Repoblika Entim-Bahoakan' i Donetsk
![](http://upload.wikimedia.org/wikipedia/commons/thumb/f/fc/Flag_of_Donetsk_People%27s_Republic.svg/266px-Flag_of_Donetsk_People%27s_Republic.svg.png)
Ny Repoblika Entim-Bahoakan' i Donetsk dia fanjakana mpisara-bazana avy amin' i Okraina, naorin' i Rosia tamin' ny taona 2014 tao amin' ny Ôblastan' i Donetsk izay misy azy, ary niova ho repoblika ao anatin' ny Federasiônan' i Rosia tamin' ny taona 2022 taorian' ny fitsapan-kevi-bahoaka momba ny fanakambanana tao Donetsk. Ny tanànan' i Donetsk no ataony renivohiny. Amin' ny teny rosiana izy dia ata hoe Донецкая Народная Республика / Donetskaia Narodnaia Respublika).
Nipoaka ny fikomiana mpomba an' i Rosia tao amin' ny faritr' i Donbass ho setrin' ny revôlisiôna okrainiana. Tamin' ny Avrily 2014 dia nogiazan' ny mpisintaka mitam-piadiana mpomba an' i Rosia ny tranoben' ny governemanta ary nanambaran' izy ireo ny Repoblika Entim-Bahoakan' i Donetsk sy ny Repoblika Entim-Bahoakan' i Luhansk ho fanjakana mahaleo tena, izay tsy nahazo fankatoavana iraisam-pirenena hatramin' ny 2022. I Okraina sy ny ampahany be amin' ny fianakaviambe iraisam-pirenena (ny Tandrefana) dia mihevitra azy ireo ho fanjakana saribakoly sy fikambanana mpampihorohoro. Ireo zava-nitranga ireo dia niteraka ny Ady tao Donbas, izay ampahany amin' ny Ady Rosiana-Okrainiana izay nanakambanana an' i Krimea ihany koa ho an' i Rosia. Nibodo ny antsasaky ny faritra roa ny milisy mpisintaka ary niady tamin' ny tafika okrainiana nandritra ny valo taona nanaraka.
![](http://upload.wikimedia.org/wikipedia/commons/thumb/3/31/Location_of_Donetsk_People%27s_Republic.png/220px-Location_of_Donetsk_People%27s_Republic.png)
Tamin' ny 21 Febroary 2022 dia nanambara i Vladimir Putin fa neken' ny Rosiana ny fahaleovantenan' ny repoblika roa ao Donbass, anisan' izany ny an' i Donetsk. Io fanekena io no lohahevitry ny fanamelohana ao amin' ny Filankevi-Piarovan' ny Firenena Mikambana ary mialoha telo andro ny fananiham-bohitra nataon' i Rosia an' i Okraina tamin' ny taona 2022 nodidian' ny filoha rosiana.
Tamin' ny 30 Septambra 2022 dia nanambara ny fampidirana an' ilay repoblika ao amin' ny taniny i Rosia, miaraka amin' ny fizaràn-tany voabodo maro hafa.