Polio
![](http://upload.wikimedia.org/wikipedia/commons/thumb/5/57/Polio_lores134.jpg/220px-Polio_lores134.jpg)
Polio (ance nomida paralise infantal, o plu tecnical, poliomielite) es un maladia infetal causada par la poliovirus. En sirca 0.5% de casos on ave debilia de la musculos, resultante en un perde de move. Esta pote aveni tra alga oras a alga dias. La debilia envolve la plu comun en la gamas, ma pote ance envolve la musculos de la testa, colo, e diaframa. Multe persones recovre. En los con un debilia de musculos, sirca 2-5% de enfantes e 15-30% de adultes mori. Un otra 25% de persones ave sintomes minor como febre e un garga dolente, e a 5% ave un dole de testa, rijidia de la colo, e doles en la brasos e gamas. Esta persones tipal recovre entre un o du semanas. En a 70% de infetas no resulta en sintomes. Anios pos recovre, un sindrom pospolial pote aveni, con un developa lente de debilia de musculos simil a lo de cual la person ia sufri de la infeta orijinal.
La poliovirus es tipal sperdeda de person a person tra materia fecal infetada entrante la boca. Lo pote es sperdeda par comedas o acua cual conteni feces umana, e min comun de saliva infetada. Los ci es infetada pote sperde la maladia per a ses semanas, an si no sintomes es presente. La maladia pote es diagnoseda par trova la virus en a feces o par deteta la anticorpos contra lo en la sangue. La maladia aveni natural sola en umanas.
La malada es prevenable con la vasina per polio; ma dosas multiple es nesesada per es efetosa. La Sentros per Controla de Maladias en la SUA recomenda ce viajores ave refortintes de la vasina; ance per persones ci vive en paises en do la maladia es aveninte. Pos infeta, no trata spesifada esiste. En 2016, on ave 37 casos de polio normal, e sinco casos de polio derivada de la vasina. Esta es multe min ca la 350,000 casos normal en 1988. En 2014, la maladia ia es sperdente sola entre persones en Afganistan, Nijeria, e Pacistan. En 2015, Nijeria ia para la sperde, ma lo reaveni en 2016.
Polio ia esiste per miles de anios, con depintas en arte antica. La maladia ia es prima reconoseda como un problem distinguida par la dotor medical engles, Michael Underwood, en 1789, e la virus cual causa lo ia es prima identifiada en 1908 par la imunolojiste osteraices, Karl Landsteiner. Avenis major ia comensa en la sentenio 19 en Europa e la SUA. En la sentenio 20, lo ia deveni un de maladias de enfantes la plu disturbante en esta areas. La vasini prima per polio ia es developada en la desenio de 1950 par Jonas Salk. On ia espera ce la efortas de vasini e deteta temprana de casos ta resulta en elimina global de la maladia a 2018.