Nichiozo Copernico
ZE-P
|
Sta paggina chie a l'è scrita in zeneize, co' ina grafia tipo quella do Prian do 1745 |
Nichiozo Copèrnico (ted. Niklas Koppernigk, lat Nicolaus Copernicus), astronnomo e cosmollogo (Thorn, 1473 - Frauenburg, Pruscia Orientâ, 1543).
Vitta
[modìfica | modìfica wikitèsto]De famiggia slexaña de lengua todesca, ma aversa a l'orde Tœütonnego, a-a morte do poæ (1483) o Copernico o fu agiuttao da-o barba materno, Lucco Watzelrode, da-o 1489 vescovo de Warmja. Inscritose into 1491 a l'universcitæ de Cracovia, o passò inte l'aotunno do 1496 a Bologna, onde o barba o dexidiava o s'adotoese in diritto. O Copernico o continuò però ascì o studdio, començao a Cracovia, de matematica e astronomia, conlaborando co l'astronomo Domenego M. Novæa, e o l'approfondì pù a so cortua umanistega e a conoscença di clascichi.
Nominao canonnego do Capittolo de Warmja (o l'aiva riçevúo i ordi menoî), da-o 1501 o studiò meixiña a Padoa e o s'adottoò a Feræa into drito canonnego into 1503. Tornao in Polonnia, o fu segretaio e mego do barba scin a-a morte de questo, e into 1512 o se transfei a Frauenburg ond'o proseguì e riçerche astronomiche e o se distinse comme amministratô di ben do Capitolo, specie durante a guæra de re Sigismondo contra i Cavagei Tœütonneghi.
A rivoluçion
[modìfica | modìfica wikitèsto]A nommina de Copernico - reciamma o sò nomme a "rivoluçion" da-a quæ se fa començâ a sciença moderna, e "copernichen" se diciaron Keplero e Galileo - se deve a l'elaboraçion do scistema eliocentrico ò eliostattego (o Sô fermo a-o [squæxi]- çentro de l'universo limitao da-o çê de stelle fisse) in contrappoxiçion a-o scistema geocentrico e geostattego de l'astronomia grega, da Œüdosso e Aristotele a Tolomeo, a-a quæ s'ea inspiao ascì a conceçion crestiaña, araba e medievâ do mondo fixico.
Un primmo sbòçço do sò scistema o Copernico o-o deliniò in gio a-o primmo dexennio do sec. 16°, inte 'n'œuvieta da-o tittolo Nic. Copernici de hypothesibus motuum cælestium a se constitutis commentariolus, ch'a circolò manoscrita tra i contempoannei (e foscia o Martin Lutero o n'ebbe notiççia, se into 1539 o parlò de un "nœuvo astronnomo" comme de "un matto"), ma che da pœu a l'andò smarria e a fu ritrovâ solo into 1877. Into Commentariolus o l'espoñe in forma de postulæ i prinçippi do so scistema mostrando, sença dâne pe-o momento prœuva matematica, comme segge ciu semplixe a spiegaçion di fenommeni çelesti mediante l'ipottexi eliostatega, percose questa a recedde un meno nummero de sfee pe rende conto di moti oservabili di pianeti e de l'âternâse de giorno e nœutte e de staxoin, co l'ammiscion da rotaçion diurna e da rivoluçion annoa da Tæra, e a "declinaçion" (inclinaçion) do so asse rispetto a l'orbita.
O volumme ciu ampio, co-e dimostraçioin e a modiffica tecnica de l'uzo de 'n epiciclo insce 'n eccentrico ançiché de doi epicicli, o fu o De revolutionibus orbium caelestium, a-o quæ o Copernico o travagiò pe-o resto da vitta. I sei libbri de l'œuvia ean za completi quande inta primaveja do 1539 Gioacchin Retico, professô a Wittenberg, o se recò da-o Copernego pe conoscine a dotriña, e za o cardenâ Schönberg e l'amigo vesco Tiedemann Giese aveivan exortao o Copernico a pubbricâ l'œuvia. Coscì lê o concesse primma a-o Retico de fâ sciortî a Dançiga, into 1540, un'espoxiçion do so scistema, De libris revolutionum Narratio prima (subbito ristampâ into 1541, l'anno into quæ o Melanton o parlò da stravagança de 'n "astronnomo sarmattego ch'o mescia a Tæra e o l'inmobilizza o Sô"), afiandoghe da pœu coppia do manoscrito do De revolutionibus, pe fâlo stampâ a Noemberga presso o Petreio, quande o Rettego into 1541 o tornò in Germannia.
Ma o Retico, transfeiose a Lipsia into 1542, o l'affidò a revixon da stampa a l'amigo teollogo Dria Osiander. O Copernico o l'ea zœumoæ marotto: o feççe ancon in tempo a fâ inserî a so dedica a-o pappa Paolo III, ma o no poette impedî a l'Osiander de fâ stampâ, anonnima, una so premissa Ad lectorem. Se, comme dixe a lezendia, O Coernego o l'ebbe in sce-o letto de morte a primma coppia a stampa do so caolao, quella coppia za a contegniva coscì i equivvochi che pe ciu che 'n seccolo marcon o "copernicaneximo". A premissa de l'Osiander, de fæto, a prezentava l'ipottexi elioçentrega comme semplixe accorzimento matematico, sença valô fixico, mentre inta dedica a-o pappa o Copernico o l'inscisteiva in sce-o scignificao cosmologico da so teoria. A l'Osiander se refaiâ o cardenâ Bellarmin, into van tentativo de vegnî incontro a-o Foscarin e a-o Galileo, durante o processo do 1615-1616, ch'o finì co-a condanna do copernicaneximo da parte da Gexa cattolica.
![](http://upload.wikimedia.org/wikipedia/commons/thumb/f/fb/CopernicusHouse.jpg/220px-CopernicusHouse.jpg)
A-o Copernico cosmologo, otra che matematico, amiava invece segge o Keplero che-o Galileo. E l'è in sce sto ponto che polemizziâ copernichen e anticopernichen, ascì quande questi urtimi (tra i quæ o Reinhold, aotô de Tabulae Prutenicae, e o Tycho Brahe se servin de l'ipotexi copernicaña pe-i carcoli. Questo o l'è decixivo pe valutâ o contributo do Copernico a l'astronomia e a-a sciença moderna, sciben che za a-i tempi de l'Astronomia nova (1609) do Keplero ben poco arestesse di risurtæ tecnichi do Copernico, ancon ligæ a l'uniformitæ e circolaritæ di moti çelesti. Do resto, a texi eliostatica, za prezente inti Pitagoreghi e in Aristarco de Samo, a no l'ea 'na novitæ assoluta. E l'"umanista" Copernico o n'ea de seguo a-o corente, coscì comm'o l'ea informao de ripreize ermetiche e di "entuxiasmi" pe-o Sô do neoplatonismo rinascimentâ (fu famozo o De Sole do Marsiggio Fixin), e foscia za a Cracovia l'ea zonto a Copernico nœuva da texi do Nichiozo Oresme in sce-a rotaçion terestre.
Ma questi pù importanti sfondi corturæ no bastan pe rende conto da specifiçitæ de l'œuvia do Copernico; comme do resto no l'è suffixente, sciben segge stæta foscia decixiva inte l'indúlo a çercâ de nœuve vie, manco a convinçion neoplatonica, da lê condiviza, circa a sempliçitæ matematica de l'universo, a quæ a comporta l'armonia e a scimmetria de parte. L'ea tâ convinçion a fâghe apparî i tolemæghi comme di artisti che, pigiando a modello de membre pe lô belliscime ma de corpi despægi, ritraessan "un mostro ançiché 'n ommo". Questi sfondi metafixichi son de seguo in dœuvia into Copernico, perché una metafixica a l'è sempre a-o travaggio inta riçerca scientifica: ma a so œuvia a nasce ascì da un impegno ciu tecnico, da 'n confronto da so ipottexi co-e costioin astronommeghe e cosmologiche che-a so epoca a l'aiva ereditao da-o passao. O scistema tolemægo o l'aiva di difetti tecnichi za rilevæ primma ancon do Copernico; e lê, into 1497 a Bologna, o l'aiva prez. avúo moddo de constatâ che l'osservaçion a smentisce a teoria lunâ do Tolomeo. E pe tutta a vitta o Copernico o faiâ di osservaçioin no numerose ma sempre orientæ a mostrâ o megio accordio de l'esperiença con l'ipotexi eliostatica, perché una teoria astronomica a deve "sarvâ i fenommeni" sença renonçiâ a quelli prinçippi che-o Copernico o condividde co-i antighi: circolaritæ e uniformitæ di moti çelesti. L'ea invece proppio tæ prinçippi a êse pe lê violæ da l'introduçion tolemaica di "çerci equanti".
In tutto ço gh'ea di motivi tecnichi decixivi ò pe complicâ ancon de ciu a spiegaçion tradiçionâ di moti çelesti ò pe tentâ una spiegaçion radicalmente innovativa de questi, passando da-o geocentrismo a l'eliocentrismo. L'originalitæ de Copernico a fu de afrontâ a nœuva stradda, avendo o coraggio d'andâ contra corente e scancellâ a distinçion tippica de l'insegnamento do so tempo, e fruto de una tradiçion antiga, tra a dotriña di naturales e quella di mathematici. Liatri gh'aivan in comun solo che-o geocentrismo e l'uniformitæ di moti: ma mentre i segondi se rifaxeivan a l'Almagesto e a-o so scistema de epicicli e çerci deferenti, pe calcolâ e poxiçioin di astri e controlâle da pœu co l'osservaçion, i primmi amiavan invece a-o scistema de sfee omocentriche de Eüdosso e de Aristotele.
Questo o l'ea un scistema cosmologico, ch'o dava un'inmaggine fixica do mondo (a mæxima imaggine che s'atrœuva, prez., inta Diviña Commedia), ma ch'o no poeiva spiegâ astronomicamente a despægia distança, in tempi despægi, di pianeti da-a Tæra. O scistema de l'Almagesto, a-o contraio, pù "sarvando" megio i fenommen, no poeiva dâ affæto un'inmaggine reâ de l'universo, perché deferenti (concentrichi ò eccentrichi) e epicicli no ean fixiçizzabili inte de sfee solide e impenetrabile. Coscì cosmologia e astronomia, inte l'antighitæ e into medioevo, ean paradossalmente separæ e ço ch'o l'ea veo pe l'uña o no l'ea veo pe l'âtra.
A genialitæ do Copernico a stà inte l'avei realizzao a scintexi d'astronomia e cosmologia attraverso l'eliocentrismo, inçando a quello cangiamento de prospettiva ch'o portò da pœu a l'unificaçion de fixica çeleste e fixica tereste. Una prospettiva no solo metafixica (comme fu quella do copernican Giordan Brun), ma co l'exigença tipica da sciença moderna: o controllo rigoozo de teorie co l'esperiença.
O Copernico o dette un contributo apprexabile a l'economia ascì. Into De monetæ cudendæ ratione, fruto da so esperiença de aministratô, l'è prez. formulao ciæamente o prinçipio (dito da pœu "lezze de Gresham") che-a monæa gramma a caccia quella boña.
Colegaménti esterni
[modìfica | modìfica wikitèsto]Wikimedia Commons a contêgne di files in sce Nichiozo Copernico
Contròllo de outoritæ | VIAF (EN) 71389288 · ISNI (EN) 0000 0001 1029 0900 · SBN (IT) CFIV036566 · LCCN (EN) n79039943 · GND (DE) 118565273 · BNF (FR) cb118976048 (data) · BNE (ES) XX1721463 (data) · NLA (EN) 35031073 · BAV (EN, IT) 495/19988 · CERL cnp01471426 · NDL (EN, JA) 00464903 · WorldCat Identities (EN) n79-039943 |
---|