Акадэмія Вампу

Акадэмія Вампу
Акадэмія Вампу
Заснаваны	16 чэрвеня 1924
Краіна	Тайвань;
Размяшчэнне	Гаасюн; 鳳山區[d];
Сайт	cma.edu.tw
	Медыяфайлы на Вікісховішчы

Акадэмія Вампу (кіт. трад. 中華民國陸軍軍官學校, спр. 中华民国陆军军官学校, піньінь Zhōnghúa Mīngúo Lùjūn Jūnguān Xúexiào або скарочана кіт. трад. 陸軍官校, спр. 陆军官校, піньінь Lùjūn Guānxiào, кіт. трад. 陸官, спр. 陆官, піньінь Lùguān) — заснаваная Сунь Ятсенам ваенная школа для падрыхтоўкі афіцэрскіх кадраў Нацыянальна-рэвалюцыйнай арміі Кітайскай Рэспублікі. У цяперашні час — ваенна-навучальная ўстанова Узброеных Сіл Тайваня.

Гісторыя

Была створана Сунь Ятсенам у супрацоўніцтве з камуністамі ў маі 1924 блізу горада Гуанчжоу ў вусці ракі Чжуцзян на востраве Хуанпу (на мясцовым кантонскім дыялекце гэта назва вымаўляецца як «Вампу»), ад якога і атрымала назву. Афіцыйна адкрыта 16 чэрвеня 1924, першыя заняткі пачаліся 1 мая таго ж года.

Узначаліў акадэмію Чан Кайшы, яго намеснікам па палітычнай частцы быў Чжоу Эньлай. Вялікую дапамогу ў арганізацыі і працы ўстановы аказалі савецкія ваенныя спецыялісты на чале з П. А. Паўлавым, а затым, пасля яго гібелі ў ліпені 1924, В. К. Блюхерам (Галіным). У арганізацыі прымалі ўдзел А. І. Чарапанаў (галоўны саветнік) і М. М. Барадзін (палітычны саветнік Гаміньдана), а ў распрацоўцы яе вучэбнай праграмы — І. Б. Разгон, І. К. Мамаеў, А. С. Бубнаў, М. І. Дратвін, М. П. Сахноўская і іншыя.

У 1924—1926 гадах акадэмія падрыхтавала 4258 афіцэраў. Выпускнікі гулялі важную ролю як у Нацыянальна-рэвалюцыйнай арміі Гаміньдана, так і ў Камуністычнай Чырвонай арміі Кітая, якая ўтварылася пасля разрыву паміж Гаміньданам і камуністамі. Баявое хрышчэнне навучэнцаў прайшло ў Паўночным паходзе 1926—1927.

Пасля Паўночнага паходу акадэмія ў пачатку 1927 года была пераведзена ва Ухань, а ў 1928 годзе ў новую сталіцу Кітая Нанкін. Падчас япона-кітайскай вайны ўстанова эвакуіравана ў Чэнду.

Пасля паразы Гаміньдана ў грамадзянскай вайне акадэмія была адноўлена на Тайвані ў Гаасюне як Ваенная акадэмія Кітайскай Рэспублікі.

Літаратура

Черепанов А. И. Записки военного советника в Китае. — М.: Наука, 1964.
Черепанов А. И. Поле ратное мое. — М.: Воениздат, 1984.
Наумов С. Н., Школа Вампу, в кн.: Советские добровольцы о первой гражданской революционной войне в Китае, М., 1961.

Спасылкі

The Chinese Military Academy Official Website Архівавана 15 мая 2011. Архивная копия ад 15 мая 2011 на Wayback Machine