Тацьцяна Гуцу

Тацьцяна Гуцу
Пэрсанальная інфармацыя
Поўнае імя	Тацьцяна Канстанцінаўна Гуцу Тетяна Костянтинівна Гуцу
Нарадзілася	5 верасьня 1976 (47 гадоў) Адэса, УССР
Грамадзянства	Украіна
Прафэсійная інфармацыя
Спэцыялізацыя	спартовая гімнастыка
Узнагароды і мэдалі Алімпійскія гульні Золата Барсэлёна-1992 шматбор'е Золата Барсэлёна-1992 каманда Срэбра Барсэлёна-1992 брусья Бронза Барсэлёна-1992 вольныя Чэмпіянаты сьвету Золата Індынапаліс-1991 каманда Срэбра Індынапаліс-1991 брусья Срэбра Індынапаліс-1991 бервяно Чэмпіянаты Эўропы Золата Нант-1992 шматбор'е Золата Нант-1992 брусья Золата Нант-1992 апорны скачок Срэбра Нант-1992 бервяно Бронза Нант-1992 вольныя

Тацьцяна Канстанцінаўна Гуцу (5 верасьня 1976, Адэса, УССР) — савецкая і ўкраінская гімнастка, двухразовая алімпійская чэмпіёнка 1992 году ў асабістым і камандным мнагабор'і, неаднаразовая чэмпіёнка сьвету, Эўропы і СССР, уладальніца Кубку СССР і Кубка СНД. Заслужаны майстар спорту СССР (1991).

Жыцьцяпіс

Першымі трэнерамі Тацьцяны былі Таміла Еўдакімава і Віктар Дзікі.

У 1992 годзе, на чэмпіянаце Эўропы ў Нанце, у складзе зборнай Украіны Гуцу заваявала найбольшую колькасьць мэдалёў сярод усіх удзельніц — 5, сярод іх — 3 залатыя. Пасьля заканчэньня спартовай кар’еры ў 1993 годзе паехала ў ЗША, працуе трэнэрам.

Скандал са Шчэрбам

У 2017 годзе на сваёй старонцы ў Facebook Тацьцяна Гуцу паведаміла, што на турніры ў Штутгарце ў 1991 годзе, калі ёй было 15 гадоў, яна была згвалтаваная партнэрам па камандзе Віталём Шчэрба, якога яна назвала «пачварай, з-за якога на працягу многіх гадоў жыла ў палоне ўласных страхаў».

	Віталь Шчэрба — монстр, які трымаў мяне ў палоне ўласных страхаў столькі гадоў. Я ведаю, ты будзеш абараняцца, але мае падрабязнасьці шматкроць мацнейшыя за твае словы. Я цяпер мацней, чым калі-небудзь. Табе мяне больш не зьняважыць. Гэта мая гісторыя папялушкі
—Радыё Свабода, Украінская чэмпіёнка зьвінаваціла легенду беларускай гімнастыкі ў згвалтаваньні

Яе суседка па пакоі, былая гімнастка зборнай СССР Тацьцяна Торапава абвяргае яе выказваньні: «Засядзеліся проста да пазна! Мы павінны былі класьціся спаць, і я папрасіла Віталіка сысьці да сябе ў пакой. Вядома, можа, ён крыху і лез да яе, але каб мела месца гвалт? Не! Каб у яе быў стрэс на фоне чаго-небудзь падобнага, такога таксама не памятаю, шчыра. Так, шмат гадоў прайшло, але каб гвалт ... Не, пры мне - не».

У адказ Гуцу напісала: «Дзякуй табе, Тацяна Торапава, пра якую я думала, што ты мая сяброўка па жыцьці і ў зборнай СССР, за тое, што не заступілася за мяне, калі я больш за ўсё мела патрэбу ў табе. Ты была там. Ты ўсё чула. Але не абараніла мяне, — напісала Гуцу. — Рустам Шарыпаў, і табе дзякуй, што ты быў добрым сябрам для свайго сябра і не абараніў мяне, маленькую 15-гадовую дзяўчынку».

Пазьней, у лютым 2018 году, у дакумэнтальным фільме «Непераможаны», што паказалі па БТ, Віталь Шчэрба заявіў, што падаў у суд на ўкраінскую гімнастку.

	Так, я падаў на яе ў суд. Гэта было зразумела ад самага пачатку, — сказаў Шчэрба. — Я рыхтаваўся з адвакатамі, у лютым ужо будзе першае слуханьне. Справай займаецца суд Лас-Вэгасу
—Радыё Свабода, Віталь Шчэрба падаў у суд на Тацяну Гуцу, якая абвінаваціла яго ў згвалтаваньні

Віталь Шчэрба выказаў шкадаваньне, цяпер любы можа сказаць усё што заўгодна. А паколькі апраўдвацца няма асаблівага сэнсу — даказаць усё роўна нічога немагчыма — то застаецца толькі судовая справа. У фільме ён назваў Тацяну Гуцу «неадэкватным чалавекам».

Вонкавыя спасылкі

• Таццяна Канстанцінаўна Гуцу / Tatiana Gucu, peoples.ru
• Сучасны музэй спорту, smsport.ru
• Биография.ру — Таццяна Канстанцінаўна Гуцу, biografija.ru
• Спартыўная гімнастыка. Асобы: жыцьцяпісы, дасягненьні, перамогі, gymnast.ru