Vente
Li vente es li natural movement del aere o altri gases relatent al superficie de un planete. Ventes ocurre con un range de scales, de tempestic flutiones durant decis de minutes, al brises local generate per li calentation de terric superficies e durant poc hores, al ventes global resultant del diferentie in absorption de solari energie inter li climal zones sur Terra.
Li du chef causes de grand-scale atmosferic circulation es li diferential calentation inter li equator e li poles, e li rotation del planete (efecte de Coriolis). Intra li tropics e subtropics, circulationes de termic basses super terren e alt platós posse propulser monsunes. In coastal areas li cicle del marin brise e terric brise posse definir ventes local; in areas con terren variabil, brises de mounte e valley posse prevaler.
Ventes es comunmen classificat per lor spacial scale, lor rapiditá e direction, li forties que causa les, li regiones in quel ili ocurre, e lor efectes. Ventes have varie aspectes: velocitá (ventic rapiditá); li densitá del gas; contente energic, o ventic energie. In meteorologie, ventes es sovente referet a secun lor fortie, e li direction ex li vente suffla. Li convention por directiones refere a u li vente veni; ergo, un 'westal' vente suffla del west al ost, un 'nordal' vente suffla vers li sude, etc. Brevi fensuras de vente con alt rapiditá es nominat burascas. Fort ventes de intermediat durationes (circa un minute) es nominat squalles. Long-durant ventes have varie nómines associat con lor medial fortie, quam brise, storm, tempeste, e urugane.