Kiki Bertens
C'l artìcul chè 'l è scrit in
Miranduléś |
![](http://upload.wikimedia.org/wikipedia/commons/thumb/2/20/Kiki-bertens-1304709962.jpg/220px-Kiki-bertens-1304709962.jpg)
La Kiki Bertens (Wateringen, 10 ad Dicémbar dal 1991, a s lèś ['kiki 'bɛrtəns] in Ulandéś) l'è na tenìsta ulandéśa prufesiunìsta da 'l 2009. Al sò ranking più bèl l'è al nùmar quarànt'òṅ, tucâ al 15 'd Avrìl dal 2013.
La dróa al bras dèstar e la tira 'l arvèrs a dū maṅ. L'è élta 182 cm.
In dla sò caréra l'à vins in d'l Avrìl dal 2012 al turnèo WTA ad Fès in Maròc baténd la spagnōla Laura Pous Tió par 7-5 6-0. In bisàca la gh'à anc siē tìtui ad qvéi ITF.
Caréra
L'ulandéśa la śōga 'l ITF ad Torhout (al nùmar dū) in d'l Utóbar dal 2010. A 'l prim tùran la fà fóra la Kirsten Flipkens par 6-7 6-4 6-1 e pò la fà cumpàgn anc cun la Lourdes Domínguez Lino par 6-7 6-0 7-5. In di quàrt la céd a la Simona Halep par 6-7 2-6. In dal 2011 la śōga a 'S-Hertogenbosch cun na carta salvàdga ma la pèrd subìt da la Sara Errani cun al puntéǵ ad 6-7 1-6. In Luj e Agóst la pèrd in di quàrt ad dū turnèo ITF da la Carla Suárez Navarro e da la Nastassja Burnett ma pò la ś mét in bisàca 'l ITF ad Koksijde.
La Kiki la vins àtar dū ITF in Mèsic e in dal Régn Unî in dal Mars dal 2012 baténd in finàl la Jaroslava Švedova par 6-4 2-6 6-1 e l'Annika Beck par 6-4 3-6 6-3. In Avrìl la vins al WTA ad Fès parténd da 'l qualificasiòṅ e pigànd una a drē c'l atra l'Urszula Radwańska 6-4 7-5, la Chanelle Scheepers 7-5 1-6 6-3, la Garbiñe Muguruza Blanco 6-1 6-4, la Simona Halep 6-3 6-4 e in finàl la Laura Pous Tió par 7-5 6-0. Anc a 'l Roland Garros la pasa 'l qualificasiòṅ ma pò la pèrd subìt da la Christina McHale 6-2 4-6 4-6. A Wimbledon l'è bòna ad bàtar la Lucie Šafářová ma minga la Jaroslava Švedova. In d'l ITF ad Bjèla la mùcia sù n'atra scunfìta da la Nastassja Burnett par 2-6 5-7. In Luj la và fóra subìt a Båstad da la Mona Barthel, a Montreal invéci la fà secónd tùran (5-7 1-6 da la Caroline Wozniacki). A Seùl la pèrd in di quàrt da la Kaia Kanepi par 4-6 4-6.
In dal 2013 la taca 'l an mandànd a cà la Svetlana Kuznecova a Auckland e pò anc la Heather Watson, prima ad far lē al valìś cun la Jamie Hampton in tri sét. A Parì a 'l quèrt la riva in fiṅ a la semifinàl in dua però l'è custréta a bandunàr cun la Sara Errani quànd l'éra sóta 0-5. La rumagnóla la la bat incóra al méś dòp in di quàrt 'd Acapûlc par 6-4 6-4. A Indian Wells, a Miami e a Katowice la và fóra a 'l secónd tùran ad òpra dla Mona Barthel, dla Na Li e dla Roberta Vinci. A Marrakesh la bat la Flavia Pennetta 7-6 4-6 6-4 prima ad cédar in di quàrt a la Lourdes Domínguez Lino 4-6 6-4 3-6. A Róma la fà piànśar la Francesca Schiavone prima ad lasàr-'g al péni cun la Sloane Stephens in tri sét. A 'l Roland Garros, a 'S-Hertogenbosch e a Wimbledon la mùcia sù tri scunfìti a 'l prim tùran cun la Sorana Cîrstea, cun l'Anabel Medina Garrigues e cun la Jaroslava Švedova.