Vano volondavenona
![](http://upload.wikimedia.org/wikipedia/commons/thumb/0/09/Graureiher_Grey_Heron.jpg/220px-Graureiher_Grey_Heron.jpg)
Ny vano volondavenona na vanokigara na langoromavo dia vorona mirenireny, lava tongotra, ao amin' ny fianakaviana Ardeidae, hita manerana an' i Eorôpa sy Azia ary any amin' ny faritra sasany aty Afrika. Ny anarany ara-tsiansa dia Ardea cinerea. Ny ankamaroan' izy ireo dia tsy mifindra lavitra ny toerana misy azy, fa ny sasany avy any amin' ny faritra avaratra kokoa dia mifindra monina mianatsimo rehefa fararano. Vorona monina amin' ny faritra mando izy, hita manodidina ny farihy, ny renirano, ny dobo, ny honahona ary eny amoron-dranomasina. Ny zavaboary anaty rano no tena fihinany ka ambenany indrindra rehefa mijoro eo akaikiny na ao anaty rano izy na manaraka ny rembiny amin' ny rano marivo.
Hatramin' ny 1 metatra ny haavony raha mijoro, ny lehibe dia milanja 1 hatramin' ny 2 kg. Fotsy ny lohany sy ny tendany izay misy tsipika mainty manomboka eo amin' ny masony ka hatrany amin' ny vombony mainty. Ny vatany sy ny elany dia volondavenona eo ambony ary ny ao ambany dia fotsy manopy volondavenona, ary misy mainty ny sisiny. Ny vavany lava sady maranitra dia mavo manopy mavokely, ary volontany ny tongony.
Ny vano volondavenona dia miteraka miaraka maro amin' ny lohataona, matetika manao ny akaniny eny ambony hazo izy. Ny tranony dia misy atody telo ka hatramin' ny dimy maitso manopy manga. Samy mamana ny atody ny vorona mpivady mandritra ny 25 andro eo ho eo, ary avy eo dia samy mamahana ny zana-borona izay manidina rehefa feno fito na valo herinandro.
Maro amin' ny vorona mbola kely no tsy tafavoaka velona amin' ny ririnina voalohany, fa raha velona izy ireo dia mety hiaina hatramin' ny 5 taona eo ho eo.