雅虎香港財經 爆一爆｜富豪長子的命（Louise）
本週唔寫新世界都唔得，純官長子鄭志剛「起身」，各方KOL爭相評論其「功」與「過」，講到尾又係鬥爭，所謂「兄弟同心，其利斷金」都係「simple & naive」。
美股外幣即時報價 多國新聞任睇
做富豪長子嘅命......
鄭家「廢長立幼」乃是典型家族鬥爭結局，劇情與當日新地郭氏家族踢走長子郭炳湘（Walter Kwok 人稱水哥）差不多，可以講呢啲係做富豪長子嘅命。有位濶佬亦係家中長子，身同感受咁講：「我哋做大嘅，做得好冇人會讚，係應份嘅，做得唔好，就俾人踩多幾腳！識投胎就梗係做孻仔。」
人稱水哥嘅郭炳湘，當年亦因為兄弟內鬥，搞出場家族大龍鳳。其時鬥爭戲碼仲出位，指控佢有「bi-polar disorder」，唔適宜坐係董事局，最終被踢左出局，而關鍵人物就係「皇太后」郭老太鄺肖卿啦。
新世界如此火速令太子起身，除咗公司債務等因素之外，「皇太后」在八月初仙遊可能亦是關鍵。八月初，鄭裕彤元配「彤嬸」周翠英過身，但鄭家上下都十分低調，連訃聞都冇刋登，聽聞彤嬸的後事在鄉下順德舉行。
廿年前小妹曾經返順德追訪彤叔一家，在車上曾跟彤嬸對過兩嘴，佢第一句就呻彤叔好多女朋友，但識做嘅彤叔唔怕肉麻，在記者面前就話最「愛」嘅一定係老婆。周大福之所以叫周大福，亦因為佢係周至元的乘龍快婿。彤嬸過身前後，市場上已有很多八卦消息，又話周大福除了「鄭」家之外，「周」家也有份，又話周大福企業內其他子侄後人，不滿要向上市的新世界泵水，寧願放棄新世界.....總之消息滿天飛。
富豪長子寧願自我「解放」
雖然周大福企業係私人企業，鄭氏家族信託內容亦不得而知，但小妹相信彤嬸兩脚一伸，好可能觸發遺囑上嘅權力變化，所以新世界及周大福的人事變化安排來得如此迅速。
觀乎香港唔少富豪長子的仕途，最後都寧願自我「解放」做番自己喜歡嘅野，好似合和胡應湘與兒子胡文新不咬弦，最後胡文新亦離開合和，獲「放生」後佢揸住份身家擁抱冰球運動，生活逍遙自在；大劉長子劉鳴煒放下所有公職後，家陣就成為「旅遊達人」，不時在 IG 放上世界各地旅遊相。呢啲都係富豪長子的「命」也！想做族長，要學得習主席所講，「敢於善於鬥爭」。
