Letizia Ramolino
![](http://upload.wikimedia.org/wikipedia/commons/thumb/d/d0/Robert_Lef%C3%A8vre_001.jpg/220px-Robert_Lef%C3%A8vre_001.jpg)
Maria Letizia Ramolino maritata Bonaparte (* Aiacciu, 24 austu 1749 o 1750; Roma, 2 frivaghju 1836) hè stata una nobili di Corsica, mamma di Nabulionu Bonaparte.
Biugrafia
[mudificà | edità a fonte]Di famidda asgiata, fiddola d'un aspittori generali di u geniu civili di Corsica, Ghjuvanni Ghjirolmu Ramolino (1723-1755) è di Anghjula Maria Pietrasanta (1725-1790), si spusò u 2 ghjunghju 1764, à l'ità di 14 anni incù Carlu Maria Buonaparte (a casata dopu sarà cambiata in "Bonaparte" da Nabulionu) rimanindu viduva à 34 anni.
Fù prisenti in l'ambienti di a risistenza corsa, à fiancu à u so maritu, prima di l'annissioni à a Francia in u 1768. Stavani tandu in Corti ind'è u so cucinu Tumasgiu Arrighi de Casanova[1].
U 15 austu 1769 nasci Nabulionu. Sarà battizatu dopu, u 21 luddu 1771, à tempu à a suredda Maria Anna.
Letizia cunnusciti dopu a puvartà quandu u maritu fù à mancà in u 1785. Solu dopu à l'intrata à l'armi di Nabulionu a so famidda ripresi una simbianza di prusperità.
![](http://upload.wikimedia.org/wikipedia/commons/thumb/c/cd/Coat_of_arms_Maria_Letizia_Ramolino.svg/150px-Coat_of_arms_Maria_Letizia_Ramolino.svg.png)
Letizia fughjì da a Corsica à causa d'una rivolta in u 1793 è si rifughjò prima in Marseglia eppo trè anni dopu in Parighji. Dopu à avè accumpagnatu à Nabulionu in l'isula d'Elba, si cullucò difinitivamenti in a cità chì vidarà a so morti, Roma.
Un carattaru austeru com'è quiddu di Letizia s'accurdaia mali incù a stravaganza di Ghjasippina di Beauharnais, ch'è u fiddolu Nabulionu spusò in u 1796; cuntrariamenti à quantu lascia creda un famosu dipintu di David, Letizia ùn assitò micca in u 1804 à l'incurunazioni com'è imperatori di so fiddolu, probbiu par via di u disaccordu annantu à u matrimoniu è annantu à l'incurunazioni è par quissa ebbi un grandi ricunniscimentu in u 1805: fù insignita di u titulu di Madame mère. Vivindu luntanu da a curti, si stabilì à u casteddu di Pont-sur-Seine, chì l'era statu uffertu da u fiddolu, stendu à l'albergu di Brienne duranti i rari visiti in Parighji. Frà altru, ùn imparò mai a lingua francesa.
A so ditarminazioni affiurò ancu quandu in u 1818 pruvò incù una lettara di fà ottena a libartà à u fiddolu Nabulionu. Pari ch'idda avissi cunsirvatu, ancu in l'anni di grandi gloria di Nabulionu, u sensu di a durezza è di l'imprividibilità di a vita. Ma difatti cundussi una vita mudesta è ritirata.
![](http://upload.wikimedia.org/wikipedia/commons/thumb/6/6f/Joseph_Karl_Stieler_-_Portrait_of_Madame_M%C3%A8re_de_l%27Empereur_%28Maria_Laetitia_Ramolino_Bonaparte%2C_1750_-_1836%29.jpg/200px-Joseph_Karl_Stieler_-_Portrait_of_Madame_M%C3%A8re_de_l%27Empereur_%28Maria_Laetitia_Ramolino_Bonaparte%2C_1750_-_1836%29.jpg)
Par quantu cuncerna u so carattaru, era una donna sivera, chì eppuri si priaccupaia è si curaia monda di i fiddoli; si dici ch'idda era una donna fora da u so tempu, ed hè incù raghjoni: par asempiu, era solita fà u bagnu à i so fiddoli ogni ghjornu, mentri tandu s'usava à fà lu par u più una volta à a sittimana, ancu in i classi più asgiati. Prufundamenti riligiosa, ghjà duranti l'esiliu di Nabulionu si missi suttu à a prutizzioni di u Papa, è in u 1815 si cullucò à Roma, stendu prima in via Giulia è Palazzu Falconieri vicinu à u mezu frateddu cardinali Fesch, eppo da u 1818 in u palazzu Bonaparte hè Piazza Vinezia[2]. Cundussi l'ultimi anni in ritiru è prighera, assistuta da u patri spirituali Rev. Sac. Fideli Marchianò.
![](http://upload.wikimedia.org/wikipedia/commons/thumb/0/09/Letizia_Ramolino.jpg/200px-Letizia_Ramolino.jpg)
Fù sipolta in a Cappedda Imperiali d'Aiacciu.
Fiddoli
[mudificà | edità a fonte]Ebbi monda fiddoli, solu ottu di i quali supravvissini:
- Nabulionu Buonaparte (1764/1765 - 17 austu 1765);
- Maria Anna Buonaparte (3 ghjinnaghju 1767 - 1º ghjinnaghju 1768);
- Ghjaseppu Bonaparte (7 ghjinnaghju 1768 - 28 luddu 1844), rè di Napuli è di Spagna;
- Nabulionu Bonaparte (15 austu 1769 - 5 maghju 1821), Imperatori di i Francesi, umonimu di u frateddu maiò dicidutu;
- Maria Anna Buonaparte (1770), nata morta, umonima di a suredda maiò diciduta;
- Maria Anna Buonaparte (14 luddu - 23 nuvembri 1771), umonimu di i sureddi maiò diciduti;
- Lucianu Bonaparte (21 maghju 1775 - 29 ghjugnu 1840), principi di Canino;
- Elisa Bonaparte (3 ghjinnaghju 1777 - 7 austu 1820), granduchessa di Tuscana;
- Luigi Bonaparte (2 sittembri 1779 - 25 luddu 1844), rè di Olanda;
- Paulina Bonaparte (Maria Paulina Bonaparte) (20 uttrovi 1780 - 9 ghjugnu 1825), principessa Burghesu è duchessa di Guastalla;
- Carulina Bonaparte (24 marzu 1782 - 18 maghju 1839), Granduchessa di Berg è Cleves, moglia di Gioacchino Murat è dopu righjina cunsorti di Napuli;
- Ghjirolmu Bonaparte (15 nuvembri 1784 - 24 ghjugnu, 1860), rè di Vestfalia.
A famidda di Letizia Ramolino
[mudificà | edità a fonte]-
Carlu Maria Bonaparte
-
Ghjaseppu Bonaparte
-
Nabulionu Bonaparte
-
Lucianu Bonaparte
-
Elisa Bonaparte
-
Luigi Bonaparte
-
Paulina Bonaparte
-
Carulina Bonaparte
-
Ghjirolmu Bonaparte
Bibliugrafia
[mudificà | edità a fonte]- A. L. Serpentini (dir.), 2006, Dizziunariu storicu di a Corsica, Albiana
Noti
[mudificà | edità a fonte]- ↑ Serpentini 1996, Letizia Bonaparte.
- ↑ Par u palazzu Bonaparte in piazza Vinezia si pò vida: Mimorii nabulionichi è Roma: u Palazzu di Letizia Bonaparte
Fonti
[mudificà | edità a fonte]'Ss'articulu pruveni in parti o in tutalità da l'articulu currispundenti di a wikipedia in talianu.