Trimurti
![](http://upload.wikimedia.org/wikipedia/commons/thumb/e/ef/Brahma%2C_Vishnu_and_Shiva_seated_on_lotuses_with_their_consorts%2C_ca1770.jpg/250px-Brahma%2C_Vishnu_and_Shiva_seated_on_lotuses_with_their_consorts%2C_ca1770.jpg)
![](http://upload.wikimedia.org/wikipedia/commons/thumb/7/79/Trimurti_ellora.jpg/250px-Trimurti_ellora.jpg)
![](http://upload.wikimedia.org/wikipedia/commons/thumb/f/fa/Brahma_Vishnu_Mahesh.jpg/250px-Brahma_Vishnu_Mahesh.jpg)
Trimurti (त्रिमूर्ति, trimūrti, e sañskriteg, da lavaret eo tri furm) zo ur ger a ra dave d’an tri doue pennañ en hindouegezh : Brahma, Vichnou ha Chiva.
Aroueziañ a ra an tri doue-se kelc’hiad an hollved, gant ar grouidigezh, ar gendalc’hidigezh hag an distrujidigezh : Brahma eo krouer an hollved, Vichnou ar mirer pe ar c’hendalc’her anezhañ ha Chiva an distrujer anezhañ.
Diskouez a reer an trimurti pe e stumm tri doue kichen-ha-kichen pe e stumm ur boud gant tri fenn, c’hwec’h brec’h ha c’hwec’h gar hag a zo arouez an tri doue mesket en unan hepken.
An Trimurti evel m’eo anavezet bremañ (Brahma, Vichnou ha Chiva) eo an hini a gaver er Puranas, testennoù savet er c’hentañ milved kent J.K. hag a gont istor an hollved eus e grouidigezh betek e zistrujidigezh.
Hogen, er Veda (mojennoù koshoc’h eget an hindouegezh), ne oa ket an tri doue-se pe ne oant ket pouezus : er Rigveda (un destenn eus an eil milved kent J.K.) e veneger un triad doueed all ha ne reer ket «trimurti» anezho : Indra (ur roue), Agni (doue an tan) ha Soma (doue al loar).
An Trimurti a arouez unded an hollved e tri furm ha n’eo ket un triad tri doue bodet met disheñvel evel ma kaver e relijionoù liesdoueek zo. Abalamour da se eo bet keñveriet gant Trinded ar gristeniezh, gant Doue an Tad, Doue ar Mab hag ar Spered Santel, daoust m’eo disheñvel-mat preder an hindouegezh diouzh ar gristeniezh.