Елена Образцова
![](http://upload.wikimedia.org/wikipedia/commons/thumb/0/0a/%D0%95%D0%BB%D0%B5%D0%BD%D0%B0_%D0%9E%D0%B1%D1%80%D0%B0%D0%B7%D1%86%D0%BE%D0%B2%D0%B0.jpg/220px-%D0%95%D0%BB%D0%B5%D0%BD%D0%B0_%D0%9E%D0%B1%D1%80%D0%B0%D0%B7%D1%86%D0%BE%D0%B2%D0%B0.jpg)
Образцова Елена Васильевна (7. 7. 1939-ж. туулган, Ленинград – 12.01.2015, Москва) – советтик ырчы (меццо-сопрано). СССР эл артисти (1976). 1964-ж. Ленинград консерваториясын бүткөн. Образцова – бардык регистрде бирдей чыккан кубаттуу, кооз үндүү артист. Көрүнүктүү партиялары: Марина Мнишек, Марфа (М. Мусоргский, «Борис Годунов», «Хованщина»), Амнерис, Эболи, Азучена (Ж. Верди, «Аида», «Дон Карлос», «Трубадур»), Кармен (Ж. Бизе, «Кармен»), Фрося (С. Прокофьев, «Семён Котко») ж. б. О-нын репертуарында П. Чайковский, М. Глинка, А. Даргомыжский, С. Рахманинов, Р. Шуман, И. Бах, Г. Генделдин камера-вокалдык чыгармалары бар. 1964-ж. Франция, Италия, Канада, Япония, Польша, Германия, АКШ ж. б. мамлекеттерде гастролдо болгон. Вокалисттердин Глинка атындагы Бүткүл союздук конкурсунда (1962), Чайковский атындагы Эл аралык 4-конкурста (1970), вокалисттердин Ф. Виньяс атындагы Эл аралык конкурсунда (Барселона, 1970) 1 сыйлыгын, Глинка атындагы РСФСР мамлекеттик сыйлыгын (1973), Лениндик сыйлыгын (1976) алган.
Колдонулган адабияттар
[түзөтүү | булагын түзөтүү]- “Кыргызстан” улуттук энциклопедиясы: 5-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2014. илл. ISBN 978 9967-14-111 -7