക്ഷിക്കുന്ന ഒരു ബാഹ്യ ആവരണവും ചേർന്ന തരത്തിലാണ് ന്യുമാറ്റിക് ടയർ നിർമിച്ചിരുന്നത്. ടയറിനാവശ്യമായ ഘർഷണ ബലം നൽകിയിരുന്നത് പ്രസ്തുത ബാഹ്യ ആവരണമാണ്. 1950-തുകളിൽ പഞ്ചർ സീലിങ് കണ്ടുപിടിക്കപ്പെട്ടതോടെ ആന്തരിക ട്യൂബ് സംവിധാനം അപ്രത്യക്ഷമായി. പകരം ടയറുകളെ പാളി രൂപത്തിലുള്ള നാരുകൾ കൊണ്ടു (പ്ലൈ) പൊതിഞ്ഞ് സുശക്തമാക്കി. ഇക്കാലത്തു തന്നെ ഇന്ന് പരക്കെ പ്രചാരത്തിലുള്ള റേഡിയൽ പ്ളൈ ടയറിനും മീഷ്ലേങ് രൂപം നൽകുകയുണ്ടായി.
ന്യൂമാറ്റിക് ടയറിനെ ചക്രത്തിൽ പറ്റിപ്പിടിച്ചിരിക്കാൻ സഹായിക്കുന്നത് ടയറിന്റെ അരികുകളിൽ വളയ രൂപത്തിൽ ഘടിപ്പിച്ചിട്ടുള്ള ബീഡുകളാണ്. റിമ്മിൽ കാണപ്പെടുന്ന സരണിക്കുള്ളിലൂടെ കടന്നു പോകത്തക്ക രീതിയിൽ ടയർ ഘടിപ്പിച്ച ശേഷം വായു നിറയ്ക്കുന്നു. ഇതോടെ ടയറിൽ അനുഭവപ്പെടുന്ന ഉയർന്ന വായു മർദം ടയറിനെ റിമ്മിനോട് ചേർന്നിരിക്കാൻ പ്രാപ്തമാക്കുന്നു. 200-700 കിലോ പാസ്ക്കൽ മർദ്ദം അനുഭവപ്പെടുന്ന ടയറുകൾ വരെ ഇന്ന് വിപണിയിൽ ലഭ്യമാണ്. ടയറിനു താങ്ങേണ്ടുന്ന ഭാരത്തെ അടിസ്ഥാനമാക്കിയാണ് അതിലാവശ്യമുള്ള മർദ്ദം എത്രയാവണമെന്ന് നിശ്ചയിക്കുന്നത്. മർദ്ദം ഉയരുംതോറും കൂടിയ ഭാരം താങ്ങാനുള്ള ശേഷിയും ലഭിക്കുന്നു.
ന്യൂമാറ്റിക് ടയറുകളുടെ റബർ പാളിയിൽ കാണുന്ന നാടകളാണ് (chords) ഒരു പ്രധാന ഭാഗം. റയോൺ, നൈലോൺ, പോളിയെസ്റ്റർ, ഗ്ലാസ് എന്നിവ ഉപയോഗിച്ച് ആദ്യ കാലത്ത് നാടകൾ നിർമ്മിച്ചിരുന്നു. ഇക്കാലത്താകട്ടെ, പോളിയരമിഡ് (polyaramid) എന്ന സിന്തറ്റിക് ഫൈബെറും ഉരുക്കുമാണ് ഇതിലേക്കു കൂടുതലായും പ്രയോജനപ്പെടുത്തിവരുന്നത്. ടയർ ചൂടാകുമ്പോൾ അതോടൊപ്പം വികസിക്കാത്ത ഘടന ഈ നാടകൾക്കുണ്ട്. വായു മർദ്ദത്തെ നിലനിറുത്തുക, ടയറിന്റെ വിരൂപണത്തെ ചെറുക്കുക എന്നിവയ്ക്കായിട്ടാണ് നാടകൾ റബ്ബർ പാളിയിൽ ഘടിപ്പിക്കുന്നത്. ഉയർന്ന ദൃഢത കൂടാതെ റബ്ബറുമായി നല്ല ആസംജകശേഷിയും നാടകൾക്ക് ഉണ്ടായിരിക്കണം.
ടയറിന്റെ വിവിധ ഭാഗങ്ങൾ വ്യത്യസ്ത റബർ യൗഗികങ്ങളാൽ നിർമ്മിക്കപ്പെടുന്നു. വായു എളുപ്പത്തിൽ കടന്നു പോകാതിരിക്കാനായി ഉപയോഗിക്കുന്ന ലൈനെർ നിർമ്മിക്കുന്നത് വാതക കാന്തശീലത (permeability to gas) കുറഞ്ഞ ബ്യുടൈൽ റബർ കൊണ്ടാണ്. ഉരസൽ, വഴങ്ങൽ, അന്തരീക്ഷ ഓസോൺ പ്രതിപ്രവർത്തനം എന്നിവയെ അതിജീവിക്കേണ്ട ടയറിന്റെ പാർശ്വ ഭിത്തി നിർമ്മിക്കുന്നത് ഒരു പ്രത്യേക രീതിയിലാണ്. ഉരസൽ പ്രതിരോധകത വർധിപ്പിക്കാൻ 50 ഭാഗം ബ്യുട്ടഡൈൻ റബർ, ടയറിലെ താപ പുഞ്ജനം ചെറുക്കാൻ 50 ഭാഗം പ്രകൃതിദത്ത റബർ, പ്രബലിതമാക്കാൻ 50 ഭാഗം കാർബൺ ബ്ലായ്ക്ക്, ചെറിയ അളവിലുള്ള പ്രോസസ്സിങ് എണ്ണ, പ്രതി-ഓക്സീകാരകം, സംരക്ഷണമെഴുക് എന്നിവ ചേർത്താണ് പാർശ്വ ഭിത്തി പൊതുവേ നിർമ്മിക്കുന്നത്. അപഘർഷണ പ്രതിരോധകത ഉയർന്നിരിക്കണമെന്നതിനാൽ ടയറിന്റെ ട്രെഡ്ഡിന്റെ നിർമ്മാണത്തിന് പ്രകൃതിദത്ത റബർ കുറവായി മാത്രമേ ഉപയോഗിക്കാറുള്ളു. പകരം ദൃഢതയ്ക്കും, ഉരസൽ പ്രതിരോധകത്തിനുമായി 65 ഭാഗം സ്റ്റൈറീൻ-ബ്യൂട്ടഡൈൻ റബർ, 35 ഭാഗം ബ്യൂട്ടഡൈൻ റബർ, 65 ഭാഗം കാർബൺ ബ്ലാക്ക് എന്നിവ ചേർത്താണ് ട്രെഡ് നിർമ്മിക്കുന്നത്.
ടയറിന്റെ ആയുർദൈർഘ്യം വർദ്ധിപ്പിക്കാൻ റബ്ബർ നിർമ്മാണ യൗഗികങ്ങളുടെ കൂടെ കാർബൺ ബ്ലാക്ക്, സിലിക്ക, പോളിബ്യൂട്ടഡൈൻ പോളിമർ മുതലായവ ചേർക്കുന്നു; എന്നാൽ വൾക്കനൈസിങിലൂടെയും ടയറിന്റെ ആയുർ ദൈർഘ്യം വർധിപ്പിക്കാനാകും. സൾഫറും ഇതര വസ്തുക്കളും കലർത്തിയ റബർ, ടയർ വാർപ്പിൽ (tyre mould)[1] വച്ച് 20 മിനിറ്റു നേരം 423.15 കെൽവിൻ താപ നിലയിൽ നിലനിറുത്തിയാണ് വൾക്കനൈസേഷൻ നടത്തുന്നത്. ഈ പ്രക്രിയ മൂലം റബറിലെ തന്മാത്രകളെ പരസ്പര ബന്ധിത രൂപത്തിലാക്കുവാനും റബ്ബറിന് ഇലാസ്തികത കൈവരിക്കുവാനും സാധിക്കുന്നു. ആധുനിക സാങ്കേതിക വിദ്യ അടിസ്ഥാനമാക്കി നിർമ്മിക്കപ്പെടുന്ന ന്യൂമാറ്റിക് ടയറിന്റെ പരമാവധി ആയുസ്സ് 150,000 കി. മീറ്ററാണ്.
ന്യൂമാറ്റിക് ടയറിൻ്റെ വകഭേദങ്ങൾ
[തിരുത്തുക]ടയറിനെ പല രീതിയിലും തരം തിരിക്കാറുണ്ട്. നിർമാണ രീതിയനുസരിച്ചും, ഉപയോഗ രീതിയനുസരിച്ചും ഉള്ള തരം തിരിക്കലാണ് ഏറ്റവും പ്രചാരത്തിലുള്ളത്.
നിർമാണ രീതിയനുസരിച്ചുള്ള തരം തിരിക്കൽ
[തിരുത്തുക]നിർമാണ രീതിയനുസരിച്ച് ടയറിനെ പ്രധാനമായും രണ്ടായി തരം തിരിക്കുന്നു, ബയാസ് ടയറും റേഡിയൽ ടയറും. ടയറിന്റെ നിർമാണത്തിലുപയോഗിക്കുന്ന പ്ലൈയിലെ നാരുകൾ (ply chords) ടയറിന്റെ ഉരുളൽ ദിശ (direction of rotation) യുമായുണ്ടാക്കുന്ന കോണാണ് ഈ തരം തിരിക്കലിന്റെ അടിസ്ഥാനം.
ടയറിലുപയോഗിച്ചിരിക്കുന്ന പ്ലൈയിലെ നാരുകൾ ടയറിൻ്റെ ഉരുളൽ ദിശയുമായി 90° യിൽ നിന്നും ഗണ്യമായി കുറഞ്ഞ കോണാണുണ്ടാക്കുന്നതെങ്കിൽ അത്തരം ടയറുകളെ ബയാസ് ടയർ എന്ന് തരം തിരിക്കുന്നു.
ബയാസ് ടയറിൽ, പ്ലൈ നാരുകളുണ്ടാക്കുന്ന കോണിൽ നിന്നും ഗണ്യമായി കുറഞ്ഞ കോണിലുള്ള നാരുകളുള്ള ഒന്നോ അതിലധികമോ ബെൽറ്റുകൾ പ്ലൈയുടെ മുകളിൽ ഉപയോഗിച്ചിട്ടുണ്ടെങ്കിൽ അത്തരം ടയറുകളെ ബയാസ് ബെൽറ്റട് ടയർ എന്ന് തരം തിരിക്കുന്നു.
ടയറിൻ്റെ നിർമാണത്തിലുപയോഗിക്കുന്ന പ്ലൈയിലെ നാരുകൾ ടയറിൻ്റെ ഉരുളൽ ദിശയുമായി 90° കോണിലാണെങ്കിൽ അതിനെ റേഡിയൽ ടയർ എന്ന് തരം തിരിക്കുന്നു.
ബയാസ് ടയറും റേഡിയൽ ടയറും തമ്മിലുള്ള താരതമ്യം
[തിരുത്തുക]റേഡിയൽ ടയറിന് ബയാസ് ടയറിനെക്കാൾ കൂടിയ സമ്പർക്ക പ്രതലം ഉണ്ട്. വളരെയേറെ വഴക്കമുള്ള പാർശ്വഭിത്തിയും (flexible sidewall) ശക്തമായ, ബെൽറ്റിനാലുള്ള ട്രെഡിൻ്റെ വഴക്കമില്ലായ്മയും (stiffness contributed by belts)) ചേർന്നാണ് ഉയർന്ന സമ്പർക്ക പ്രതലം നൽകുന്നത്. ഈ ഉയർന്ന സമ്പർക്ക പ്രതലം വാഹനത്തിന് കൂടിയ ഗതി നിയന്ത്രണം (ride control) നൽകുകയും, ഉയർന്ന ട്രാക്ഷൻ (improved traction ) പ്രദാനം ചെയ്യുകയും ഉയർന്ന ബ്രേക്കിംഗ് (improved braking) നൽക്കുകയും ചെയ്യുന്നു. ബയാസ് ടയറുമായി താരതമ്യപ്പെടുത്തുമ്പോൾ റേഡിയൽ ടയറിൻ്റെ വഴക്കമുള്ള പാർശ്വഭിത്തി പാതയിൽ നിന്നുളവാകുന്ന കമ്പനങ്ങളും (vibrations) അടികളും (shocks) ഉൾക്കൊള്ളുകയും(absorbs) വാഹനത്തിലേക്ക് പകരാതെ ഉയർന്ന യാത്രാ സുഖം (ride comfort) പ്രദാനം ചെയ്യുകയും ചെയ്യുന്നു. റേഡിയൽ ടയറിന് ബയാസ് ടയറിനെക്കാൾ കുറഞ്ഞ ഭാരമാണുള്ളത്. റേഡിയൽ ടയറിൽ സമാന ബയാസ് ടയറിനെക്കാൾ കുറവ് പ്ലൈകൾ ഉപയോഗിച്ചാൽ മതി. ബയാസ് ടയറിൽ അടുത്തടുത്തായുപയോഗിക്കുന്ന പ്ലൈകളിലെ നാരുകൾ എതിർ കോണുകളിലാണ്. തുടർച്ചയായ ഉപയോഗത്തിൽ അടുത്തടുത്തുള്ള പ്ലെകളുടെ നാരുകൾക്കിടയിലുള്ള പന്റോഗ്രാഫിക് ചലനം (pantographic movement) ടയർ ചൂടാകാനിടയാക്കുന്നു. റേഡിയൽ ടയറിൽ പ്ലൈ നാരുകൾ ഒരേ ദിശയിലായതിനാലും റബർ ഭാഗങ്ങളുടെ കനം ബയാസ് ടയറിനെ അപേക്ഷിച്ച് വളരെ കുറവായതിനാലും റേഡിയൽ ടയറിലുളവാക്കുന്ന ചൂട് ബയാസ് ടയറുമായുള്ള താരതമ്യത്തിൽ വളരെ കുറവായിരിക്കും. ബയാസ് ടയറിനെക്കാൾ ഉയർന്ന വേഗക്ഷമതയുള്ളവയാണ് റേഡിയൽ ടയറുകൾ. പ്ലൈ നാരുകളുടെ ദിശയും, ഉറപ്പ് നൽകുന്ന ബൽറ്റുകളുടെ സാന്നിധ്യവും വഴക്കമുള്ള പാർശ്വഭിത്തികളാലും വളവുകളിൽ റേഡിയൽ ടയറിനെ ഉയർന്ന സമ്പർക്ക പ്രതലം നിലനിർത്തുന്നതിന് സഹായിക്കുകയും വാഹനത്തിന് ഉയർന്ന സുരക്ഷ ഉറപ്പാക്കുകയും ചെയ്യുന്നു. റേഡിയൽ ടയറുകൾ ബയാസ് ടയറുകളുമായുള്ള താരതമ്യത്തിൽ വളരെ കുറഞ്ഞ ഉരുളൽ പ്രതിരോധമുള്ളവയാണ് (rolling resistance). ഇത് വാഹനങ്ങൾക്ക് ഉയർന്ന ഇന്ധനക്ഷമത നൽകുന്നു. റോഡിൽ നിന്നുള്ള ആഘാതങ്ങളെ വാഹനങ്ങളിലേക്ക് കടത്തിവിടാതെ സ്വയം ഉൾക്കൊള്ളുന്നു എന്നതിനാൽ റേഡിയൽ ടയർ വാഹനങ്ങളുടെ ആയുസ് വർദ്ധിപ്പിക്കുകയും ചിലവ് കുറക്കുകയും ചെയ്യുന്നു.
കുറഞ്ഞ വേഗതയിൽ സ്റ്റിയറിംഗിൽ കൂടുതൽ ബലമുണ്ടാകുമെന്നതും മോശമായ പാതകളിൽ ബയാസ് ടയറിനെക്കാൾ പെട്ടെന്ന് കേടുപാടുകളുണ്ടാകുമെന്നതും റേഡിയൽ ടയറിന്റെ ദോഷവശങ്ങളാണ്. കട്ട ചെയ്യാനാവില്ലെന്നതോ (Potential for retreading) ബയാസ് ടയറിനെക്കാൾ കുറഞ്ഞ തവണകൾ മാത്രമേ കട്ട ചെയ്യാനാവുകയുള്ളു എന്നതും മറ്റൊരു ദോഷവശമാണ്.സ്റ്റീൽ പ്ലൈയോ സ്റ്റീൽ ബൽറ്റോ ഉപയോഗിക്കുന്ന ടയറുകളിൽ സ്റ്റീൽ ഭാഗങ്ങൾ അന്തരീക്ഷവുമായി സമ്പർക്കത്തിൽ വരത്തക്കവിധമുണ്ടാകുന്ന കേടുപാടുകൾ സ്റ്റീൽ ഭാഗങ്ങളുടെ നാശത്തിനിടയാക്കുകയും ടയർ ഉപയോഗശൂന്യമാകാനിടയാകുകയും ചെയ്യും.
ഉപയോഗാനുസരണമുള്ള തരം തിരിക്കൽ
[തിരുത്തുക]ഉപയോഗമനുസരിച്ച് പലതരത്തിൽ ടയറിനെ തരം തിരിക്കുന്നു. പ്രധാനമായ തരം തിരിവ് യാത്രാ കാറുകളുടെ ടയർ (Passenger car tires), ചെറു വ്യവസായ വാനങ്ങൾക്കുള്ള ടയറുകൾ (Light commercial vehicle tires), ബസിനും ട്രക്കിനുമുള്ള ടയറുകൾ(Truck and bus tires), വ്യോമയാന ടയറുകൾ(Aircraft tires), ഓഫ് റോഡ് ടയറുകൾ (Off road tires) എന്നിങ്ങനെയാണ്. ഓരോ വിഭാഗത്തിലും വിവിധ തരം തിരിവുകൾ ഇനിയുമുണ്ട്.
ടയർ നിർമ്മാണം
[തിരുത്തുക]![](http://upload.wikimedia.org/wikipedia/commons/thumb/2/23/Bridgestone_tire_cross_section.png/250px-Bridgestone_tire_cross_section.png)
ടയറിന്റെ പാർശ്വ ഭിത്തികളാണ് ആദ്യം നിർമ്മിക്കുന്നത്. ടയറിന് ഉണ്ടാകേണ്ട വ്യത്യസ്ത സ്വഭാവ വിശേഷങ്ങൾക്ക് അനുസൃതമായി അനുയോജ്യ പദാർഥങ്ങളെല്ലാം ഉൾപ്പെടുത്തിയാണ് പാർശ്വ ഭിത്തിയും ട്രെഡ്ഡും നിർമ്മിക്കേണ്ട പട്ടകൾ തയ്യാറാക്കുന്നത്. ഉരുക്കു കമ്പികളിൽ റബ്ബർ പൂശി ബീഡുകളും നിർമ്മിക്കുന്നു. ഉരുക്കോ സിന്തറ്റിക്-ഫൈബെറോ ഇടകലർത്തിയ ഫാബ്രിക്കിൽ റബർ പൂശി നിർമ്മിക്കേണ്ട ടയറിന്റെ ഇനത്തിനു അനുസരണമായി ഫാബ്രിക്കിനെ കുറുകെയോ ചെറിയ കോണിൽ ചരിച്ചോ മുറിച്ചെടുക്കുന്നു.
ഉടച്ചു മാറ്റാവുന്നതും വീതിയേറിയ വീപ്പയുടെ ആകൃതി ഉള്ളതുമായ ഒരിനം സിലിണ്ടർ/ഡ്രം ആണ് ടയർ നിർമ്മാണ യന്ത്രത്തിലെ പ്രധാന ഉപകരണം. മേൽ സൂചിപ്പിച്ച ഫ്രാബിക്ക് കൊണ്ട് സിലിണ്ടറിനെ ചുറ്റിയ ശേഷം അതിന്മേൽ ബീഡുകളും, അവയെ പൊതിയുന്ന തരത്തിൽ പ്ലൈ വശങ്ങളും ക്രമീകരിക്കുന്നു. ബയെസ്-പ്ലൈ ബെൽറ്റഡ്/റേഡിയൽ ഇനമാണ് ടയർ എങ്കിൽ അതിനു ആവശ്യമായ ബെൽറ്റുകളും പ്ലൈയുടെ മദ്ധ്യത്തിലായി ഘടിപ്പിക്കുന്നു. ബലത്തിനായി മിക്കപ്പോഴും വീതി കുറഞ്ഞ പട്ടകൾ കൂടി ബീഡുകൾക്ക് അരികിലായി ഉറപ്പിക്കുക പതിവാണ്. തുടർന്ന് ട്രെഡ്ഡ്, പാർശ്വ ഭിത്തി എന്നിവ നിർമ്മിക്കാൻ ആവശ്യമുള്ള റബ്ബർ കൊണ്ട് ഫാബ്രിക്കിനെ പൊതിയുന്നു. സിലിണ്ടറിന്മേലുള്ള ഈ പദാർഥങ്ങളെ റോളർ ഉപയോഗിച്ച് സമ്മർദ്ദക്ഷമമാക്കി അടുപ്പിച്ച ശേഷം സിലിണ്ടർ ഉടച്ചു മാറ്റി ടയർ പുറത്തെടുക്കുന്നു. രണ്ടറ്റവും തുറന്ന ബാരൽ രൂപത്തിലുള്ള ഇത്തരം ടയർ ഗ്രീൻ ടയർ എന്നറിയപ്പെടുന്നു. ഇവയെ വൾക്കനൈസ് ചെയ്ത് പാകപ്പെടുത്തുന്ന സമയത്ത് തന്നെ ട്രെഡ്ഡിൽ ചാലുകളും വാർത്തെടുക്കുന്നു.[4]
ടയർ നിർമ്മാണ മാനദണ്ഡങ്ങൾ
[തിരുത്തുക]ടയറിന്റെ ആകൃതി, പ്രവർത്തന ശേഷി എന്നിവയെ അടിസ്ഥാനമാക്കി ചില അന്താരാഷ്ട്ര വിനിർദ്ദേശ മാനദണ്ഡങ്ങൾ നിർവചിക്കപ്പെട്ടിട്ടുണ്ട്. പാസഞ്ചർ വാഹനങ്ങളിൽ ഉപയോഗിക്കാവുന്ന റേഡിയൽ ടയറിന്റെ കോഡാണ് P215/70R15. ഇവിടെ P, R എന്നീ അക്ഷരങ്ങൾ യഥാക്രമം പാസഞ്ചർ, റേഡിയൽ എന്നിവയെ സൂചിപ്പിക്കുന്നു. മില്ലി മീറ്ററിൽ ടയറിന്റെ വീതി വ്യക്തമാക്കുന്ന സംഖ്യയാണ് 215. ടയറിന്റെ ആസ്പെക്റ്റ് അനുപാതം (റിം മുതൽ ട്രെഡ്ഡ് വരെയുള്ള പൊക്കവും ടയറിന്റെ വീതിയും തമ്മിലുള്ള അനുപാതം) ആണ് 70. പതിനഞ്ച് എന്ന സംഖ്യ ടയർ ഉറപ്പിക്കേണ്ട റിമ്മിന്റെ വ്യാസത്തെ ഇഞ്ചിൽ സൂചിപ്പിക്കുന്നു. ഇവയ്ക്കു പുറമേ ടയറിന് ആർജ്ജിക്കാവുന്ന പരമാവധി വേഗതയെ (മണിക്കൂറിൽ ഇത്ര മൈൽ വേഗത) അടിസ്ഥാനമാക്കിയിട്ടുള്ള കോഡുകളാണ് S (പരമാവധി വേഗത 112 mph), T(118 mph), H(130 mph), V(149 mph), Z(>149mph) എന്നിവ.
ട്രെഡ്ഡിന്റെ തേയ്മാനം സൂചിപ്പിക്കാനും ചില മാനദണ്ഡങ്ങളുണ്ട്. ടയർ ട്രെഡ്ഡിന്റെ തേയ്മാനത്തെ ഒരു നിർദ്ദിഷ്ട ടയർ ട്രെഡ്ഡിന്റെ തേയ്മാനത്തെ അടിസ്ഥാനമാക്കി ശതമാന രൂപത്തിലാണ് സൂചിപ്പിക്കാറുള്ളത്. ഉദാഹരണമായി നിർദ്ദിഷ്ട ടയറിനെ അപേക്ഷിച്ച് മൂന്നിരട്ടി ട്രെഡ്ഡ് ആയുസ്സുള്ള ടയറിന്റെ ട്രെഡ്ഡ് തേയ്മാന നിരക്ക് 300 ആയിരിക്കും.
അന്താരാഷ്ട്ര കോഡുകൾ കൂടാതെ മറ്റു ചില കോഡിങ് സംവിധാനങ്ങളും നിലവിലുണ്ട്. ഉദാഹരണമായി ആസ്പെക്റ്റ് അനുപാതം 78 ഉള്ളതും, 14 ഇഞ്ച് വ്യാസമുള്ള ചക്രത്തിൽ ഉറപ്പിക്കേണ്ടതുമായ ഒരു റേഡിയൽ ടയറിന്റെ കോഡാണ് FR 7814. ഇവിടെ F ടയറിന്റെ വീതിയെ സൂചിപ്പിക്കുന്നു. ഈ സംവിധാനത്തിൽ ഏറ്റവും കുറഞ്ഞ വീതിയുടെ കോഡ് A ആണ്; തുടർന്ന് വീതി കൂടും തോറും B, C, D, E, F എന്ന രീതിയിൽ കോഡുകൾ നൽകുന്നുണ്ട്.[5]
ടയറുമായി ബന്ധപ്പെട്ട അടിസ്ഥാനപദങ്ങളുടെ നിർവചനങ്ങൾ താഴെ കൊടുത്തിരിക്കുന്നു.
റിമ്മിൻ്റെ വീതി (Rim width)
[തിരുത്തുക]![](http://upload.wikimedia.org/wikipedia/commons/thumb/0/09/%E0%B4%9F%E0%B4%AF%E0%B4%B1%E0%B4%BF%E0%B4%A8%E0%B5%81%E0%B4%AA%E0%B4%AF%E0%B5%8B%E0%B4%97%E0%B4%BF%E0%B4%95%E0%B5%8D%E0%B4%95%E0%B5%81%E0%B4%A8%E0%B5%8D%E0%B4%A8_%E0%B4%B1%E0%B4%BF%E0%B4%82.png/220px-%E0%B4%9F%E0%B4%AF%E0%B4%B1%E0%B4%BF%E0%B4%A8%E0%B5%81%E0%B4%AA%E0%B4%AF%E0%B5%8B%E0%B4%97%E0%B4%BF%E0%B4%95%E0%B5%8D%E0%B4%95%E0%B5%81%E0%B4%A8%E0%B5%8D%E0%B4%A8_%E0%B4%B1%E0%B4%BF%E0%B4%82.png)
![](http://upload.wikimedia.org/wikipedia/commons/thumb/f/fa/Rim_width_-_%E0%B4%B1%E0%B4%BF%E0%B4%AE%E0%B5%8D%E0%B4%AE%E0%B4%BF%E0%B4%A8%E0%B5%8D%E0%B4%B1%E0%B5%86_%E0%B4%B5%E0%B5%80%E0%B4%A4%E0%B4%BF.png/220px-Rim_width_-_%E0%B4%B1%E0%B4%BF%E0%B4%AE%E0%B5%8D%E0%B4%AE%E0%B4%BF%E0%B4%A8%E0%B5%8D%E0%B4%B1%E0%B5%86_%E0%B4%B5%E0%B5%80%E0%B4%A4%E0%B4%BF.png)
റിമ്മിൻ്റെ വക്കുകൾക്കിടയിൽ (rim flange) ഉള്ള നേർരേഖാ ദൂരത്തെ (Linear distance) റിമ്മിൻ്റെ വീതിയെന്ന് (Rim width) രേഖപ്പെടുത്തുന്നു. പൊതുവെ ഇഞ്ചുകളിലാണ് റിമ്മിൻ്റെ വീതി രേഖപ്പെടുത്തുന്നത്.
പരിച്ഛേദ വീതി (Section width)
[തിരുത്തുക]റിമ്മിൽ ഏറ്റി നിർദ്ദിഷ്ട . മർദ്ദത്തിൽ വായു നിറച്ച ഒരു ടയറിൻ്റെ പാർശ്വഭിത്തികളുടെ പുറം ഭാഗങ്ങൾ തമ്മിലുള്ള നേർരേഖാ ദൂരത്തെ പരിച്ഛേദ വീതി എന്നു പറയുന്നു. ടയറിലെ മുദ്രണങ്ങളുടെയോ, മറ്റ് അലങ്കാര നിർമിതികളുടെയോ, സുരക്ഷയ്ക്കായുള്ള പട്ടകളുടെയോ കനത്തെ ഒഴിവാക്കി വേണം പരിച്ഛേദ വീതി അളക്കുന്നത്.
നിർദ്ദിഷ്ട പരിച്ഛേദ വീതി ഒരു നിശ്ചിത റിമ്മിന്റെ വീതിയെയും, ടയറിലുള്ള മർദ്ദത്തെയും അടിസ്ഥാനമാക്കിയായിരിക്കും. ഇവയിലുള്ള വ്യതിയാനം പരിച്ഛേദ വീതിയിലും വ്യതിയാനമുണ്ടാക്കാം.
ഒരു ടയറിൻ്റെ പരിച്ഛേദ വീതിയുടെ അനുവദനീയമായ വ്യതിയാനം പല മാനദണ്ഡങ്ങളിലും (regulations) നിഷ്കർഷിച്ചിട്ടുണ്ട്.
നാമാങ്കിത പരിച്ഛേദ വീതി ( Nominal section width)
[തിരുത്തുക]ടയറിൻ്റെ നാമകരണത്തിൽ പറഞ്ഞിട്ടുള്ള പരിച്ഛേദ വീതിയെ നാമാങ്കിത പരിച്ഛേദ വീതി എന്ന് പറയുന്നു. യഥാർത്ഥ പരിച്ഛേദ വീതി നാമാങ്കത പരിച്ഛേദ വീതിയുടെ അടുത്തായിരിക്കും. ഉദാഹരണത്തിന്, ETRTO നിർദ്ദേശാനുസരണം 420/65R24 എന്ന് നാമകരണം ചെയ്തിരിക്കുന്ന ടയറിന്റെ നാമാങ്കിത പരിച്ഛേദ വീതി 420 മില്ലിമീറ്ററും രൂപകല്പനാ പരിച്ഛേദ വീതി (design section width) 418 മില്ലിമീറ്ററും ആണ്.
നാമാങ്കിത പരിച്ഛേദാനുപാതം (Nominal aspect ratio)
[തിരുത്തുക]നാമാങ്കിത വ്യാസം (Nominal diameter)
[തിരുത്തുക]ആകെയുളള വീതി (Overall width)
[തിരുത്തുക]റിമ്മിൽ ഏറ്റി നിർദ്ദിഷ്ട മർദ്ദത്തിൽ വായു നിറച്ച ഒരു ടയറിൻ്റെ പാർശ്വഭിത്തികളുടെ പുറം ഭാഗങ്ങൾ തമ്മിലുള്ള പരമാവധി നേർരേഖാ ദൂരത്തെ - ടയറിലെ മുദ്രണങ്ങളോ, മറ്റ് അലങ്കാര നിർമിതികളോ, സുരക്ഷയ്ക്കായുള്ള പട്ടകളോ ചേർക്കുന്ന കനത്തെകൂടി പരിഗണിച്ചുള്ള ദൂരത്തെ - ആകെയുള്ള വീതി എന്നു പറയുന്നു. പരിച്ഛേദ വീതിയിൽ വ്യതിയാനമുളവാക്കാനിടയുള്ള സാഹചര്യങ്ങൾ ആകെയുള്ള വീതിയിലും വ്യതിയാനമുളവാക്കാം.
ആകെയുളള വീതി ഒരു കാരണവശാലും പരമാവധി അനുവദനീയമായ പരിപരിച്ഛേദ വീതിക്കു മുകളിലാകാൻ പാടില്ലായെന്ന് പ്രധാനപ്പെട്ട എല്ലാ മാനദണ്ഡങ്ങളും തന്നെ നിഷ്കർഷിക്കുന്നുണ്ട്.
ടയറിൻ്റെ വ്യാസം (Outer diameter)
[തിരുത്തുക]റിമ്മിൽ ഏറ്റി നിർദ്ദിഷ്ട മർദ്ദത്തിൽ വായു നിറച്ച ഒരു ടയറുണ്ടാക്കുന്ന പരമാവധി വ്യാസത്തെ ടയറിൻ്റെ വ്യാസം ആയി രേഖപ്പെടുത്തുന്നു.
![](http://upload.wikimedia.org/wikipedia/commons/thumb/b/b8/%E0%B4%9F%E0%B4%AF%E0%B4%B1%E0%B4%BF%E0%B5%BB%E0%B5%8D%E0%B4%B1%E0%B5%86_%E0%B4%B5%E0%B5%8D%E0%B4%AF%E0%B4%BE%E0%B4%B8%E0%B4%82._Outer_diameter_of_a_tyre..png/220px-%E0%B4%9F%E0%B4%AF%E0%B4%B1%E0%B4%BF%E0%B5%BB%E0%B5%8D%E0%B4%B1%E0%B5%86_%E0%B4%B5%E0%B5%8D%E0%B4%AF%E0%B4%BE%E0%B4%B8%E0%B4%82._Outer_diameter_of_a_tyre..png)
ടയറിൻ്റെ നാമകരണം
[തിരുത്തുക]വിവിധ തരം നാമകരണ രീതികൾ ടയറുകൾക്ക് നിലവിലുണ്ട്. അടിസ്ഥാനമായി എല്ലാ നാമകരണ രീതികളിലും ടയറിൻ്റെ പരിച്ഛേദ വീതിയും നാമാങ്കിത വ്യാസവും ( Nominal diameter) പ്രസ്താവിക്കുന്നു. വിവിധ മാനദണ്ഡങ്ങൾ ടയറിന്റെ രണ്ട് പാർശ്വഭിത്തികളിലും നാമകരണം വ്യക്തമായി മുദ്രണം ചെയ്യണമെന്ന് നിഷ്കർഷിക്കുന്നുണ്ട്.
പൊതുവായ ചില നാമകരണ രീതികൾ താഴെ കൊടുത്തിരിക്കുന്നു.
- 145/70 R12 - ഇതിൽ 145 എന്നത് നാമാങ്കിത പരിച്ഛേദ വീതിയും (nominal section width) 70 എന്നത് നാമാങ്കിത പരിച്ഛേദാനുപാതവും (nominal aspect ratio) ആണ്. പരിച്ഛേദ വീതിയെയും പരിച്ഛേദാനുപാതത്തെയും " / " ഉപയോഗിച്ച് വേർതിരിക്കുന്നു. പരിച്ഛേദാനുപാതത്തെ തുടർന്ന് റേഡിയൽ ടയറുകളിൽ " R " എന്നും ബയാസ് ടയറുകളിൽ " - " അല്ലെങ്കിൽ " D " എന്നും മുദ്രണം ചെയ്യുന്നു. ഇതെ തുടർന്ന് ടയറിന്റെ നാമാങ്കിത വ്യാസം (nominal diameter) ഇഞ്ചുകളിൽ രേഖപ്പെടുത്തുന്നു.
അവലംബം
[തിരുത്തുക]- ↑ "Solid Tyre Moulding Press". Archived from the original on 2010-10-09. Retrieved 2010-11-23.
- ↑ ECE/TRANS/WP.29/2020/5 - UN Regulation No. 106. https://unece.org.
{{cite book}}
: External link in
(help)|publisher=
- ↑ ECE/TRANS/WP.29/2020/5, UN Regulation No. 106. https://unece.org/transport.
{{cite book}}
: External link in
(help)|publisher=
- ↑ Tire Manufacturing Process
- ↑ Creation and Adaptation of Norms in a Tire-Mold Manufacturing Organization[പ്രവർത്തിക്കാത്ത കണ്ണി]
- ↑ STANDARDS MANUAL 2021, ETRTO.
പുറംകണ്ണികൾ
[തിരുത്തുക]- MECHANICS OF PNEUMATIC TIRES
- Pneumatic Tires
- Bobcat Pneumatic Tires Archived 2010-11-20 at the Wayback Machine.
- The Snow Tire
- Studded Tire Information Archived 2010-11-20 at the Wayback Machine.
- Tire Mould-Tire Mould Manufacturers
- How a Tire is Made Archived 2010-07-24 at the Wayback Machine.
- Tire Manufacturing Processes Archived 2010-12-27 at the Wayback Machine.
- Economic Analysis of the Rubber Tire Manufacturing MACT
വീഡിയോ
[തിരുത്തുക]![]() | കടപ്പാട്: കേരള സർക്കാർ ഗ്നൂ സ്വതന്ത്ര പ്രസിദ്ധീകരണാനുമതി പ്രകാരം ഓൺലൈനിൽ പ്രസിദ്ധീകരിച്ച മലയാളം സർവ്വവിജ്ഞാനകോശത്തിലെ ടയർ എന്ന ലേഖനത്തിന്റെ ഉള്ളടക്കം ഈ ലേഖനത്തിൽ ഉപയോഗിക്കുന്നുണ്ട്. വിക്കിപീഡിയയിലേക്ക് പകർത്തിയതിന് ശേഷം പ്രസ്തുത ഉള്ളടക്കത്തിന് സാരമായ മാറ്റങ്ങൾ വന്നിട്ടുണ്ടാകാം. |