Mar Roja
![](http://upload.wikimedia.org/wikipedia/commons/thumb/a/ad/Red_sea_stony_beach_taba_egypt.jpg/220px-Red_sea_stony_beach_taba_egypt.jpg)
![](http://upload.wikimedia.org/wikipedia/commons/thumb/1/19/Red_Sea_topographic_map-en.jpg/220px-Red_Sea_topographic_map-en.jpg)
La Mar Roja (arabi: البحر الأحمر Al Baḥr al aḥmar) es un estende de acua sal de la Mar Indian, entre Africa e Asia. La junta a la Mar Indian es en la sude tra la Streta Mandeb e la Golfo Aden. A la norde es la Penisola Sina, la Golfo Acaba, e la Golfo Suais, cual condui a la Canal Suais. La mar es supra la Falion de la Mar Roja, un parte de la Vale de la Falion Grande.
La Mar Roja ave un area de surfas de sirca 438,000 km2, es sirca 2250 km de longia, e es 355 km de largia a sua punto la plu larga. Lo ave un profondia masima de 3040 m en la vale maral Suakin sentral, e un profondia promedia de 490 m. Lo ave ance scafales basa vasta, notada per sua viventes maral. La mar es la abitada de plu ca 1000 spesies de nonvertebratos, e 200 corales dur e mol. Lo es la mar tropical la plu norde en la mundo.
La esplora la plu temprana conoseda de la Mar Roja ia es conduida par la egiptianes antica cuando los atenta crea vias comersial a Punt. Un de los ia aveni sirca 2500 aec e un otra sirca 1500 aec (par Hatxepsut). La Libro de Esodo de la biblia reporta sur la crusi de un mar par la israelis antica, cual es nomida Yam Suph (ivri: יַם סוּף), tradisional identifiada como la Mar Roja.
En la sentenio 6 aec, Dario la grande de Persia ia envia misiones de oserva a la Mar Roja, per boni e estende naviga par loca multe rocas e corentes perilosa. Un canal ia es construida entre la Rio Nilo e la fini norde de la Mar Roja a Suais. En la sentenio 4 aec, Alexandro la grande ia envia misiones marinal elinica tra la Mar Roja a la Mar Indian.
La Mar Roja ia es favoreda per comersia roman con India comensante con la rena de Augusto, cuando la Impero Roman ia gania controla de la Mediteraneo, Egipte, e la Mar Roja norde. La via ia es usada par statos presedente, ma ia crese en la cuantia de trafica su la romanes. De portos indian, benes de Xina ia es introduida a la mundo roman.
Asta la eda moderna, la mar resta su la controla de potias local, como Egipte e Arabia, o par fortes comersial de Europa.