Zombie er ein fantasifigur. I filmar og bøker er det ofte ein død person som står opp att frå grava. Dei prøver å drepe eller ete dei levande. Dei kan gå og bevege seg nesten som menneske, men dei klarer ikkje å tenke. Dei lagar lydar i staden for å snakke.
Nokre zombiar er kvite eller grøne i andletet, fordi dei har byrja å ròtne. Dei har fillete klede, og går rart. Det rykker liksom i ledda på dei. Dei lagar lydar, men kan ikkje snakke.
I gamle historier var det trollmenn og hekser som laga zombiar. Når desse stod opp att frå grava, måtte dei gjere alt det trollmannen ville. I nyare historier er det oftast virus som lagar zombiar.
I mange filmar spring zombiane etter folk, for å ete dei. Ein biten person kan bli til ein zombie. Slik spreier smitten seg, og vanlege menneske må flykte. Eit eksempel er den populære TV-serien The Walking Dead (2010–2022).
I ungdomsboka I morgen er alt mørkt av Sigbjørn Mostue saknar hovudpersonen Brage det vanlege livet. Det har nemleg forsvunne, på grunn av zombiane.
NRK Super-serien ZombieLars handlar om Lars, som er halvt zombie, halvt vanleg menneske.
I boka Zombie Nation av Øystein Stene er det synd i zombiane, og menneska er skurkane.
Det er zombiar i mange dataspel, for eksempel Resident Evil og Call of Duty: Black ops. Ein må drepe zombiane, for å komme seg vidare i spelet.
Det er populært å kle seg ut som zombie på halloween og karneval. I fleire byar rundt om i verda kan ein bli med på zombie-vandringar. Då er det opptil fleire tusen som tek på seg zombie-kostyme og sminke, og går i gatene.
