Kamermeziek
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Kamermeziek is meziek mèt 'n relatief klein bezètting, in tegestèlling tot orkesmeziek (boe 'ne zaol, gein kamer, veur nujeg is). De voesregel is minder es tien oetveurende; meziek mèt mer eine oetveurende weurt soms geine kamermeziek geneump. De term weurt veural in de contex vaan instrumentaole klassieke meziek gebruuk.
Kamermeziek es apaart genre kaom op in de barok. 't Gaof toen ensemblemeziek veur versjèllende instrumintecombinaties, meh ouch ummer mie sonnate veur solo-instrumint (meistens de viool) en basso continuo, zoewie triosonnate veur twie instruminte (miestal twie viole) en basso continuo. Wie de becieferde bas bij d'n euvergaank vaan barok nao rococo laankzaam meh zeker verdween, kaome nui genres op. 't Belaankriekste vaan die genres is 't striekkwartèt, wat sinds Haydn es de mies veuraonstoonde vörm vaan kamermeziek gelt; aander nui genres waore beveurbeeld 't striekkwintèt (o.m. bij Mozart) en kwartètte, kwintètte etc. veur blaosinstrumint en striekers (e hobokwartèt heet beveurbeeld 'n bezètting vaan 'nen hobo en drei striekers) zoewie klaveertrio's, -kwartètte etc. mèt e klaveer en mierder striekers. De solosonnaat bleef bestoon, meh 't klaveer kreeg noe 'n concerterende rol (neet mie es akkoorde speulend begeleiingsinstrumint). Versjèllende componiste vaan de romantiek conmponeerde ouch gere kamermeziek, neet in 't minste umtot orkestraol genres wie de symfonie door 't werk vaan Beethoven es al te belaoje golle. Bezunder weerdevol is 't werk vaan Johannes Brahms. Ouch väöl twintegsten-iewse componiste componeerde veur kamerbezèttinge.
Speciaol vermelling verdeent 't kamerorkes. Dit is 'n ensemble wat dèks mer oet 'ne speuler of vieftien besteit, en boe-in soms de partije, wie in de kamermeziek, inkelvoudeg zien bezat. Wie de naom al zeet make zoe'n ensembles orkesmeziek, meh neet zelde is de relatie mèt en inspiratie oet de kamermeziek dudelek te merke.