Kuzguncuk
![](http://upload.wikimedia.org/wikipedia/commons/thumb/6/6a/%C4%B0stanbul_5130.jpg/220px-%C4%B0stanbul_5130.jpg)
![](http://upload.wikimedia.org/wikipedia/commons/thumb/8/80/Surp_Krikor_Lusavori%C3%A7_Armenian_Church.jpg/220px-Surp_Krikor_Lusavori%C3%A7_Armenian_Church.jpg)
![](http://upload.wikimedia.org/wikipedia/commons/thumb/8/80/Uryanizade_mosque_kuzguncuk.jpg/220px-Uryanizade_mosque_kuzguncuk.jpg)
Kuzguncuk es una maalé de Üsküdar, la parte Azyatika de Estanbol, en la Turkiya. Es una de las dos maalés mas relasionadas kon la komunita djudia; el otro es Balat en el lado evropeo de la sivdad. Kuzguncuk es una maalé bien diversa kultural i relijiosa mente: Se puede topar una kilise ermení serka de un kal i al otro lado de la kaye ay una iglesia ortodoksa grega serka de un djamí. Endemás, ay una betahayim en esta maalé. Dempués de la independensia de Izrael, muncha djente de la komunita, ke eran la mas muncho de la maalé, izo aliya i agora bive en Izrael. Es una maalé trankila, kon munchas kazas viejas.
Munchos dizís de la televizyón turka se filmaron en esta maalé.
El viejo nombre de Kuzguncuk es “Hrisokeramos” i esto kere dizir teja de oro. En los anyos 565 - 579 fue fraguada una eglisia de parte de Justinos, ke el tejado era serado kon tejas de oro. El nombre de Kuzguncuk fue dado a este lugar ke se yamava antes Kozinitza. Se dize ke el nombre fue dado en el tiempo de Fatih Mehmet II (1451-1481) al nombre de una persona ke se yamava "Kuzgun Baba".
Los primeros moradores djudios, ke no se save exaktamente el anyo ke vinieron en el sieklo 17, en la parte de Asia en Estambol. Se dize ke Kuzguncuk era un kazal de djudios. Para los djudios de la Evropa Kuzguncuk era la estasion de alkavo para arivar a la tiera santa. Para la gente ke no se puedian ir ala tiera prometida, deshavan de sava ke kuando ivan a murir, kerian enterrarsen en Kuzguncuk. Pormodo de esto ay aya un simiterio bastante grande des del 17 sieklo.
En este tiempo aparte de los djudios biviyan aya i Gregos. Los Ermenis empesaron aresentarsen aya en el sieklo 18, i en el sikelo 19 se izieron un grande grupo. En Kuzguncuk lo maz del puevlo no era muslumano por esto los otomanos no se enteresaron de este Kazal. En lugar de esto eyos se apatronaron de una parte de Paşalimanı - kon las meskitas, la fuente, la eskola de sandalas, i kon las guertas. De la parte de Rumeli trayiyan vakas para pasar ala parte de Anadol, i los pasavan kon sandalas. El nombre Bosforosus en grego viene del nombre pasaje de vakas.
En el transporte de Kuzguncuk, en el sigundo medio de sieklo 19 aviya vapores de Şirket-i Hayriye. En el anyo 1865, dospuez del fuego de Kuzguncuk, izyeron aya una eskala para vapores, i esto ayudo al transporte.
Komo no ay munchos muslumanes en esta maale, alos kavoz del 19 sieklo aviya solo dos meskitas. La una Üryanizade Mescidi i la otra se fruago en el anyo 1952. Üryanizade Mescidi fue fraguada de parte de Uryanizade Ahmed Esad Efendi. La minare es la maz rika i enteresante de laz otras minares.
En Kuzguncuk en el bodre del Bosforos ay una my enteresante i ermoza kaza (yali). Ez la kaza de Fethi Ahmed Paşa, el primer patron de la kaza. El tuvo onoravle posto en el tiempo del rey Mahmut II, i en el tiempo de Abdul Megit. En esta kaza aviya doz partidos de moradas, una para laz mujeres (Harem) i una para los ombres (Selamlik). Detraz de la kaza aviya un boske con munchos arvoles. A esta kaza la desharon a la munisipalidad para ke seya avyerto al puevlo kon kondisyon de no fruagar aryento.
El kazal de Kuzguncuk en el 19 i 20 sieklo paso munchos fuegos. I agora aya se topan munchas grandes i chikas kazas, i apartamentos modernos. Dozpuez del anyo del fuego 1864 se fruago kazas de doz i kuatro etajes. Estaz kazas son fruaguadas de piedra o de tavla.
En el anyo 1914 existiya en Kuzguncuk 70 kazas de muslumanos, 250 gregos, 1600 ermenis i 400 kazas de djudios, i 4 kazas de djente de suditansa ajena. En el 1933 lo maz muncho eran loz djudios, aviya 580 kazas ke moravan 4000 personas.
Agora en Kuzguncuk lo maz del puevlo son muslumanes. Muncho salyeron de este lugar o vendieron las kazas o izyeron reparasiones. En el tiempo de alkavo este kazal esta preferido de parte de loz istambulis, i estan reparando laz kazas viejas. Kuzguncuk se izo un lugar espesial en el Bosforos para bivir.