Maja Tonieta
ZE-P
|
Sta paggina chie a l'è scrita in zeneize, co' ina grafia tipo quella do Prian do 1745 |
![](http://upload.wikimedia.org/wikipedia/commons/thumb/6/68/Marie-Antoinette_par_Elisabeth_Vig%C3%A9e-Lebrun_-_1783.jpg/220px-Marie-Antoinette_par_Elisabeth_Vig%C3%A9e-Lebrun_-_1783.jpg)
Maia Tonieta (fr. Marie Antoinette, td. Maria Antonia) d'Asburgo-Loreña , reña de França, (2 Novembre 1755 – 16 Otobre 1793).
Vìtta
[modìfica | modìfica wikitèsto]A nascette a Vienna o 2 novembre 1755 da Françesco I de Loreña e da Maia Texo. In vista de quell'union co-o drafin de França ch'a doveiva coonâ i nœuvi raporti tra França e Aostria, doppo l'imbosamento di aliançe, a so educaçion a fu afidâ a l'abao de Vermond, çernuo da-o ministro françeize ducca E.-F. de Choiseul. A fu domandâ ófiçialmente in spoza o 16 arvî 1770. Çinque giorni doppo, a partiva da Vienna, e o 14 de mazzo a s'incontrava co-o Luigi XV e co-o Drafin inte vexinançe de Compiègne. E noççe fun celebræ a Versagge o 16. Daprimma a graçia figioesca da Maja Tonieta a conquistò tutti, ma fito incomençò i dissensci e e dificortæ. De raxoin de dignitæ e de morâ son sufixente a spiegâ a repugnança che-a Maja Tonieta a dimostrò verso a Du Barry, raxoin de gratitudine giustiffican e so scimpatie pe-o Choiseul, artefixe do so maiezzo; ma de tutto questo aprofittò i seguaxi do ministro pe acaparrâ a drafiña e mescciâla inte 'na lotta inta quæ dignitæ e morâ no gh'intravan pe ninte. L'ostilitæ contra a favoiia Du Barry a creò da prinçipio a-a Maja Tonieta una larga popolaritæ. Ma a morte do Luigi XV a trovò a nœuva regiña ancon dixinovenne, impreparâ comme o majo a soportâ e responsabilitæ da coña.
Da questo momento ebbe començo quello periodo de discipaçion ch'o fu fatâ a-o so prestiggio e a-o so bon nomme: no solo i balli e e partie de piaxei, ma ascì di capriççi ciu dispendioxi comme l'acatto de gioielli e o zœugo. Inconsciente do peigo, a no dœuviò arcun discernimento inta çernia di amixi. A so scimpatia pe-o conte d'Artois, o favô e a familiaritæ concessa a-a prinçipessa Maia Texo de Lamballe e sorvetutto a-a cricca ch'a fava cappo a-a contessa de Polignac, ghe creon di implacabili nemixi inte gren famigge aristocratteghe, e de riflesso dettan origine a l'ostilitæ popolâ. Da-a corte començò a feroxe campagna contra l'"aostriaca" ch'a l'acompagnò scin a-o patibolo.
A so legereçça e a so imprevidença davan bon zœugo a-i aversai. Inte un momento d'aguçça crixi finançiaia, sciña de speize no enorme, comme o ristabilimento da càrega de sovrintendente da caza da regiña, a benefiçio da Lamballe, e i abellimenti do Picceno Trianon, ean sença dubbio inoportuñe, e a calunnia a poette façilmente ezagerâle scin a fâle aparî delittooze. A-e so amixiççie Maja Tonieta a l'arestò fedele con orba ostinaçion. L'influença di Choiseul a-a trasse a-a scandalosa proteçion do conte de Guines; a-a feççe aliâ co-o conte J.-F. Maurepas contra J. Turgot; a-a misse in urto co-o megio ministro do Loigi XVI, Ch. de Vergennes. A nascita da primma figgia, e da pœu quella do drafin, a parse ricondúla a una vitta ciu assennâ; ma a no seppe manco aloa deliviâse da-i Polignac, e l'odioxitæ de so inframettençe, comme pe-a nomina de Ch.-A. Calonne e do marcheize de Castries, a recheite in sce-a regiña.
L'intenscitæ di oddi acumulæse contra a Maja Tonieta a l'aparse into celebre afâ da collaña. A contessa De la Motte, fâscificàndo de lettie da regiña, a feççe credde a-o cardinâ de Rohan de êse incaregâ da quella de l'acatto segretto de 'na collaña de gran prexo; e pe megio convinçilo a ghe procuò un apontamento notturno con una sosia da regiña. O cardinâ o se feççe garante presso i gioiellê. Descoverto l'intrigo, o re o vosse a pubbriçitæ do processo; a De la Motte a fu condannâ, ma o cardinâ o l'ebbe una trionfâ assoluçion ch'a fu un corpo mortâ a-o prestigio da reña.
Durante a rivoluçion, a deboleçça do re a costrenzè a Maja Tonieta a assumme una parte direttiva. Ma s'a dette prœuva de 'na gran força de carattere, a mancò do tutto de ciaroveggença e de cegæçitæ. A no seppe ò a no poette guaagnâ e indecixoin do maio, e manco e proppie antipatie. A l'açettò con repugnança l'agiutto do Mirabeau, ma a no ne seguì i conseggi. Doppo Varennes a començò de trattative co-i constituçionæ ma a-e anullò praticamente, sconfessandole presso e corte œüropee. A refiò a ciu ripreize l'apoggio de La Fayette, a respinse Dumouriez. Doppo o 10 agosto 1792, e ciu doppo l'oçixon do re, tutto l'oddio di rivoluçionai o se rovesciò contra de lê ch'a l'ea stæta imprexonâ, scin da-o 13 agosto 1792, into Tempio. O 1° agosto 1793 a Convençion a decize o so processo, e o giorno segoente a fu transfeia da-o Tempio a-a Conciergerie. O 14 d'ottobre ebbe inandio o dibattimento, ch'o duò doi giorni. A-i zuæ fu posto quattro quexii, rigoardanti l'existença d'intelligençe coi nemixi esterni da repubbrica e de 'n complotto pe provocâ a guæra civî, e a parteçipaçion de l'acuzâ. A risposta a fu afermativa, a l'unanimitæ, e a Maja Tonieta a fu condannâ a-a peña de morte, ch'a fu esegoia o 16 d'ottobre, a 12 oe.
Nonostante e calunnie co-e quæ se çercò de denigrâ a regiña, a donna e sciña a moæ, into dâ un giudiçio in sce-a Maja Tonieta l'è ciu giusto parlâ de erroî che de corpe. Carattere impurscivo, ostinao, che 'n'educaçion troppo indulgente a no l'aveiva saciúo modificâ, sposa a 'n zove ch'o l'impiegò dotrei anni a superâ a proppia timideçça fixica e o no l'ariescì mai a guâgnâ quella morâ; sença un solo consegê dexinteressao ch'o-a rafrenesse e a dirizzesse (a moæ a ghe dava di ottimi conseggi, ma a voeiva sorvetutto che lê a servisse a-i fin da politica aostriaca) a divègne façile preiza e vittima de façioin che scciancavan Versagge.
D'indole diametralmente oposta a quella do maio, a no l'ebbe con lê che 'n ponto de contatto: l'odio de l'etichetta, e comme lê a no vidde che o çeimoniâ do Loigi XIV o l'ea un di pilastri da vegia monarchia. Sciben ch'a se diciaresse scinceamente françeize, a no l'acapì l'añima da so nœuva pattria, e inta societæ ch'a-a circondava e so scimpatie andon a-i elementi pezoî: quelli nobbili inconscienti e fàttoi che spendeivan e so energie inti piaxei e inte cabbale de corte, di quæ se pœu, aomanco pe 'n çerto tempo, pigiâ comme tipo o conte d'Artois. Inta crixi supremma a pensò de sarvâ a coroña co l'agiutto do strangê; a no vosse, aomanco pe scin che visse o Loigi, ni l'invaxon armâ, ni a guæra civî, ma a no compreize che l'intervento militâ o l'ea 'na conseguença inevitabile de quello diplomatego. A dignitæ davei regâ co-a quæ a percorse o so carvaio de dô a l'obriga a-a reverença, ma se deve riconosce che i so erroî contribuin a preçipitâ a catastrofe da monarchia.
Atri progetti
[modìfica | modìfica wikitèsto]Wikimedia Commons a contêgne di files in sce Maja Tonieta
Contròllo de outoritæ | VIAF (EN) 96583693 · ISNI (EN) 0000 0001 2144 5058 · SBN (IT) RAVV049069 · LCCN (EN) n80038420 · GND (DE) 118577905 · BNF (FR) cb12106345v (data) · BNE (ES) XX831238 (data) · ULAN (EN) 500122363 · NLA (EN) 35788023 · BAV (EN, IT) 495/85022 · CERL cnp00908024 · NDL (EN, JA) 00621070 · WorldCat Identities (EN) n80-038420 |
---|