雅虎香港財經 笑到最後｜油電爭議的終結（高明）
自從中國及美國分別推出無人駕駛，加上Tesla（TSLA）及Rivian（RIVN）股價反彈，電動車及油車嘅爭議應該完結。
美股外幣即時報價 多國新聞任睇
電子車更適合無人駕駛
過去一年，電動車銷量下跌，報導有關電動車亦漸漸負面，例如對電動車環保效益嘅質疑，加上有關電動車關稅等收緊政策，所以油車及混能車重新興起議題再現。
不過正如上面所講，無人車出現，議題慢慢由油電爭議，變成無人有人揸車爭議，有人揸就油車，無人駕駛就電車。
無人駕駛汽車並唔一定必須係電動車，油動車同樣可以實現無人駕駛技術，不過，電動車相比油動車更具能源效率，無論係從燃料成本或者環保角度出發，電動車都更具優勢。而電動車設計更適合集成無人駕駛技術，電動車通常具備先進嘅電子控制系統，這些系統更易於與無人駕駛所需嘅感應器、處理器同軟件進行整合，例如，Tesla電動車已經預裝了許多自動駕駛所需嘅硬件，技術集成更加簡單；Waymo選擇Jaguar I-PACE電動車作為其無人駕駛車隊一部分。
好大機會出現分流
現時賭油車定電動車，實際上係賭緊未來揸車係人揸定自動駕駛，如果未來某一日再無人類駕駛，咁電動車就會成主流，相反，如果人類揸就會繼續油車。
當然，世界唔會唔面倒發現，電燈為例，現已出智能LED燈，但仍然有人用蠟燭照明；煮嘢食為例，無論煮食、氣炸鍋年代，一樣有人燒柴燒炭煮食。
未來亦好機會出現分流，商用、重複性大嘅工作，主要由自動駕駛做，而休閒駕駛繼續係由人類做。時間推演後政府會自然合法化，相信城市內嘅載人服務會由無人駕駛電動車主導，跨城市載人則視乎電池嘅進步速度，如果成本太高可能仍然係油車及混能車嘅天下。
對於股票嘅啟示，就係如果電動車唔發展自動駕駛，其實唔能夠完全反映佢嘅價值。
最後，網上流傳一位名叫「高明」嘅人曾參與某聯盟嘅聯署，嗰個唔係我嚟，已經澄清過好多次，希望網上寫字嘅人可以查清楚再寫，謝謝。
高明
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
