Zweeds
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
![](http://upload.wikimedia.org/wikipedia/commons/thumb/9/99/Svenska_spr%C3%A5kets_utbredning.png/170px-Svenska_spr%C3%A5kets_utbredning.png)
't Zweeds (svenska) is 'n Noeardj-Germaanse of Scandinavische spraok mit zoeaget 9 miljoen spraekers. 't Is de ieëste spraok van Zwede (8,8 miljoen spraekers) en ein van de officieel spräök van Finlandj (300.000 spraekers). In de Finse autonoom provincie Åland is 't zèlfs de einige officieel spraok.
't Zweeds is nej verwantj mit de anger twieë Scandinavische spräök van 't vastelandj, Deens en Noors. 't Zweeds en 't Noors, en in get minder maote 't Deens, zeen óngerling redelik good verstaonber. Sommige wäördj zeen anges, meh grammaticaal kómme de spräök bao gans euverein. De spelling is wael versjillendj. Zoea liek de Noorse spelling mieë óp 't Deens.
De waordesjat van 't Zweeds besteit bao gans oet Germaanse wäördj. Waal zeen d'r get lieënwäördj oet 't Letien, Frans en Nederduits (ouch 'n Germaanse spraok). Taengewuuerdig waere d'r väöl wäördj oet 't Ingels euvergenómme, den aangepas, den letterlik euvergezat (lieënvertaling).
Kènmerkendj veur de oetspraok van 't Zweeds is de melodie: 't is 'n toeantaal. d'r Zeen twieë versjillendje toeanaccente en dees kènne beteikenisóngersjeidendj zeen. 't Waordj anden beteikentj zoea, aafhankelik van de intonatie, "de aenj" of "de geis". Wie de toeanaccente waere oetgespraoke is stèrk aafhankelik van wo de spraeker vanaaf kömp. In 't zuje óngersjeid me de toeane mieër in de lingdje es in de toeanhuuegdje. Boetedet wuuertj e waordj allein mit e toeanaccent oetgespraoke wen 't 'n belangrieke grammaticaal functie in de zin haet.
De standerdtaal is 't Riekszweeds (rikssvenska) en die is gebaseerdj óp de dialectenróndj Stockholm en 't Mälardaal. Anger variante van 't Zweeds zeen 't Finlandj-Zweeds, 't Elfdaals en 't Eslandj-Zweeds.
Extern linke
bewirk- De Zweedse Wikipedia
- Zweedse grammair
- Swedish 101 Learn Swedish online