Malotia
![](http://upload.wikimedia.org/wikipedia/commons/thumb/3/3a/Gabriel_von_Max_Die_ekstatische_Jungfrau_Katharina_Emmerich.jpg/200px-Gabriel_von_Max_Die_ekstatische_Jungfrau_Katharina_Emmerich.jpg)
La malotia es un procesu i la consecuencia del afección dun sel vivu, caracterizau por una alteración del su estau ontolóhicu e salú. L'estau i/o procesu de malotia puei sel provocau pol diversus factoris, tantu intrínsecus como extrínsecus al organismu enfermu: estus factoris se denominan noxas (del griego nósos: «enfermedá», «afección dela salú»).
Heneralmenti s'entiendi la malotia comu una entidá opuesta a la salú, cuy efectu negativu es consecuenci duna alteración o desarmoniçación dun sistema a cualquiera que sea el nivel (moleculal, corporal, mental, emocional, espiritual, etc...) 'el estau fisiolóhicu considerau comu normal, equilibrau o armónicu.
Las malotias que afectan a las plantas i algotrus hénerus botánicus conciernen a la Fitopatolohia, las malotias delos animalis son 'el domeñu dela Ciencia Veterinária. La malotia umana es el núcleu organiçador dela Ciencia Médica, porque gran parti 'el conocimientu médicu está orientau acia la malotia i la su solución.
Estrictamenti (dentru 'el campu médicu), las malotias son objetu d'estudiu dela Patolohia ('el gregu παθος: «afección», «sufrimientu») que huchea las características próprias e ca entidá, los sus componentis i el procesu que desarrollan, en relación conla evidencia morfofisiolóhica que s'imprimi en la biolohia 'el organismu enfermu. Nostanti, es la Nosolohia la desciplina encargá de gobernal la definición i clasificación las diversas malotias sigún una normativa basá ena caracteriçación i identificación de los componentis i funcionis que definin ca entidá nosológica comu algu únicu i discernibili 'el restu. Assín, son estudiás nun contestu más cumpriu, comparativu, i sistemáticu, dentru dun esquema global dela patolohia.