ADN
![](http://upload.wikimedia.org/wikipedia/commons/thumb/b/b3/Chromosome-es.svg/350px-Chromosome-es.svg.png)
![](http://upload.wikimedia.org/wikipedia/commons/0/0c/DNA_animation.gif)
L'azeu desoxirribonucleicu, abreviau comu ADN, es un azeu nucleicu que contieni las estrucionis genéticas usás nel desenrou i huncionamientu de tolos organismus vivus i angunus virus; tamién s'encarga dela tresmissión ereitaria. La hunción prencipal dela molécula d'ADN es l'almacenamientu a prazu largu d'inhormación pa construil otrus componentis delas células, comu puean sel las proteínas i las moléculas d'ARN. Los segmentus d'ADN que llevan esta inhormación genética se llaman genis, peru las otras secuencias d'ADN tienin huncionis estruturalis o hazin parti dela regulación del usu d'esta inhormación genética.
Dendi la visual química, l'ADN es un polímeru de nucliótidus, o sea-si, un polinucliótidu. Ca nucliótidu, ala ves, está hormau dun glúcidu (la desoxirribosa), una basi anitrogená (que pué sel adenina→A, timina→T, citosina→C o guanina→G) i un grupu de fosfatu (dimanau del azeu fosfóricu). Entoci, lo que destingui un polinucleótidu d'otru es la basi anitrogená, i por ellu la secuencia del ADN se mienta en nombrandu namás la secuencia delas sus basis. La disposición secuencial d'estas quatru basis alo longu dela cadena es la que codifica l'inhormación genética, en siguiendu esti criteriu de complementariedá: A-T i G-C. Estu aconteci porque l'adenina i la guanina son más grandis que la timina i la citosina, conque esti criteriu premiti de concedel una uniformidá. Enos organismus vivus, l'ADN se presenta comu una cadena dupli de nucliótidus, en que las dos hebras están unías dunus atijus llamaus puentis d'idrógenu.[1]
Pa que l'inhormación que contieni l'ADN puea sel gastá dela maquinaria celulal, á de sel copiá primeru nunus trenis de nucliótidus, más cortus i con unidais deferentis, llamaus ARN. Las moléculas d'ARN se copian derechamenti del ADN por mé dun processu llamau trascrición. Deque ain síu procesás nel nucliu celulal, las moléculas d'ARN puein salil pal cituplasma i puein sel usás endispués. L'inhormación contenía nel ARN s'entrepeta por mé del códigu genéticu, que detalla la secuencia delos aminoazeus delas proteínas, sigún una correspondencia dun tripleti de nucliótidus (codón) pa caúnu delos aminoazeus. Quieri izil-si, l'inhormación genética (líquiamenti: qué proteínas vain a sel produzías en ca momentu dela vida duna célula) se halla codificá enas secuencias de nucliótidus del ADN i es mestel traduzí-la pa poel enhuncional. Tal tradución se hazi por mé del códigu genéticu a mó de dizionariu. El dizionariu "secuencia de nucliótidu-secuencia d'aminoazeus" premiti la juntura de longas cadenas de aminoazeus (las proteínas) nel cituplasma dela célula. Un ponel: nel casu dela secuencia d'ADN endicá enantis (ATGCTAGCATCG...), l'ARN polimerasa gastaría de moldi la cadena complementaria d'essa secuencia d'ADN (que sedría TAC-GAT-CGT-AGC-...) pa trascrevil una molécula d'ARNm que sedría leyía assín: AUG-CUA-GCA-UCG-...; l'ARNm final, en usandu'l códigu genéticu, sedría traduzíu comu la secuencia d'aminoazeus metionina-leucina-azeu aspárticu-arginina-...
Las secuencias d'ADN que horman l'unidá prencipal, física i huncional dela erencia se llaman genis. Ca gen contieni un cachu que se trascrivi a ARN i otru que s'encarga d'aterminal quandu i ondi vain a espressal-si. L'inhormación contenía enos genis (genética) se gasta pa produzil ARN i proteínas, que son los componentis básicus delas células, los "ladrillus" gastaus pala costrución d'orgánulus u organelus celularis, entri otras huncionis.
Drentu delas células, l'ADN s'estronca por mé dunas estruturas llamás cromosomas que, duranti'l ciclu celulal, se duplican enantis la célula partil-si. Los organismus eucariotas (comu puean sel animalis, prantas i hongus) almacenan la huerça del su ADN drentu del nucliu celulal i una parti más chica n'elimentus celularis llamaus mitocondrias, mesmu enos plastus i los centrus apreparaoris de microtúbulus o centríolus; los organismus procariotas (bacterias i arqueas) l'almacenan nel cituplasma dela célula i, alo últimu, los virus ADN lo hazin endrentu dela cápsidi de naturaleza proteica. Ai una hartá de proteínas, comu las histonas i los fatoris de trascrición, que s'ajuntan al ADN i l'atorgan una estrutura tridimensional concreta, en regulandu la su espressión. Los fatoris de trascripión reconocin secuencias regulaoras del ADN i aterminan cómu se tresmitin los geneis. El material genéticu comprletu duna dotación cromosómica se llam genoma i es un feutíu presenti con varianças chicas en tolas especiis.
Leyel tamién
[Edital | Editá'l códigu]Referencias
[Edital | Editá'l códigu]- ↑ Sergio Ferrer. «El verdaeru sentíu la vía.» Journal of Feelsynapsis (JoF). Prantilla:ISSN. 2011 (1): 119-127.
Bibliografía
[Edital | Editá'l códigu]- Watson, James D. y Francis H. C. Crick. «A structure for Deoxyribose Nucleic Acid.» (PDF). Nature 171, 737-738 pp. 25 de abril de 1953.
- Watson, James D. DNA: The Secret of Life ISBN 978-0-375-41546-3.
- Watson, James D. The Double Helix: A Personal Account of the Discovery of the Structure of DNA (Norton Critical Editions). ISBN 978-0-393-95075-5.
- Watson, James D. Avoid boring people and other lessons from a life in science. (2007) New York: Random House. ISBN 978-0-375-41284-4.
Atijus p'ahuera
[Edital | Editá'l códigu]En Commons ai conteníu multimedia sobre ADN.
- Modelo en 3 dimensiones de la estructura del ADN. Interactivu. Requieri Java.
- Experimentu pa extrael ADN
- Animación en 3D la Replicación d'ADN
- El métodu de secuenciación de Sanger