اسنۊکر
اسنۊکر (اينگيليسي :snooker) ايجۊر بيليارد ايسه کي اينگيليسئن چاکۊديد. أ بازي أوائل چمنˇسر أنجام بؤستي و ضربه'ن' عصا أمرأ زئيد أمما هأسه د أنˇشکل عوضابؤسته. اسنۊکر خؤره چند مؤدل دأره کي شا ايراني اسنۊکر يا چيني اسنۊکر ره نام بردن ولي استاندارد مؤدل اينگيليسي اسنۊکر ايسه و جهاني مۊسابقه'نˇمئنم هأ مؤدل بازي به.
![](http://upload.wikimedia.org/wikipedia/commons/thumb/c/cb/Stephen_Maguire%2C_Ronnie_O%E2%80%99Sullivan%2C_and_Michaela_Tabb_at_German_Masters_Snooker_Final_%28DerHexer%29_2012-02-05_05_cropped.jpg/220px-Stephen_Maguire%2C_Ronnie_O%E2%80%99Sullivan%2C_and_Michaela_Tabb_at_German_Masters_Snooker_Final_%28DerHexer%29_2012-02-05_05_cropped.jpg)
![](http://upload.wikimedia.org/wikipedia/commons/thumb/0/01/Mark_Williams_at_Snooker_German_Masters_%28Martin_Rulsch%29_2014-01-30_04.jpg/220px-Mark_Williams_at_Snooker_German_Masters_%28Martin_Rulsch%29_2014-01-30_04.jpg)
اسنۊکرˇميز
[دچينواچين]اسنۊکرˇميز خؤره چند سايز دأره کي استاندارد أنˇشين 11ft×5ft ايسه. ميزˇسر پارچهاي بکشئه نأهأ کي سبز رنگه ؤ أنˇنام ايسه ماهۊت و أنˇجنس فلانل ايسه. ميز ۶تا خۊله دأره کي چارتا ميزˇديمه'ن نأهأييد ؤ اۊشان' وؤگؤل دۊخانيدي و دۊتام ميزˇوسط نأهأييد ؤ سٚرٚد دۊخاده بيدي. ميزˇديواره'ن ني باند نام دأريدي.
بازي کردؤکار
[دچينواچين]اسنۊکرˇتۊپان' شار دۊخانيمي. أ بازي دۊرۊن ۱۵تا سۊرخˇشار دأريم کي به شکلˇمؤثلثي ديچينيم و ۶تا شارم غيرˇسۊرخ(يا ايصطلاحن رنگي) دأريم کي هرتا، ميزˇرۊ خۊ جيگا سر ديچئه به(جيگا'ن نؤقطه أمرأ مۊشخصيد) و سيفيدˇشارم کيۊبال(اينگيليسي:cue ball ) دۊخاده به. هر سۊرخˇشار اي ايمتياز دأره ؤ رنگئنˇايمتيازم أتؤيه: زرد دۊ ايمتياز، سبز سه ايمتياز، قاوهاي چار ايمتياز، آبي پنج ايمتياز، صۊرتي شيش ايمتياز و سيأ هأفت ايمتياز. بازي بيناکۊدنˇواسي ايتا بازيکؤن کيۊبال' واکاره نيمدايره(يا ايصطلاحن D) مئن و سۊرخˇشاران' ضربه زنه و أ عمل' کي بازي اۊنˇأمرأ شۊرۊع به گيدي برئک(اينگيليسي:break). برئکˇپسي بازيکؤنان وا سۊرخˇشار دگانيد خۊله'نˇمئن کي به طؤرˇکؤللي خۊله'ن' پاکت دۊخانيد و أ عمل هم پاکت کۊدن نام دأره. هر بازيکؤن، سۊرخˇشارˇپاکت کۊده پسي وا ايتا رنگي شار به ديلخا بزنه و أگه بتانست رنگي بزنه ايوارده ايتا سۊرخˇشار زنه ؤ هنده ايتا رنگي و أ مسير هأتؤ دۊمباله دأره تا خراباکۊنه ؤ حريفˇنؤبت ببه. نؤکتهی ديگر أنه کي رنگي شاران' کي بازيکؤنان زنيدي وا پاکتˇجا بيرۊن باوريد ؤ هنده بنيد خۊ جا سر ولي سۊرخˇشارانˇره نوا أ کار' کۊدن. وقتي سۊرخˇشاران تۊمامابؤستيد وا زردˇشارˇجا بيناکۊدن ضربه زئن و هأتؤ ترتيبˇسر پيش شؤن تا سيأ يا هۊ هأفت. ويشترين ايمتيازي کي شا گيفتن ۱۴۷ ايسه کي أگه بازيکؤن همهتا سۊرخˇشارانˇپسي سيأ شار' پاکتاکۊنه ؤ رنگئنم همه' ترتيبˇسر تا آخر بزنه أ ايمتياز' گيره؛ ايصطلاحن أ ايمتياز' ماکسيمؤم برئک(اينگيليسي:maximum break) گيد. آخرپسي هرکي ويشتر ايمتياز بيگيفتهبي بره يا أنکي اينفر اينصراف ديهه ؤ اۊيتا بازيکؤن برنده به.
![](http://upload.wikimedia.org/wikipedia/commons/thumb/9/95/Snooker_table_drawing_2.svg/220px-Snooker_table_drawing_2.svg.png)
خطا'ن
[دچينواچين]بيلياردˇخطا'ن' پيتؤک دۊخانيدي. اسنۊکرˇمئن وقتي ايتا بازيکؤن خطا کۊنه، حريف ايمتياز فأگيره. خطا تانه ۴ايمتيازي، ۵ايمتيازي، ۶ايمتيازي يا ۷ايمتيازي ببه. أگه بازيکؤن بخايه سۊرخˇشار بزنه ولي أنˇکيۊبال هيچ شاري' نگنه يا سۊرخˇشار' بگنه ولي دکفه خۊله'نˇمئن حريف ۴ايمتياز فأگيره. أگه بخايه سۊرخˇشار بزنه ولي ساب بۊکۊنه ؤ کيۊبال زرد، سبز يا قاوهاي' بگنه هنده حريف چار ايمتياز فأگيره ولي أگه آبي' بگنه ۵ايمتياز، صۊرتي' بگنه ۶ايمتياز و أگرم سيأيه بگنه ۷ايمتياز حريفˇره حيساب به. أگرم بخايه رنگي شاران' بزنه ولي شارˇمدˇنظر' نگنه يا ايتا شارˇديگر' بگنه يا کيۊبال دکفه پاکتˇمئن هأ قاعده سر و با توجؤه به شارانˇايمتياز حريفˇره ايمتياز حيساب به.أگه کيۊبال بشه پاکتˇمئن حريف وا نيمدايره مئن واکاره ؤ بيناکۊنه سۊرخˇشار زئن ولي أگه کيۊبال پاکتˇمئن نشه نشا أ کار' کۊدن. معمۊلن بازيکؤنان ساى کۊنيدي پيتؤک گيفتنˇواسي خۊشانˇحريف' ماسک بۊکۊنيد(ماکس ني واگۊيأ به). وقتي بازيکؤن نتانه مۊستقيم اۊ شاري' کي وا بزنه، بزنه و مجبۊر ببه باندانˇجا ايستفاده بۊکۊنه گيمي ماسک بؤبؤسته يعني ايتا شارˇديگر مسيرˇمئن دره ؤ ولانه کيۊبال مۊستقيمن شارˇمدˇنظر' بگنه.
تاچˇخطا
[دچينواچين]ايتا حالتم اسنۊکرˇمئن نأهأ کي کيۊبال ايتا سۊرخˇشار' دۊچۊکه؛ يعني أ حالتˇمئن کيۊبال ؤ شار واسۊخسته نأهأييد. وقتي أ ايتفاق دکفه بازيکؤن وا جۊري ضربه بزنه کي سۊرخˇشار هيچ تکان نۊخۊره، يعني فقط وا کيۊبال' دۊراکۊنه بدۊنˇأن کي سۊرخˇشار تکان بۊخۊره؛ نيويره خطا ايسه ؤ حريف ۴ايمتياز فأگيره. نؤکتهی مؤهم أنه کي أ خطا فقط وقتي ايسه کي کيۊبال ايتا سۊرخˇشار' واسۊخسته ؤ دۊچۊکسته نأهأبي و رنگي شارانˇره چنين خطايي نأريم.
![](http://upload.wikimedia.org/wikipedia/commons/thumb/1/11/Snooker_Touching_Ball_Red.png/220px-Snooker_Touching_Ball_Red.png)
اسنۊکرˇچيکچئن
[دچينواچين]- اؤدار: هۊ چۊيي ايسه کي اۊنˇأمرأ ضربه زنيدي و اينگيليسي مئن کيۊ(cue) گيدي.
- اکستنشن: اکستنشن يا ته اؤدار چۊيي ايسه کي اؤدارˇجا کۊچيکتره ؤ بازيکؤنان وقتي کي کيۊبال دسفأرس نبه خۊشانˇاؤدارˇته دۊچۊکانيد تا بۊلندتر ببه.
![](http://upload.wikimedia.org/wikipedia/commons/thumb/7/7b/Snooker_cue_and_extensions.png/220px-Snooker_cue_and_extensions.png)
- گچ: بازيکؤنان قبلˇخۊشانˇضربه خۊشانˇاؤدارˇلچ گچ واسينيد تا اؤدارˇلچ خؤب ؤ بقايده کيۊبال' بگنه ؤ جينليسکه تا کيۊبال مۊنحرفانبه ؤ پيتؤک نديد.
![](http://upload.wikimedia.org/wikipedia/commons/f/fc/Chalk_stub.png)
- مؤثلث: قبلˇشۊرۊع، سۊرخˇشارانˇديچئنˇواسي ايستفاده به.
- مگنت: آهنرؤبايي ايسه کي بازيکؤنان گچˇدأشتنˇواسي کاراگيريد.
- رست: چۊيي ايسه کي اۊنˇلچ Xˇمانستانه و مؤقعي کي کيۊبال اکستنشنˇأمرأيم دسفأرس نبه اۊنˇجا کۊمک گيريدي.
![](http://upload.wikimedia.org/wikipedia/commons/thumb/c/c5/Snooker_player_with_rest.jpg/220px-Snooker_player_with_rest.jpg)
- پيله اؤدار و پيله رست يا لابداني رست(spider rest): وقتي کي کيۊبال معمۊلي اؤدار ؤ معمۊلي رستˇأمرأ دسفأرس نبه، پيله اؤدار ؤ پيله رستˇجا ايستفاده به.