Protogermanica
![](http://upload.wikimedia.org/wikipedia/commons/thumb/6/65/Germanic_dialects_ca._AD_1.png/300px-Germanic_dialects_ca._AD_1.png)
La lingua protogermanica ia developa en Scandinavia sude (Danmarc, Sveria sude, Noria sude), la orijin suposada de la tribus germanica. Posible, los ia ariva ala per la milenio du aec temprana como un estende de la cultur de vasos cordida, o plu temprana con la cultur de vasos embutin. La tribus ia pote es influeda par xasores-coliores ja en la area, posible parlores de un dialeto de protouralica, o ia encontra noncultivores protoindoeuropeanes cual ia ariva an plu temprana. La popla protogermanica ia es probable un parte de un move de un ramo ueste de la protoindoeuropeanes cual inclui la protocelticas e protoitalicas, e ia partisipa en alga cambias de Protoindoeuropean (PIE) orijinal tipal de esta grupos.
Protogermanica ia es, en realia, un estende de dialetos, probable intercomprendable con lunlotra, an si no con la popla celtica o italica, e an plu probable no con la popla baltica. En la sentenios aec, alga tribus germanica ia comensa migra a sude, e la dialetos ia comensa difere de lunlotra. Per la sentenios ec, la dialetos pote es reconoseda como tre linguas (cual ia es se mesma estendes de dialetos): la germanes norde (pe la norsces e dansces), la germanes este (pe la gotos e vandales), e la germanes ueste (pe la francos e sasones). Tradisional, la germanes ueste ia es plu divideda entre la germanes de la Reno e Weser, germanes de la Elbe, e germanes de la Mar Norde. An ce lo es un simpli, on pote dise ce la eda de protogermanica ia fini ante esta divides de la dialetos, sirca la sentenios prima aec e ec.
Contata temprana con linguas uralica - probable protosuomi o protosami - es mostrada par parolas de protogermanica emprestada par la uralicas. Contata con la cultur La Tene, un cultur sofistica de la celtas a la Reno e Danubio, ia resulta en un colie de parolas en germanica cual deriva de la linguas celtica. Simil, contata con la tribus baltica e slavica a la este ia resulta en parolas en acel linguas prendeda de la germanes.
On no ave testos scriveda en protogermanica, natural. La plu vea ia es la Biblia Goto, scriveda en la sentenio 4 ec par cristianes goto ci ia fuji la scitianes par move a la Balcanes en 348 ec. La testos plu vea en protonorsce ia comensa sirca 400 ec en enscrives runica. En germanica ueste, la plu vea testo es la enscrive Bergakker en franco, sirca la sentenio 5 ec. La natur de protogermanica debe es descovreda par esamina la linguas germanica moderne e compara los con un an plu vea lingua reconstruida, PIE, la asendente multe linguas moderne de Europa e Asia.
Alga cambias compartida con otra ramos de PIE ueste inclui estas:
PIE ueste ia deveni un lingua "centum", pd la "palatovelal esplodentes" /k'/, /g'/, e /g'h/ ia deveni /k/, /g/, /gh/. Pe, *k'mtom ("100") deveni *kmtom (e plu tarde *hunda)
PIE ia ave "sonorantes silabal", pd formas de /m/, /n/, /l/, e /r/ usada como vocales. La desendentes de PIE tende ajunta un vocale per simpli la pronunsia. En la caso de protogermanica, la vocal ia es /u/, pe *kmtom deveni *kumtom (plu tarde *hunda); *nter ("interna") deveni *unter (plu tarde *under ("entre")).
PIE ia ave un grupo de tre "larinjeales", la natur vera nonconoseda, cual es suposada cuando linguistes ia descovre la natur de hitita. Jeneral, los ia desapare, pe *h1dontm ("dente") deveni *dontum (e plu tarde, *tanþ). Ma lo ia afeta cualce vocales prosima. /h1e/ resta como /e/, /h2e/ deveni /a/, /h3e/ deveni /o/; pos la vocal, la larinjeal causa un longi de la vocal resultante. Pe *h2enti ("a ante") deveni *anti, cual deveni plu tarde *andi ("ajunta").
Protogermanica ajunta plu cambias:
[edita | edita la fonte]Plu tarde, en cuando la tribus protogermanica ia es separada de otra ramos de PIE, otra cambias ia causa la cualias plu distinguinte de la protogermanica. La cambias la plu bon conoseda es los de la lege de Grimm: /p/ deveni [ɸ] (scriveda tradisional como [f]), /t/ deveni [θ] (scriveda [þ]), e /k/ deveni [x] (scriveda [h]). Pe, *ph2ter ("padre") deveni *fader, *tod ("acel") deveni *þat, e *katus ("combata") deveni *haþuz.
Pos esta cambias, la esplodentes vosida ia prende la locas de la nonvosida: /b/, /d/, /g/, e /gw/ deveni /p/, /t/, /k/, /kw/. Pe *h1dontm ("dente") deveni *tanþu. E alora, la esplodentes vosida aspirada ia deveni esplodentes simple: /bh/, /dh/, /gh/, /gwh/ deveni /b/, /d/, /g/, /gw/. Pe *ghans ("ganso") deveni *gans.
Pos la aplica de la lege de Grimm, la linguas germanica ia aplica la lege de Verner: fricantes sin vose ia deveni fricantes vosida (o un esplodente vosida, en alga situas) pos un silaba nonasentuada: /ɸ/ > [β/b], /θ/ > [ð/d], /x/ > [ɣ/g], /xʷ/ > [ɣʷ/gw], e ance /s/ > [z]. Pe PIE *bhreh2ter ("frate") deveni *broþer cual deveni *broðer (como engles "brother" o nederlandes "bruder").
Vocales ance ia cambia. Per esemplo, /o/ e /a/ ia combina per formi [ɑ]. Ance, /e/, /a/, /o/ ia es cadeda cuando final.
Multe importante, la asentua, cual en PIE pote cambia con cambias de gramatica e ave un forma musical, ia es alora aplicada a la silaba prima de la radis (ma nunca sur un prefisa). Esta move de la asentua ia resulta en la simpli o cade de multe fonemes o silabas final de parolas. Pe, /n/ es cadeda cuando final, ma nasali la vocal a ante - e esta aveni pos multe finis con /m/ ia es cambiada a /n/.
Per la comensa de la milenio prima ec, la cambias de sonas cual es comun a la linguas germanica de oji ia aveni. Lo ia comensa como un lingua con un fonolojia rica en esplodentes a un lingua con multe fricantes; lo ia perde sua asentuas musical e movable per un asentua a la silaba prima; Lo ia perde multe de sua silabas nonasentuada e final; lo ia developa vocales nasalida (cual lo ta perde plu tarde); e lo ia comensa la developa de la umlaut, pd la cambia de vocales de la radis como la resulta de la vocales de un silaba final cual no esiste plu, como en engles goose e geese ("ganso/s").