Ontario
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
![](http://upload.wikimedia.org/wikipedia/commons/thumb/5/5c/Ontario_in_Canada.svg/220px-Ontario_in_Canada.svg.png)
Ontario is 'n pervinsje in 't centraal-oeastelik deil van Canada mit 'n oppervlakdje van 1.076.395 km². 't Bevolkingsaantal ligk róndj de 14,7 miljoen (2020), waat mieër es ei derdje vanne ganse bevolking van 't landj is. De houfstad van Ontario is Toronto. Ouch de houfstad van 't landj, Ottawa, ligk in dees pervinsje.
Qua bevolkingsaantal is Ontario de grótste pervinsje van Canada; kwa oppervlakdje de op ein nao grótste, nao Québec. Ontario grens in 't wèste aan Manitoba, in 't oeasten aan Québec en in 't zujen ane Amerikaanse staote Michigan, Nuuj-York, Ohio, Pennsylvanië en Minnesota. 't Grótste deil vanne grens mitte Vereinigdje Staote wuuert gevörmp door water, worónger de Lake of the Woods, de Groeate Maeren enne Saint Lawrence. Ontario is de insigste Canadese pervinsje die grens ane Groeate Maere.
De naam vanne pervinsjen is aafgelèdj van 't Ontariomaer; 't waord Ontario zelf kump oet 't Huron en mèntj "groeat maer". Ontario is ein vanne veer oearsprunkelike pervinsjes bieje oprichting van Canada in 1867. Allewiel ligk 't geografisch gezeen halverwaeges tösse de oeastelike Atlantische pervinsje Newfoundland en Labrador enne wèskuspervinsje Brits-Columbia.
Ontario is 't wichtigste ikkenomisch centrum van Canada en vörmp 't verstejjelikste gebied van 't landj ane zuudrandj, dewiel 't naorde juus besteit oet ónaangeraakdje netuur en knap bevolk is. Me vindj in 't naorde väöl maeren en oetgestrèkdje bus. Ouch de Niagarawatervalle ligken in dees pervinsje.