Sarah Bernhardt
![](http://upload.wikimedia.org/wikipedia/commons/thumb/3/3b/Sarah_Bernhardt%2C_par_Nadar%2C_1864.jpg/220px-Sarah_Bernhardt%2C_par_Nadar%2C_1864.jpg)
Sarah Bernhardt (23 Kọ́yànsun 1844 - 26 Whejisun 1923) yin yọnnu flansenu he nọ daihun oplo ji tọn, yinkọ etọn to whenuena e yin jiji wẹ Henriette-Rosine Bernard, e sọawuhia to aihun oplo ji tọn he diyin hugan to ojlẹ etọn mẹ lẹ mẹ. Delẹ to aihun he mẹ e sọawuhia te to ojlẹ etọn enẹlẹ mẹ wẹ La Dame Aux Camelias he yin awuwlena gbọn Alexandre Dumas fils dali; Ruy Blas he yin awuwlena gbọn Victor Hugo dali, Fédora and La Tosca he yin awuwlena gbọn Victorien Sardou dali, po L'Aiglon po he yin awuwlena gbọn Edmond Rostand dali. Bernhardt daihun gbọn otò susu mẹ lẹdo aihon pe, e sọ yín dopo to aihundatọ tintan he yihodokanji lẹ mẹ. E yin pipa taidi dopo to yọnnu aihundatọ he bikan hugan to whenẹnu.
Vuwhenu etọn
[jlado | jla asisado]Bernhardt yin jiji to 5 rue de L'École-de-Médicine to Paris to azán ko-nukunawetọ kavi ko-nukunatọntọ Kọ́yànsun tọn to owhe 1844, yinkọ onọ etọn tọn wẹ Judith Bernard(mẹhe sọ nọ yin yiylọdọ dọ Julie kavi Youle). Yinkọ otọ etọn tọn ma yin yinyọnẹn taun, sọgbe hẹ nuhe mẹdelẹ dọ, otọ etọn sọgan ko wa sọn whẹndo akuẹnọ de tọn mẹ. Onọ etọn ma na ẹn ayidonugo sọmọ to whenue e tin to ovu. Sigba to whenue e tindo owhe ṣinawe, onọ etọn ze e do wehọmẹ de to Paris, finẹ wẹ e daihun oplo ji tọn etọn tintan te. To owhe 1859 Bernhardt se dọ otọ emitọn ko kú to yovotomẹ. Onọ etọn ylọ whẹndo Otọ etọn tọn lẹ bo kanse ye nuhe Bernhardt na wa todin, dopo to ye mẹ he yinkọ etọn nọ yin Morny dọ e na yọn taun eyin Bernhardt na lẹzun aihundatọ oplo ji tọn de, nudide ehe ma hẹn homẹhun Bernhardt sọmọ ṣigba e kẹalọyi.
Yanwle etọn lẹ
[jlado | jla asisado]Yanwle Bernhardt tọn bẹjẹeji to 1862 whenue e yin nuplọntọ to Comẹdie Francause, e ma tindo kọdetọndagbe sọmọ to finẹ bo wa tọn sọn finẹ. To 1865, e lẹzun mẹhe diyin to Europe podọ to 1870 lẹ gblamẹ, ehe zọn bọ yé to oylọ basi nanẹn lẹdo Europe po New York po pe. E na ko lẹzun mẹhe diyin hugan to aihundatọ yọnnu lẹ mẹ to owhe kanweko fọtọnnukunẹnẹtọ mẹ ṣigba é plọn yọnnu jọja susu dogbọn aihun etọn lẹ dali.
Yanwle he gbọngodo lẹ
[jlado | jla asisado]To 1905, to whenue e to aihunda to Rio de Janeiro, Bernhardt gbleawuna ede sọn afọ adusi tọn etọn to whenue e to ada godo tọn etọn basi dile e zlọn sọn ado he yiaga de ji, afọ lọ ma gbọ ganji. To 1915, afọ lọ kò ji zẹjlẹgo bọ afọ adusi tọn etọn dona yin sinsansẹ, he zẹemẹdo dọ sẹkunọ de wẹ e wa lẹzun bo sọ nọ kẹkẹvi de mẹ na osun susu lẹ, mahopọnna ehe, e zindonukọn to yanwle etọn mẹ, e disa lẹdo Amẹlika pe to 1915 po kọndetọn dagbe po bo wa ku to whenue e lẹkọ do France to Azan koatọntọ, Whejisun, Owhe 1923 tọn. Bernhardt ku na azọn wutu to whenue ayi etọn gbẹazọn, ye dii do Père lachaise sín yọwhe to Paris.