Intensidade luminosa

En fotometría, a intensidade luminosa defínese como a cantidade de fluxo luminoso que emite unha fonte por unidade de ángulo sólido. A súa unidade de medida no Sistema Internacional de Unidades é a candela (cd). Matematicamente, a súa expresión é a seguinte:

I_{V}={\frac {dF}{d\Omega }}

onde:

$\scriptstyle {I_{V}}$ é a intensidade luminosa, medida en candelas.
$\scriptstyle {F}$ é o fluxo luminoso, en lumens.
$\scriptstyle {d\Omega }$ é o elemento diferencial de ángulo sólido, en estereorradiáns.

A intensidade luminosa pódese definir a partir da magnitude radiométrica da intensidade radiante sen máis que ponderando cada lonxitude de onda pola curva de sensibilidade do ollo. Así, se $\scriptstyle {I_{V}}$ é a intensidade luminosa, $\scriptstyle {I(\lambda )}$ representa a intensidade radiante espectral e $\scriptstyle {V(\lambda )}$ simboliza a curva de sensibilidade do ollo, entón:

I_{V}=K\int _{visible}^{\ }I(\lambda )V(\lambda )\,d\lambda

Intensidade luminosa e diferentes tipos de fontes

En fotometría, denomínase fonte puntual aquela que emite a mesma intensidade luminosa en todas as direccións consideradas. Un exemplo práctico sería unha lámpada. Polo contrario, denomínase fonte ou superficie reflectora de Lambert aquela na que a intensidade varía co coseno do ángulo entre a dirección considerada e a normal á superficie (ou eixe de simetría da fonte).

Unidades

Unha candela defínese como a intensidade luminosa dunha fonte de luz monocromática de 540 THz que ten unha intensidade radiante de 1/683 vatios por estereorradián, ou aproximadamente 1.464 mW/sr. A frecuencia de 540 THz corresponde a unha lonxitude de onda de 555 nm, que se corresponde coa luz verde pálida preto do límite de visión do ollo. Xa que hai aproximadamente 12.6 estereorradiáns nunha esfera, o fluxo radiante total sería de aproximadamente 18.40 mW, se a fonte emitise de forma uniforme en todas as súas direccións. Unha candea corrente produce con pouca precisión unha candela de intensidade luminosa.

**Unidades de fotometría do SI**
Magnitude	Símbolo	Unidade do SI	Abrev.	Notas
Enerxía luminosa	Q_v	lumen segundo	lm·s	Ás veces úsase a denominación talbot, allea ao SI
Fluxo luminoso	F	lumen (= cd·sr)	lm	Medida da potencia luminosa percibida
Intensidade luminosa	I_v	candela (= lm/sr)	cd	Unha unidade básica do SI
Luminancia	L_v	candela por metro cadrado	cd/m²	Ás veces úsase a denominación nit, allea ao SI
Iluminancia	E_v	lux (= lm/m²)	lx	Usado para medir a incidencia da luz sobre unha superficie
Emitancia luminosa	M_v	lux (= lm/m²)	lx	Usado para medir a luz emitida por unha superficie
Eficacia luminosa	η	lumen por vatio	lm/W	razón entre fluxo luminoso e fluxo radiante