Pâs
![](http://upload.wikimedia.org/wikipedia/commons/1/19/Peace_dove.gif)
La pâs e je un stât di acuardi stabil e positîf cence nissun contrast violent. Al è doprât ancje par contâ di cuant che a finissin conflits internazionâi, in chel contest si cjacare di pâs in oposizion a une condizion di vuere. Pâs e po ancje jessi une relazion tra plui parts dulà che a regnin rispiet, justizie, bonvivi e benstâ. La pâs jenfri lis nazions e je obietîf di tantis personis e di organizazions come l'ONU (Organizazion da lis Nazions Unidis). La Assemblee Gjenerâl de ONU e à decidût di marcâ la Zornade Internazionâl de Pâs il 21 di Setembar.
La tradizionâl definizion politiche e ven fintremai de antighe Pâs Romane, la "pax, absentia belli", ven a stâi assence di vuere, une situazion dulà che une fuarce e guvierne cuntun podê dut intes sôs mans cence rispiet dai dirits dai sotans. In dì di vuê, la pâs come clare assence di vuere e je une definizion nome di une piçule part dal probleme; un preseât ricercjadôr, Johan Galtung, al mostre come cheste e je nome une "pâs negative" parcè che al pense che prin si scugni distrigâ i conflits, podopo si fasarà su la pâs.
La pâs come presince di justizie
[cambie | modifiche il codiç]Il Mahatma Gandhi al diseve che se une societât e dopre la violence, chê societât e no po jessi in pâs parcè che e je sot de injustizie de opression. La sô vision di pâs e je leade a la justizie. Johan Galtlung cheste le clame "pâs positive". La gjestion non-violente e cîr une mude pacifiche dal conflit secont la cuâl al conven tramudâ il conflit e no abulîlu.
Martin Luther King Jr. inte sô lote pai dirits civîi e cuintri la segregazion raziâl intai Stâts Unîts di Americhe, intai agns 1950-‘60, al à capît che la pâs e je alc di plui che nome la assence di violence. Al motivave che ancje se no jerin scombatiments di blancs cuintri neris, instès si jere in presince di un guvier che al gjavave la pussibilitât di vê compagns dirits ai neris di Americhe (Afromerecans). Cualchidun al criticave i ativiscj di sconciertâ la pâs sociâl al che Martin Luther King al rispuindeve che "la vere pâs no je nome la mancjance di tension, ma e je la presince di justizie". Johan Galtlung al à clamât cheste “violence struturâl”.
La pâs come svilup
[cambie | modifiche il codiç]Une idee che dispès e si lee ai studis pe pâs e je è chê di svilup, si cjacare alore di "sotsvilup" intal câs di nazions e int puaris dal pont di viste economic, culturâl, e politic. Alore tancj a crodin che la protezion e l'aiût a sedin manieris di costruzion de pâs (clamât spes cun la peraule inglese peacemaking) che e cjaparès dentri ancje une grande atenzion a l'ambient e a dutis lis creaturis che i vivin. Il mantegni la pâs (par inglês peacekeeping) cun la fuarce invezit e je une maniere di fâ preseade dal sisteme politic militâr.
Sul plan individuâl la pâs e je compagne di un stât dal didentri cence rabie, odi e sintiments negatîfs, che e si brame par se e par chei altris al pont di doprâle come maniere di saludâ (che la pâs e sedi cun te, va là in pâs) o tant che un fin tiermin de vite (cjatâ la mê pâs, polsâ in pâs).
La tradizion cristiane e lee la pâs in tiere a un acuardi tra Diu e cui che lui i vûl ben, ven a stâi ducj.