Ansel Adams
![](http://upload.wikimedia.org/wikipedia/commons/thumb/0/05/Ansel_Adams_and_camera.jpg/220px-Ansel_Adams_and_camera.jpg)
![](http://upload.wikimedia.org/wikipedia/commons/thumb/2/21/Adams_The_Tetons_and_the_Snake_River.jpg/220px-Adams_The_Tetons_and_the_Snake_River.jpg)
![](http://upload.wikimedia.org/wikipedia/commons/thumb/9/9d/Looking_across_lake_toward_mountains%2C_%22Evening%2C_McDonald_Lake%2C_Glacier_National_Park%2C%22_Montana.%2C_1933_-_1942_-_NARA_-_519861.jpg/220px-Looking_across_lake_toward_mountains%2C_%22Evening%2C_McDonald_Lake%2C_Glacier_National_Park%2C%22_Montana.%2C_1933_-_1942_-_NARA_-_519861.jpg)
Ansel Easton Adams (20-2-1902 - 22-4- 1984) ia es un fotografiste de vistas american e un ecolojiste, conoseda per sua imajes blanca-negra de la ueste de America Norde.
El ia aida en la funda de la grupo f/64, un asosia de fotografistes ci ia promove fotografia "pur", contra la stilo "depintin" plu comun alora. La membros de f/64 prefere focas agu e la usa de la estende plen de tono en un foto (pd la cuantia de grises distinguida entre e inclui blanca e negra).
Con Fred Archer, Adams ia developa un sistem esijente de fabrica de imajes nomida la sistem de zona, cual ia descrive un metodo de ateni la primida final desirada tra un comprende profonda tecnical de como la estende de tono es rejistrada e developada en esposa, developa negativa, e primi. La claria e profondia resultante de tal imajes ia marca sua fotografia.
Adames ia es un promovor tra sua vive intera per la conserva de la ambiente natural, e sua pratica de fotografia ia es multe entretexeda con sua promove. A 12 anios, el ia es donada sua camera prima en sua visita a la Parce Nasional Yosemite. El ia developa sua laboras temprana como un membro de la Clube Sierra, un organiza per conserva. Plu tarda, el ia es contratada con la Departe de la Interna SUA per fotografi la parces nasional de la SUA. Sua laboras e promove persistente ia aida estende la sistem de parces.
Con dirijor David H. McAlpin e conservor Beaumont Newhall, Adams ia es un conselor importante en la crea de un departe de fotografia a la Museo de Arte Moderne en New York, un aveni importante per securi la aseta institual de fotografia. El ia aida en la presenta de la esibi prima fotografial de la departe, ia aida en fundi de la jornal fotografial Aperture, e ia es la cofundor de la Sentro per Fotografia Creosa a la Universia de Arizona.
Adams ia nase en San Francisco, California, la sola enfante de Charles Hitchcock Adams e Olive Bray Adams. Adams ia es iperativa e maladiosa e posible ipocondria. El ave poca amis, ma sua casa familial e la ambiente natural a estra ia sasia sua interesas, cual inclui spesial sua joia de la belia de natur.
Ansel ia es refusada de alga scolas privata per es tro iperativa e nonatendente. Donce sua padre ia deside estrae el de scola en 1915 cuando el ia ave 12 anios, pos cuando el ia es instruida a casa par enseniores privata, sua tia, e sua padre. Sua tia ia introdui la ideas de Robert Ingersoll, un agnostica e promovor de la vota per femes. Alora el ia completa sua educa formal a un scola privata e ia gradua la nivel oto. En anios plu tarda, el ia esibi sua diploma en un saleta privata en sua casa.
Sua padre ia eleva el per segue la ideas de Ralph Waldo Emerson: vive un vive umil e moral, gidada par un encarga sosial a umanas e natur. Adams ia ave un relata amante con sua padre, ma el ia ave un relata plu distante con sua madre, ci no ia suporta sua interesa en fotografia. Adams ia deveni interesada en la piano cuando el ave 12 anios e ia instrui se per toca e leje musica. Per la 12 anios a pos, la piano ia es la ocupa prima de Adams e, par 1920, sua carera intendeda.
Adams ia visita prima la Parce Nasional Yosemite en 1916 con sua familia. Sua padre ia dona a el sua camera prima, un camera caxin, la Kodak Brownie, e la usa lo con sua zelo tipal iperativa. La anio seguente, el ia reveni ala con cameras plu bon e un trepede.
Adams ia esplora la Sierra Nevada alta en estate e inverno con un jeolojiste jubilada e ornitolojiste amator Francis Holman. En esta tempo, el ia developa la dura e capasia nesesada per fotografia a locas alta en climas difisil.
En Yosemite, el ia ave contata frecuente con la familia Best, propriores de un studio, ci ia permete ce el usa sua piano per pratica. En 1928, el ia sposi Virginia Best en acel studio. Virginia ia erita la studio de sua padre en 1935, e el e Adams ia continua opera lo asta 1971.
Sua ami la plu bon, Cedric Wright, el ia aprende la filosofia de Edward Carpenter, ci ia scrive Towards Democracy ("a democratia"), un obra de leteratur cual promove la xerca per belia en vive e arte. Adams ia porta un edita mol cuando a Yosemite, e el ia adota ance la filosofia.
Adams ia mori de maladia cardiovascular a 22 april 1984, a la ospital comunial de Penisola Monterey, California, con 82 anios. El ia es ensircada par sua sposa, fies Michael e Anne, e sinco netes.