Il-bdiewa huma kruċjali għall-preżent u l-futur tagħna
Bis-saħħa tas-settur agroalimentari tal-Ewropa, 450 miljun persuna għandhom aċċess għal ikel sikur, tajjeb għas-saħħa u affordabbli.
Il-bdiewa tal-UE huma s-sinsla tal-awtosuffiċjenza tal-ikel tal-Ewropa, u xprunaturi vitali tal-impjiegi u tat-tkabbir sostenibbli fiż-żoni rurali. Huma qed jagħtu kontribut ċentrali għat-tranżizzjoni ekoloġika kollettiva tagħna. Fl-istess ħin, jiffaċċjaw sfidi, bħat-tibdil fil-klima u suq globali kompetittiv. Huma urew reżiljenza notevoli matul pandemija, kriżi tal-enerġija, il-konsegwenzi tal-gwerra ta’ aggressjoni tar-Russja kontra l-Ukrajna, u inflazzjoni għolja.
Irridu naħdmu flimkien mal-irġiel u n-nisa fil-biedja tal-UE biex niżguraw il-provvista tal-ikel tagħna għall-futur. Il-bdiewa tagħna qed jiffaċċjaw sfidi dejjem akbar: huwa għalhekk li rridu nniedu djalogu strateġiku dwar il-futur tal-agrikoltura fl-UE. Jien konvita li l-agrikoltura u l-protezzjoni tad-dinja naturali jistgħu jimxu id f’id. Għandna bżonnhom it-tnejn.
Tnedija tad-Djalogu Strateġiku
Quddiem l-isfidi li qed jiżdiedu, l-UE qed tfittex l-aħjar modi biex tappoġġja lill-bdiewa tal-UE, u tadatta l-politiki agrikoli tal-UE, filwaqt li tqis il-ħtiġijiet tagħhom.
Biex twettaq dan, kif imwiegħed fid-diskors tagħha dwar l-Istat tal-Unjoni f’Settembru 2023, il-President von der Leyen nediet id-Djalogu Strateġiku dwar il-Futur tal-Agrikoltura.
Il-Kummissjoni Ewropea qed tlaqqa’ flimkien il-bdiewa, is-sidien lokali tal-ħwienet tal-ikel, il-bejjiegħa bl-imnut Ewropej, l-organizzazzjonijiet tal-konsumaturi, il-gruppi ambjentali, l-istituzzjonijiet finanzjarji, u l-akkademja biex jaqsmu l-ideat u jisimgħu l-ħtiġijiet tal-bdiewa.
Skopri aktar dwar id-Djalogu, il-laqgħat u l-parteċipanti tiegħu
X’qed tagħmel l-UE dwar l-agrikoltura
Il-Kummissjoni Ewropea diġà nediet sistema ta’ appoġġ għal 5 snin għall-bdiewa fil-forma ta’ Politika Agrikola Komuni (PAK) ġdida fl-2023. Din irċeviet €300 biljun f’finanzjament u tinkludi inċentivi aktar b’saħħithom biex jgħinu lill-bdiewa tagħna jadottaw prattiki aktar sostenibbli u aktar reżiljenti. Il-bdiewa se jitħallsu aktar għar-rendiment tagħhom jekk jaħżnu wkoll il-karbonju.
Fil-pjanijiet strateġiċi tal-PAK tagħhom, l-Istati Membri qed jidderieġu livelli aktar b’saħħithom ta’ appoġġ lejn dawk li l-aktar għandhom bżonnu. Pereżempju, aktar minn 10% tal-pagamenti diretti tal-UE, li jirrappreżentaw €4 biljun fis-sena, se jiġu allokati mill-ġdid għal azjendi agrikoli iżgħar. Żidna wkoll l-appoġġ ta’ emerġenza għad-diżastri naturali u x-xokkijiet fil-prezzijiet.
Fl-2023 biss, l-Ewropa pprovdiet għajnuna eċċezzjonali ta’ aktar minn €500 miljun lill-bdiewa l-aktar milquta mill-kriżijiet.
Bi tweġiba għat-tħassib tal-bdiewa, il-Kummissjoni ppreżentat għażliet biex jitnaqqas il-piż amministrattiv fuq il-bdiewa tal-UE, u qed taħdem fuq azzjonijiet biex ittejjeb il-pożizzjoni tal-bdiewa fil-katina alimentari u biex ittejjeb l-infurzar kontra prattiki kummerċjali inġusti. Nediet ukoll żewġ stħarriġiet: l-ewwel wieħed fejn il-bdiewa u l-fornituri żgħar kollha fil-katina alimentari jistgħu jaqsmu l-fehmiet tagħhom dwar l-esperjenza tagħhom ta’ prattiki kummerċjali inġusti, u t-tieni wieħed biex jiġbor il-fehmiet tal-bdiewa dwar is-simplifikar ta’ ċerti regoli u proċeduri.
