Zuppa
![](http://upload.wikimedia.org/wikipedia/jv/thumb/9/9d/Zuppazoup.jpg/250px-Zuppazoup.jpg)
Zuppa ya iku sawijining panganan khas Italia awujud sup.[1] Sup Zuppa iku ana rong pérangan ya iku sup iku dhéwé lan pastry.[1]
Sup zuppa digawé saka bumbu rempah, campuran endhog, jagung, lan irisan daging pitik.[1] Duduh sup zupa iku kenthel kaya krim. Pastry utawa kulit glepung minangka pérangan liyané saka panganan Italia iki.[1] Pastry digawé saka adonan glepung mirunggan kang duwé cita rasa khas.[1] Sup zuppa disuguhake kanthi cara kang bedha saka sup-sup liyané. Sup zuppa diwadhahi ing mangkok keramik cilik kang tahan panas lan ing ndhuwur mangkok iku ditutupi déning kulit pastry kang wis digawé.[1][2] Dadi, sup kang ana ing mangkok ketutupan déning kulit pastry mentah.[1] Kulit pastry iki kudu nutup rapet ing sakabehing lambe mangkok.[1] Yèn ana sing kebuka sithik waé, kulit pastry ora bakal gelem ngembang.[1] Yèn wis kaya mangkono, zuppa banjur dilebokake ing oven saperlu dipanggang nganti pastry mateng.[2] Panase oven kudu tansah dijaga supaya adonan kulit bisa ngembang.[1] Yèn kurang panas utawa kepanasen kulit pastry ora bisa ngembang.[1] Titikane pastry mateng ya iku kulit pastry wis ngembang lan wernane coklat semu kuning.[2] Zupa énak nalika dipangan panas-panas.[1][2]