Stepan Bandera
![]() |
Quest articol chì l'è scrivud in lombard, con la Noeuva Ortografia Lombarda |
![](http://upload.wikimedia.org/wikipedia/commons/thumb/5/55/Stepan_Bandera_photo.jpg/220px-Stepan_Bandera_photo.jpg)
El Stepan Bandera (in ucrain Степан Андрійович Бандера; Staryj Uhryniv, 1 de sginer 1909 - Monegh de Baviera, 15 de otover 1959) a l'è stad un politegh ucrain, leader de la fazzion nazzionalista de estrema destra de l'Organizazzion di Nazzionalista Ucrain e fondator de l'Armada insurrezzional ucraina.
Ativ in del nazzionalism ucrain sgiamò de sgiovin, in del 1936 l'è condanad a mort in Polonia per el so roeull in del mazzament del prim minister Bronisław Pieracki, ma poeu ghe fann la comutazzion in preson a vita. El scapa del camuscion cont el rivà di todesch in del 1939 e 'l fa San Michel a Cracovia. El deventa collaborazzionista coi nazista inscì de havégh un Stat ucrain independent, e 'l vedeva in l'invasion todesca 'na gran oportunità, ma i raport cont i nazzionalsocialista eren gram, perchè l'ideja de 'n Stat ucrain independent, anca se del tut conligad al proget nazista, la ghe piaseva no, e infin el finiss in del camp de concentrament de Sachsenhausen, del che el liberen in del 1944 per fàgh fà di azzion de sabotasg contra l'Armada rossa. Fornida la guerra l'è menad in Germania Ovest sota protezzion liada e l'è copad a Monegh de 'n agent del KGB cont el tossegh.
A l'è una figura propi controversa, che l'ha lassad mort pussee de centmila polach e l'ha collaborad a l'Olocaust in Ucraina, ma l'è al center del nazzionalism ucrain: per un quajvun a l'è donca un eroe nazzional, per un quaj alter un traditor fassista vesin a l'Hitler. Con l'invasion russa de l'Ucraina a l'è deventad pussee tollerad, con strade in di zone ciapade indree di ucrain che gh'hann havud el so nom, el fàgh su de monument e 'na certa glorifegazzion, cont una magioranza di ucrain che 'l veden ben. Per di sondagg del 2013, in Galizzia l'è semper stad vist mej, menter in di bande de lengua russa pesg, anca se in del rest de l'Ucraina de lengua ucraina l'era vist mal.
Riferiment
[Modifega | modifica 'l sorgent]Alter proget
[Modifega | modifica 'l sorgent]Wikimedia Commons el gh'ha dent imagin o alter archivi su Stepan Bandera