Kaguguran
Kaguguran atau bahasa kadukturannya "abortus" artinya takaluarnya hasil kunsipsi sabalum janin kawa batahan hidup diluar rahim umanya, umur batianan sakitar 22 minggu atau timbangannya kada sampai satangah kilu. Panyababnya balum dikatahui pasti, parkiraan ada kaitannya wan kalainan kromosom. Kalainan kromosom manyababkan taganggunya parkambangan ari-ari karna riaksi sistim imun umanya tahadap janin. Di Irupa, kajadian kaguguran ini sakitar 2-5%. 9-17% kajadian nang umanya umur 20-30 tahun, 15% umanya umur 30-35 tahun, 20-25% umanya umur 35-40 tahun. Mun umur sudah 42-45 tahun, kajadian kaguguran batambah sampai 50%. Mun di Indunisia 11% kamatian binian karna kaguguran nang infiksi atawa kaguguran nang pandarahannya banyak banar.[1][2]
Faktur Risiku
[babak | babak asal-mulanya]Faktur risiko kaguguran biasanya:[1]
- Faktur ari-ari, bisa kalainan bantuk ari-ari atau kalainan andakannya
- Faktor muntung rahim wan rahim
- Umur umanya tuha
- Ada gangguan mitabulik misalnya kancing manis, tensi darah tinggi, gangguan ginjal, kagandutan, tiruid, wan kurang gizi
- Infeksi salawas batianan, paling rancak infeks TORCH (Toxoplasma, Rubella, Cytomegalovirus, Herpes, Others)
- Gangguan imun misalnya lupus
- Tapapar radiasi lingkungan
Diagnusis
[babak | babak asal-mulanya]Diagnusis kaguguran ditantuakan ulih hasil wawancara, pamariksaan parut, wan pamariksaan pandukung misalnya USG wan laburaturium. Panambayan wawancara, yang ditakunakan duktur yaitu umur batianan ditantuakan malalui HPHT atawa hari partama haid tarakhir, suah kadanya kaguguran, wan ada faktur risiku atawa kadada. Urang nang kaguguran biasanya datang bapadah kasakitan parut bawah nang manjalar ka balakang, wan ada tanda-tanda batianan nang kaya kada datang bulan atau talambat datang bulan. Waktu pamariksaan parut ukuran rahim kada sasuai lawan umur janin wan kasakitan banar mun ditikin tikin disakitar parut bawah. Sabilanya janin sudah takaluar, ampih sudah marasa sakit.[2]
Macam Kaguguran
[babak | babak asal-mulanya]Sacara umum, kaguguran ada lima macam, yaitu:[2]
- Abortus Imminens atawa ancaman kaguguran, hasil kunsipsi masih bagana di dalam rahim wan muntung rahim masih tatutup
- Abortus Insipiens, hasil kunsipsi masih bagana di dalam rahim, danyut jantung janin masih ada kadangaran, tapi muntung rahim sudah tabuka
- Abortus Inkomplit, danyut jantung janin sudah kadada, sapalihan hasil kunsipsi masih tasisa di rahim
- Abortus Komplit atawa kaguguran tuntung, danyut jantung kadada lagi, sabarataan hasil kunsipsi sudah takaluar
- Missed Abortus, kada marasa pada kaguguran, danyut jantung janin sudah kadada, tapi kadada hasil kunsipsi nang kaluar datang rahim
Pananganan
[babak | babak asal-mulanya]Pananganan kaguguran tagantung wan kundisi nang sudah dipariksa duktur, ada babarapa pananganan nang mungkin, yaitu:[2]
- Distabilakan, umanya dipariksa tensi darah, napas, danyut jantung, suhu awak. Lamunnya randah dipasang infus hagan risusitasi cairan
- Baubat jalan, sisa hasil kunsipsi dibiarakan maluruh sampai takaluar saurangan. Biasanya habis sama sakali mun sudah satangah bulan
- Ubat, hagan mambantu mangaluarakan sisa hasil kunsipsi, ubat nang dipakai ubat panginduksi rahim sakira kuntraksi
- Uprasi sabilanya ada risiku pandarahan bangat, ada infiksi, atawa umanya handak lakas mangaluarakan hasil kunsipsi
Kumplikasi wan Prugnusis
[babak | babak asal-mulanya]Kumpliasi nang tarancak imbah kaguguran yaitu rahim tabarikit, biasanya ringan haja tapi barisiku kaguguran pulang mun batianan baasa. Ada jua nang pandarahan tarus gagara masih ada sisa hasil kunsipsi nang kada takaluar. Prugnusisnya biasanya baik haja, tautama hagan nang hanyar sakali kaguguran. Biasanya kawa haja batianan pulang wan baranak lahir hidup.[3]
Idukasi
[babak | babak asal-mulanya]Pasien kada dianjurakan mamakai panyumpal atawa tampun, kada dianjurkan bahubungan laki bini salama satu sampai dua minggu atawa salawas masih ada plek kacuklatan, supaya kada infiksi wan pandarahan. Pukuknya salawas batianan, bubuhan nang batianan harus lakas ka duktur sabilanya ada pandarahan tabanyak. Lamun urang nang hanyar partama kali kaguguran, biasanya kawa haja batianan pulang asal kadada kalainan urgan ripruduksi wan masih anum. Lain wan nang sudah babarapa kali kaguguran, itu musti ka kunsultan kasuburan. Limbah kaguguran biasanya kada kakaruan datang bulan, kadang parut rasa karas sakitar saminggu imbah kaguguran. Datang bulan babulik ka asal jadi taratur mun sudah ampat sampai anam minggu imbah kaguguran.Kabanyakan kajadian kaguguran ni kada kawa disulisihi, mangkanya mun sudah ada tanda-tanda batianan, harus rajin bapariksa ka bidan atawa duktur. Pamariksaan paling kada ampat kali salawas batianan. [1][3]
Referensi
[babak | babak asal-mulanya]- ^ a b c Kementerian Kesehatan Republik Indonesia. Buku Saku Pelayanan Kesehatan Ibu di Fasilitas Kesehatan Dasar dan Rujukan. 2013. http://dinkes.acehselatankab.go.id/uploads/Buku%20Saku%2010.pdf Archived 2021-04-30 at the Wayback Machine
- ^ a b c d Sheiner, et al. Bleeding During Pregnancy: A Comprehensive Guide. 2011. https://www.springer.com/gp/book/9781441998095
- ^ a b Smith et al. Incidence of Pregnancy after Expectant, Medical, or Surgical Management of Spontaneous First Trimester Miscarriage: long term follow-up of miscarriage treatment (MIST) randomised controlled trial. BMJ. 2008. https://pubmed.ncbi.nlm.nih.gov/19815581/