晚吹-總有一瓣喺左近｜馮素波曾三度見到身穿黑膠綢女靈體 先夫「三七」日子聞到氣味？

ViuTV《晚吹-總有一瓣喺左近》一向就唔同主題，探討各種鬼靈精怪和不思議之迷，今集（27日）邀請到馮素波（波姐）分享自身靈異經歷，指曾三度見到身穿黑膠綢嘅女人，以及於先夫「三七」日子聞到佢身上嘅味道。

波姐分享4歲多時曾於廣州家中房間見到後面屋廚房出現一個身穿黑膠綢嘅女人，但遭嬸嬸阻止逗留，指嬸嬸表示後面屋根本無人住。第二次見到身穿黑膠綢嘅女人係6歲多喺香港住嗰陣，表示於七姨家中與表哥玩耍期間，見到身穿黑膠綢嘅女人，以為係七姨返嚟，工人娥姐見狀就叫佢哋唔好亂噏，事關原來舊樓大門要有人開門先入到去，但工人當時根本無開過門。至於第三次，就發生喺10年前，波姐指自己唔聽朋友指示，將神位放置於家中另一位置，擺放佛像時眼尾見到一個身穿黑膠綢嘅女人企喺衣帽間房門口，波姐即表示：「真係對唔住，我又唔聽話喇！」及將神位放回原處。

另外，波姐先夫生前因中風入院，手中散發出難聞嘅酸餿味。波姐卻於先夫離世後，喺佛壇念經期間聞到同一陣味，後來於已經皈依嘅弟婦口中得知，原來嗰晚無係先夫「三七」嘅日子，令波姐當晚心情特別難過。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！