The Sun Also Rises
![](http://upload.wikimedia.org/wikipedia/commons/thumb/8/8b/The_Sun_Also_Rises_%281st_ed._cover%29.jpg/225px-The_Sun_Also_Rises_%281st_ed._cover%29.jpg)
![](http://upload.wikimedia.org/wikipedia/commons/thumb/0/07/HemingwayLoeb.jpg/225px-HemingwayLoeb.jpg)
The Sun Also Rises adolah sabuah novel karya Ernest Hemingway nan ditabikkan pado tahun 1926.
Latar balakang
[suntiang | suntiang sumber]Novel ko mancaritoan pajalanan Ernest Hemingway dari Paris ka Festival San Fermín di Pamplona, Spanyol, untuak manonton lago jawi nan tanamo di sinan. Pado wukatu itu, Hemingway tingga di Paris dan bakarajo subagai koresponden asiang untuak The Toronto Star, dan sadang cubo-cubo untuak manulih karya fiksi salapeh maliput Parang Yunani-Turki di Smyrna.[1]
Pado awalnyo, Hemingway baniek untuak manulih sabuah buku nonfiksi tantang lago jawi, ulahrago nan manjadi minatnyo sajak patamo kali manonton festival di Pamplona basamo istrinyo Hadley Richardson pado tahun 1923.[2] Inyo baliak ka Pamplona pado tahun 1924 basamo Hadley dan sarombongan kawan, namun baru pado lawatan katigo pado bulan Juni 1925 inyo mamutusan untuak manulih sabuah novel.[3] Inyo manulih ampek baleh bab partamo mulai pado hari ulang tahunnyo, 21 Juli 1925, inggo 17 Agustus di Pamplona, dan mamutuihan untuak pulang ka Paris. Draf partamo novel ko siap pado 21 September 1925, bajudul awal The Lost Generation.[4]
The Sun Also Rises ditabikkan dek Scribner's pado 22 Oktober 1926; cetakan patamonyo bajumlah 5,090 eksemplar.[5] Novel ko dicetak taruih sapanjang dekade 1920an. Inggo kini, The Sun Also Rises dipakiroan manjadi salah satu novel nan paliang banyak ditajamahan di dunia, dan alah dicetak sacaro rutin sajak tahun 1983.[6]
Sinopsis
[suntiang | suntiang sumber]Novel ko bakisah saputa Jake Barnes, surang veteran parang nan indak bisa lai baubuangan seks dek luko-lukonyo pado parang, jo Lady Brett Ashley, surang sosialita. Jake adolah surang wartawan Amerika nan tingga di Paris, samantaro Brett alah duo kali bacarai dan sadang dalam ubuangan jo babarapo urang lelaki. Salah satunyo, ubuangan Brett jo kawan kuliah Jake Robert Cohn, mambuek John berang dan mamutuihan pakawanannyo jo Jake. Di Pamplona, rayuan Jake pado surang matador nan baumua 19 tahun banamo Romero mambueknyo dipandang tukiak jo warga lokal.
Buku I dibukak jo Jake bamain tenis basamo Robert, manyewa surang pelacur banamo Georgette, jo batamu Brett dan Count Mippipoulous di sabuah kafe. Brett kudian manyatoan cintonyo pado Jake, namun kaduonyo tahu baso ubuangan kaduonyo indak akan stabil. Pado buku ko, latar balakangnyo banyak diambiak pado masyarakat kafe urang-urang mudo ekspatriat Amerika nan tingga di Paris.
Pado Buku II, Bill Gorton, surang kawan Jake, basamo tunangannyo Mike Campbell, tibo di Paris. Jake jo Bill pai ke salatan Parancih dan batamo Roberto di Bayonne untuak pai mamanciang di bukik-bukik dakek Pamplona. Walau baitu, Robert indak jadi pai mamanciang; inyo mamiliah tingga di Pamplona untuak manunggu Brett jo Mike nan talambek. Robert alah baubuangan jo Brett babarapo minggu sabalunnyo, dan masih maraso mamilikinyo walaupun alah batunagan jo Mike. Jake jo Bill mamanciang salamo limo hari di aliran sungai dakek Burguete sabalun bagabuang jo rombongan Robert di Pamplona. Di Pamplona, rombongan ko mulai minum alkohol, makan, manonton lago jawi, jo batalingkah sasamo inyo. Robert mulai indak dianggap dek rombongan ko dek kato-katonyo nan antisemitik. Jake manganalan Brett pado matador Romero di Hotel Montoya; salapeh itu, kaduonyo mulai barayu-rayuan, namun para lelaki dalam rombongan mulai mamparabuikkan Brett. Robert, nan pernah juara tinju kutiko kuliah, bacakak jo Jake, Mike, jo Romero.
Buku III mancaritoan kisah akhia salapeh pesta di Pamplona. Salapeh mabuak, rombongan maninggaan kota tu: Bill pulang ka Paris, Mike tingga di Bayonne, dan Jake pai ka San Sebastián di pantai utara Spanyol. Sabalun pulang ka Paris, Jake mandapek telegram dari Brett (nan pai ka Madrid basamo Romero) nan nio mamintak tolong. Inyo manamuan Brett di sabuah kamar hotel kumuah dalam kondisi ditinggaan Romero dan indak bapitih. Novel ditutuik jo adegan Brett jo Jake sadang manumpang sabuah taksi, batuka carito tantang kamungkinan-kamungkinanan nan bisa se tajadi salamo pangalaman inyo baduo di Pamplona.
Tema
[suntiang | suntiang sumber]Sacaro umum, The Sun Also Rises bacarito tantang cinto, padusi, jo maskulinitas pria pado maso Roaring Twenties. Hemingway acok dianggap subagai salah satu panulih utamo pado angkatan Lost Generation, istilah Gertrude Stein untuak mudo-mudi Amerika nan lahia salapeh Parang Dunia Partamo.[7]
Dalam novel ko, watak Lady Brett Ashley dianggap mawakili angkatan New Woman nan bebas: urang padusi nan duo kali bacarai, tingga bebas jo pagaulan kota gadang Eropa (di Paris). Walaupun ado nan maanggap baso Hemingway maniekkan novel ko untuak mambahas tantang nilai-nilai moral, novel ko dapek dibaco jo duo caro: sabuah buku tantang urang ekspatriat nan sadang mancari jati diri atau kisah moral tantang surang protagonis nan sadang mancari kataguahan moral di dunia nan indak bamoral.[8] Sabaliaknyo, banyak kritik nan mamandang watak Jake subagai pangajawantahan sosok Hemingway surang, tarutamo kamarahannyo taadok kaum homoseksual jo kagundahannyo tantang stigma maskulin pado diri surang laki-laki.[9]
Watak-watak pado novel ko kabanyakan mampunyo nilai jo norma nan samo. Saluruahnyo dipangaruahi dek Parang Dunia dalam satu atau lain bantuak. [8] Alusi pado istilah Lost Generation (biografer James Mellow manyatoan baso Hemingway mungkin manggunoan istilah ko sabagai judul partamo novel ko) barasa dari kato-kato Stein, nan bakato tantang serdadu-serdadu mudo nan baru pulang dari medan parang: "C'est une génération perdue".[10][7] Hemingway juo manangkok raso berang dan kecewa dalam kisah cinto Brett dan Jake: Brett mancari-cari kapastian nan indak kunjuang inyo dapek, dan Jake indak dapek baubuangan seks dek luko-luko nan nyo dapek dalam parang. Luko-luko Jake malambangan sabuah era nan rusak, kekecewaan, jo frustrasi nan dirasoan dek satu generasi.[8] Hemingway bakato pado editornyo, Max Perkins, baso buku ko bisa se bukan tantang sabuah generasi nan hilang, tapi baso "Bumi batahan jo bantuaknyo salamonyo". [11]
Tanggapan
[suntiang | suntiang sumber]The Sun Also Rises adolah novel partamo Hemingway, dan salah satu karya nan manjadi tunggak popularitasnyo subagai surang panulih bahaluan modernis. Tanggapan awal ateh novel ko kabanyakan positif, tamasuak dari kritikus dari koran-koran gadang cando H.L. Mencken[12]; The New York Times[13]; jo Conrad Aiken dari New York Herald Tribune.[14] Namun, kritikus lain cando koran Chicago Daily Tribune[15] jo The Cincinnati Enquirer maanggapnyo buruak dan bahkan dangka.[16]
Adaptasi
[suntiang | suntiang sumber]Novel ko adolah salah satu dari tigo buku Hemingway tantang lago jawi; inyo manabikkan Death in the Afternoon pado tahun 1932 jo The Dangerous Summer salapeh kamatiannyo pado tahun 1985. Panggambaran Hemingway tantang kota Pamplona mambantu mampopuleran pacu jo lago jawi di Festival San Fermín.[17]
Kapopuleran novel ko mandapek paratian dari teater Broadway jo Hollywood. Hemingway mampatimbangan untuak mangirim buku ko lansuang ka Hollywood. Inyo manjua hak film ka RKO Pictures pado tahun 1932, namun filmnyo baru dibuek pado tahun 1956.[18][19] Skrip filmnyo ditulih dek Peter Viertel; Tyrone Power mamaranan Jake, Ava Gardner sabagai Brett, dan Errol Flynn manjadi Mike. Royalti dari film disarahan pado jando Hemingway, Richardson.[20]
Rujuakan
[suntiang | suntiang sumber]- ↑ Meyers (1985), 98–99
- ↑ Balassi (1990), 128
- ↑ Meyers (1985), 117–119
- ↑ Balassi (1990), 132, 142, 146
- ↑ Oliver (1999), 318
- ↑ McDowell, Edwin, "Hemingway's Status Revives Among Scholars and Readers". The New York Times (July 26, 1983). Retrieved 27 February 2011
- ↑ a b Meyers (1985), 191
- ↑ a b c Wagner-Martin (1990), 6–9
- ↑ Elliot (1995), 80–82
- ↑ Mellow (1992), 309
- ↑ Baker (1972), 82
- ↑ Wagner-Martin (2002), 1–2
- ↑ "The Sun Also Rises". (October 31, 1926) The New York Times. Retrieved 13 March 2011.
- ↑ Mellow (1992), 334–336
- ↑ qtd. in Wagner-Martin (1990), 1
- ↑ Leff (1999), 63
- ↑ Palin, Michael. "Lifelong Aficionado" jo "San Fermín Festival". Michael Palin's Hemingway Adventure. PBS.org. Diakses 1 Juni 2020.
- ↑ Leff (1999), 64
- ↑ Leff (1999), 156
- ↑ Reynolds (1999), 293
Sumber
[suntiang | suntiang sumber]- Balassi, William (1990). "Hemingway's Greatest Iceberg: The Composition of The Sun Also Rises". in Barbour, James and Quirk, Tom (eds). Writing the American Classics. Chapel Hill: North Carolina UP. ISBN 978-0-8078-1896-1
- Elliot, Ira (1995). "Performance Art: Jake Barnes and Masculine Signification in The Sun Also Rises". American Literature. 63 (1): 77–94
- Leff, Leonard (1999). Hemingway and His Conspirators: Hollywood, Scribner's and the making of American Celebrity Culture. Lanham: Rowman & Littlefield. ISBN 978-0-8476-8545-5
- Mellow, James (1992). Hemingway: A Life Without Consequences. Boston: Houghton Mifflin. ISBN 978-0-395-37777-2
- Meyers, Jeffrey (1985). Hemingway: A Biography. New York: Macmillan. ISBN 978-0-333-42126-0
- Wagner-Martin, Linda (1990). "Introduction". in Wagner-Martin, Linda (ed). New Essays on Sun Also Rises. New York: Cambridge UP. ISBN 978-0-521-30204-3