Brahma
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Brahma is eine vaan de väöle hindoestaonse gaoje en euvereges eine vaan de belaangriekste. Heer steit bekind es de sjöpper en weurt ouch wel pitamaha genömp, wat groetvajer meint. Hindoes besjouwe Brahma es de veurawwer vaan alle gaoje en demone. Heer woort volges dees relizjie gebore oet e gaw äöf en sjeep de Eerd en gans en al dao-op. In inkel later hindoestaons lezjendes weurt verhaold tot Brahma oet 'ne lotusblóm woort gebore dee oet de navel vaan Vishnu greuide. De meiste Hindoestaone höbbe de veurkäör veur de gaw äöf-theorie. Brahma is ouch de god dee de priesterklasse vaan de hindoestaone representiert en de Brahmaone weure genömp. Brahma waor zoen doezend jaor laank de veurnaomste god vaan 't hindoeïsme, in de periood vaan 500 veur Christus bis 500 nao Christus, meh naomaot 't hindoeïsme ziech oetbreijde en verandere, nom Brahma neet zoene centraole plaots mie in in de hindoeïstische veriering wie Shiva, Vishnu en de Groete Godin. Allewijl gief 't gein riechting binne 't hindoeïsme boe-in allein Brahma verierd weurt, meh alle tempels die aon Shiva of Vishnu gewied zien, höbbe ouch pleetjes vaan Brahma. Brahma weurt dèks aofgebeeld mèt veer geziechte en veer erm en steit dèks oppe troen dee d'r oetzuut wie 'ne lotusblóm.