Lumina
![](http://upload.wikimedia.org/wikipedia/commons/thumb/e/e3/English_Bill_of_Rights_of_1689.jpg/220px-English_Bill_of_Rights_of_1689.jpg)
La Lumina (franses: le siècle des Lumières, deutx Aufklärung) ia es un promove inteletal e filosofial cual ia domina la mundo de la ideas en Europa en la sentenio 18, "la sentenio de la filosofia".
La Lumina ia inclui un estende de ideas sentrida en la razona como fonte prima de autoria e legalia, e ia fa avansa ideales como libria, progresa, tolera, frateria, governa constitual e separa de eglesa e stato. En Frans la ideas sentral de la filosofistes de la Lumina ia es libria individual e tolera relijial, en oposa a la monarcia asoluta e la dogmas fisada de la Eglesa Catolica. La Lumina ia es marcada par un asentua en la metodo siensal e reduisme, con un interoga aumentante sur la ortodoxia relijial -un disposa resomada en la frase sapere aude (osa conose).
La istoristes franses tradisional ia loca la Lumina entre 1715 (la anio de mori de Louis 15) e 1789 (la comensa de la Revolui Franses). Alga istoristes resente comensa la periodo en la anios 1620, con la comensa de la revolui siensal. La filosofistes de la periodo ia sirculi sua ideas tra reunis en academias siensal, salones leteratural e en libros e libretas primida. La ideas de la Lumina ia sumina la autoria de la monarcia e la Eglesa e ia pave la via per la revoluis political de la sentenios 18 e 19. Un varia de promoves en la sentenio 19, incluinte libralisme e neoclasicisme, trasa sua erita inteletal asta la Lumina.
La Lumina ia es presededa e asosiada con la revolui siensal. Filosofistes temprana de ci sua labora ia influe la Lumina ia inclui Francis Bacon, René Descartes, John Locke e Baruch Spinoza. La figures xef de Lumina ia inclui Cesare Beccaria, Voltaire, Denis Diderot, Jean-Jacques Rousseau, David Hume, Adam Smith e Immanuel Kant. Alga gidores european, incluinte Caterina 2 de Rusia, Josef 2 de Austria e Frederico 2 de Prusen, ia atenta aplica la pensa de Lumina sur tolera political e relijial, cual ia deveni conoseda como asolutisme luminada. Benjamin Franklin ia visita Europa de forma repeteda e ia contribui de forma ativa a la debates siensal e political e ia porta la ideas nova a Filadelfia. Thomas Jefferson ia segue la ideas european e plu tarda ia asorbe alga de la ideales de la Lumina a la Declara de autonomia de SUA (1776). Un de sua colaborores, James Madison, ia asorbe esta ideales a la Constitui de Statos Unida en sua edita en 1787.
La publici la plu influente de la Lumina ia es la Ensiclopedia (Encyclopédie). Publicida entre 1751 e 1772 en 35 volumes, lo ia es compilada par Denis Diderot, Jean le Rond d'Alembert (asta 1759) e un grupo de 150 siensistes e filosofistes. Lo ia aida a estende la ideas de la Lumina tra Europa e estra. Otra publica de refere ia es la Disionario filosofial (Dictionnaire philosophique; 1764) e la Letters on the English (1733) de Voltaire; la Parla sur nonegalia (1754) e La contrata sosial (1762) de Rousseau; La ricia de la nasiones (1776) de Adam Smith; e La spirito de la leges (1748) de Montesquieu. La ideas de la Lumina ia ave un rol xef en inspira la Revolui Franses, cual ia comensa en 1789. a pos la Revolui, la Lumina ia es segueda par la promove inteletal conoseda como Romanticisme.