Eid al-Adha
![](http://upload.wikimedia.org/wikipedia/commons/thumb/0/04/Tabaski-Kounkane.jpg/250px-Tabaski-Kounkane.jpg)
Ny Eid al-Adha na Aid al Adha na ny Fetin' ny Sorona no fety faharoa amin' ny fety roa lehibe ankalazaina ao amin' ny finoana silamo (ny iray hafa dia ny Eid al-Fitr na Aid al-Fitr). Amin' ny lovantsofina silamo dia anomezam-boninahitra ny fahavononan' i Abrahama hanao sorona ny zanany lahy ho fankatoavana ny didin' Andriamanitra io fety io. Atao hoe عيد الأضحى / ʿĪd al-ʾAḍḥā, izany amin' ny teny arabo. Antsoina koa hoe Eid al-Kebir na Aid el-Kebir na Fety Lehibe (arabo: العيد الكبير / al-ʿĪd al-Kabīr) koa io andro io.
Miankina amin’ ny fitantarana, na i Ismaela na i Isaaka no lazaina amin' ny anaram-boninahitra hoe "sorona ho an' Andriamanitra". Kanefa, talohan' ny nahafahan' i Abrahama nanao sorona ny zanany tamin' ny anaran' Andriamanitra, sy noho ny fahavononany hanao izany, dia nanome azy zanak' ondry hatao sorona ho solon' ny zanany Andriamanitra. Ho fahatsiarovana izany fidirana an-tsehatra izany dia biby toy ny zanak' ondry no atao sorona.
Zaraina telo ny henan' ny biby atao sorona: ny ampahany iray no hanin’ ny fianakaviana izay nanolotra ilay biby, ny ampahany faharoa ho an' ny namana sy ny havana, ny sisa kosa zaraina ho an' ny mahantra sy ny sahirana. Misy ny fanolorana zava-mamy sy fanomezana, ary mazàna ny havana akaiky dia mitsidika sy atao tsara fandray.
Ao amin' ny tetiandro manara-bolana silamo, ny Eid al-Adha dia milatsaka amin' ny andro fahafolon' ny volana Dhu al-Hijja ary maharitra efatra andro. Ao amin' ny tetiandro iraisam-pirenena (gregôriana) dia miovaova isan-taona ny daty, miroso eo amin' ny 11 andro isan-taona.