Орден на Република Македонија
Орден на Република Македонија | |
---|---|
![]() | |
Вид | државно одличје |
Држава | ![]() |
Доделува | Претседателот на Македонија |
Достапно за | личности и правни лица, владини и невладини организации, здруженија, шефови на држави и на влади |
Лента | |
Статистика | |
Вкупно добитници | 7 |
![]() | |
Хиреархија | |
Следно (пониско) | Орден „8 Септември“ |
Орден на Република Македонија — највисокото државно одликување на Македонија. Составен од орденски знак на гердан и од орденска ѕвезда. Орденската ѕвезда има основна кружно-ѕвездеста форма со димензија од 91 мм. Медалјонот на орденската ѕвезда е идентичен со орденскиот знак. Тој е во кружна форма со димензија од 57 мм. Орденскиот знак со соодветна јазолна алка висока 3,5 см е врзан за герданот на орденот. Двете форми на герданските алки, наредени со наизменична меѓусебна врска долга 80 см го сочинуваат герданот на орденскиот знак. Димензиите на алките се лимитирани од дадената должина на герданот.
Составни делови
[уреди | уреди извор]- Штитот од ѕвездата е претстава на споени брановидно-тутунови зраци кои на својот врв имаат топчест завршеток во кој се вметнати рубини. Во централното поле е вметнат соодветен рубин. Централниот медалјон околу рубинот има стилизација на флорални елементи, а стилизирани палмети го заокружуваат централниот дел на медалјонот. Маргиналниот венец на медалјонот е составен од нишка од брилијанти.
- Медалјонот на орденскиот знак е идентичен со централниот медалјон на орденската ѕвезда.
- Алката меѓу герданот и орденскиот знак е стилизација на гордиев (хераклев) јазол и детал од маргините на Болоњскиот псалтир.
- Орденот има соодветна минијатурна лента со димензија (1,5 мм со 3,5 мм) во црвена боја со две паралелни жолти нишки. Редниот број на орденот, жигот за чистотата на металот од кој е изработен и жигот на производителот се втиснати на задниот дел на орденскиот знак и на орденската ѕвезда.
Орденот на Република Македонија е изработен од 18 каратно злато, има родиумски третирани елементи, соодветно тониран топол емајл и скапоцени камења, во современа јувелирско - ковна техника.
Секој орден и медал има соодветна кутија, во одредена боја, која димензионално одговара на димензиите на одличјата. На поклопецот на кутијата со златовтиснување е името на одличјето.
Лентите за ордените се изработени од маорирана свила во пропишаната боја и димензија.
Критериум
[уреди | уреди извор]Орден на Република Македонија се доделува на:
- најистакнати личности и правни лица кои имаат посебни заслуги во остварувањето на самостојноста, сувереноста, независноста и територијалниот интегритет на Република Македонија, како и за вонредни резултати остварени на цивилен и воен план;
- најистакнати личности кои исклучително придонеле за развивање и зацврстување на мирољубивата соработка и пријателските односи меѓу Република Македонија и други држави, како и за јакнење на нејзината меѓународна положба и углед;
- владини и невладини организации, здруженија, како и поединци, кои со своето работење и дејствување постигнуваат исклучителни резултати од значење за афирмирање на Република Македонија во областа на науката, уметноста, образованието, стопанството, хуманоста и слично, на домашен и на меѓународен план, а особено поединци кои во областа на своето работење, односно професионално ангажирање добиле највисоки награди, односно најпрестижни признанија од меѓународно значење и
- шефови на држави и на влади, како и на други истакнати странски личности за вонредни заслуги во развивањето и зацврстувањето на пријателските односи и соработката на Република Македонија со други држави.
Добитници
[уреди | уреди извор]Одликувани со Орденот на Република Македонија се поранешните претседатели на Македонија и три реномирани институции.
Име и Презиме | Година | Заслуга |
---|---|---|
Киро Глигоров | 2005 | Прв Претседател на Република Македонија |
Борис Трајковски | 2005 | Посмртно доделен. Втор Претседател на Република Македонија |
МАНУ | 2007 | за исклучителниот придонес во утврдувањето на националната политика и развојот на научната работа и уметничкото творештво, како и за поттикнување и координирање на научно-истражувачката дејност од значење за севкупниот развој и афирмација на македонската наука и држава |
Универзитет „Св. Кирил и Методиј“ | 2007 | за постигнатите исклучителни резултати во долгогодишната научна, наставна и апликативна дејност, давајќи значителен придонес за севкупниот развој и афирмација на Република Македонија како современа демократска држава во светот |
Македонска православна црква | 2007 | за улогата како стожер на националното и духовното опстојување и како чувар и афирматор на националниот идентитет на македонското постоење |
Методија Андонов - Ченто | 2011 | Посмртно доделен. Прв Претседател на македонската држава и прв претседател на Президиумот на АСНОМ |
Џорџ В. Буш | 2015 | 43 претседател на САД , за големиот придонес во градењето на пријателските односи помеѓу Република Македонија и САД.[1][2] |
Наводи
[уреди | уреди извор]- ↑ „Груевски му врачи Орден на Република Македонија на Џорџ Буш“. Дневник. 27 септември 2015. Архивирано од изворникот на 2016-03-04. Посетено на 1 октомври 2015.
- ↑ „Груевски му врачи орден на Република Македонија на Џорџ Буш помладиот!“, Фокус, број 1044, 9 октомври 2015, стр. 22.
|