George Washington
![](http://upload.wikimedia.org/wikipedia/commons/thumb/b/b6/Gilbert_Stuart_Williamstown_Portrait_of_George_Washington.jpg/300px-Gilbert_Stuart_Williamstown_Portrait_of_George_Washington.jpg)
George Washington (Febiweri 22, 1732 – Disemba 14, 1799) wehna di komaanda a di Kantinental aami ina di Amerikan Revaluushaneri Waar (1775 – 1783) an im sorv az di fos president fi di Yunaitid Stiets a Amerika (1789 – 1797). Di Kantinental Knaggres apaint Washington az di Komaanda-in-Chiif a di Amerikan revaluushaneri fuos de mina 1775. Di nex ier, im fuos di British outa Bastan, luuz Nyuu Yaak Siti, an kraas uova di Delawier Riva ina Nyuu Jorzi, fi win gens di enimi yuunit dem lieta dong ina di ier. Im gud scratiji dem mek di Revaluushaneri fuos dem kyapcha di tuu mien British kombat aami dem a Saratoga an Yorktown. Im riizn wid kanggres, di koluonial stiet dem, an di French alai dem fi uol tugeda di aami an wan frajail nieshan we wehna chrai sovaiv disintigrieshan an fielya. Az president, im elp establish nof a di kostom dem a di egzekitiv dipaatment fi di nyuu govament. Im wehn sopuot plan fi bil wan chrang senchral govament, set op wan gud tax sistim, an fi mek wan nashinal bangk. Washinton avaid di temptieshan a waar an staat wan dekied a piis wid Britn chuu di Jay chriiti ina 1795. Im ded ina 1799, an di finaral yuulaji we Henry Lee gi se outa evri Amerikan, im wehna di fos ina waar, di fos ina piis, an di fos ina di aat a im konchri man dem. Washington get rangk kansistentli az wan a di best U.S. prezident dem.