Ku Klux Klan
![](http://upload.wikimedia.org/wikipedia/commons/thumb/a/af/Klan-in-gainesville.jpg/280px-Klan-in-gainesville.jpg)
Ku Klux Klan, abreviita KKK, esas Usana odio-grupo de extrema dextra, konocata por promocar violentoza agadi e defensar idei pri rasismo, stranjerodio, antisemidismo, ed anke homofobio, antikomunismo e repulso a katolikismo ed a islamo. Kreita dum la 19ma yarcento, nemediate pos Usana interna milito, ol grupigas diversa asociuri kun strukturo sekreta. Kelkafoye ol praktikas terorismo, violento ed agadi por timidigo, exemple la brulo di kruci.
L'unesma asociuro qua uzis la nomo Ku Klux Klan establisesis dum la fino di 1865, por veterani del Usana interna milito, qua probis rezistar kontre tale nomizita "rikonstrukto", to esis, la transformo di Usana socio pos finir la sklaveso. L'organizuro rapide adoptis violento probante atingar lia skopi. Tamen, eventis reakti, e balde la richa eliti Usana komencis judikar ke l'existo di la Klan uzesis pretexto por l'interveno di federala trupi en sudala stati. Sen suporto, l'unesma Klan extingesis per akto signatita da Republikana prezidanto Ulysses S. Grant.