Werkhoven

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Werkhoven Gewaeze gemeinte in Nederlandj
Gevörmp	?
Opgehaeve	1964
Opgegange in	Bunnik
Provincie	Utrech
Hoofplaats	Werkhoven
Opperflaakde (bie opluffing)	16,61 km²
– daovan water:	? km²
Inwoeners (kort veur opluffing)	1.578 (1960)
– deechde:	95,0/km²
Lies van börgemeisters

De Brink in Werkhoven

Kestiel Beverweerd.

Werkhoven is e dörp in de Nederlandse gemeinte Bunnik, gelege in 't zuidooste vaan dees gemeinte. Mèt zoe'n 2.700 inwoeners is 't 't kleinste vaan de drei kerne in de gemeinte. Werkhoven ligk aon de Kromme Rijn en d'n N229. Naoberdörper zien Odijk (noordnoordweste), Driebergen-Rijsenburg (noordnoordooste), Langbroek (ooszuidooste), Cothen (zuidooste), 't Goy (zuidzuidweste) en Houten (weste). Werkhoven waor tot 1964 'n apaarte gemeinte.

Aonzien en karakter

Werkhoven versjèlt väöl vaan Bunnik en Odijk, de aander twie dörper in de gemeinte. Boe die twie zier kort tegenein ligke, vint me Werkhoven op e paar kilometer aofstand vaan Odijk aon 't zuidoostelek ind. Door zien rillatief aofgelege positie heet Werkhoven ouch zie lendelek karakter mie behawwe. 't Is gei forenzedörp geweure meh heet veural nog zien inheimse, vaanajds agrarische bevolking. Heidoor is 't ouch e stök kleinder es Bunnik en Odijk.

D'n historischen dörpskern vaan Werkhoven ligk aon de brink en aon d'n awwe straotweeg, noe nog bekind es de Herenstraat. 't Aajd dörp is sinds 1966 besjermp dörpsgeziech. Aon de brink vint me oonder mie 'n twelfdeniewse romaanse dörpskèrk, die sinds de rifforamtie hervörmp is. Wijer nao 't noorde, aon de geneumde Herenstraat, steit de neogotische Slevrouwekèrk. Noordelek vaan 't dörp vint me 'n aw koremeule, Rijn en Weert, zuielek vaan 't dörp 'ne watertorie oet 1937. Zoewel in es boete 't dörp gief 't aonzienleke boerderije. Bij Werkhoven ligk ouch 't kestiel Beverweerd. In totaol heet Werkhoven 21 rieksmonuminte en diverse gemeinteleke monuminte.

Historie

Werkhoven weurt veur 't iers in 'n achsteniewse akte geneump es UUercundia. Ouch es Uuerken duuk 't al vreug in de historie op. De bouw vaan de Stevenskèrk in d'n twelfden iew (noe dörpskèrk, zuug bove) maak van Werkhoven 'n zelfstendege parochie. Tot 1964 waor Werkhoven 'n apaarte gemeinte, die evels al sinds jaor en daag 'ne börgemeister en 'n amteleke organisatie deilde mèt Bunnik en Odijk.

Historische inwoenertalle

Aanders es Bunnik en Odijk is Werkhoven veural natuurlek gegreujd. Daodoor vint me hei nao d'n Twiede Wereldoorlog 'ne rillatief besjeie greuj.

Jaor Aontal Greuj (gans Utrech) 1830 748 1839 794 +6,1% (+9,7%) 1849 810 +2,0% (+2,9%) 1859 863 +6,5% (+7,0%) 1869 886 +2,7% (+8,6%) 1879 932 +5,2% (+10,4%) 1889 949 +1,8% (+15,3%)

Jaor Aontal Greuj (gans Utrech) 1899 977 +3,0% (+13,6%) 1909 940 -3,8% (+14,9%) 1920 901 -4,1% (+18,7%) 1930 987 +9,5% (+18,9%) 1947 1.198 +21,4% (+35,0%) 1956 1.344 +12,2% (+29,2%) 1960 1.578 +17,4% (+7,4%)

Rillatief oontwikkeling vaan 1830 tot 1971

(v₁₈₃₀=100)

Greun: gemeinte Werkhoven
Blauw: provincie Utrech

Waope

De gemeinte gebruukde 't volgend, neet-officieel waope (zuug de tabel):

In lazuur (blauw) e steigerend peerd, gesupporteerd door twie samegeboonde palmtek, alles vaan zèlver (wit).

Dit waope is in 't nui waope vaan de fusiegemeinte Bunnik euvergenome, evels zoonder de palmtek. 't Steit in 't veerde kerteer.